Hebreos 3 - Zoque Copainalá New Testament

Jesús maste' mʌja'ŋbʌ que ja'n Moisés

¹ Atzita'm, Diojsismij ŋguiopiŋdamu y nwyejtamu wa'mij maŋu ittamu ñe'cʌji'ŋ tzajpojmo. Te'cotoya nique'nʌytyamʌ te' Cristo Jesús. Ñe'cʌte' te' quiʌ'wejupʌ Diojsis, y ñe'cʌtijte'que' tʌta'm mʌja'ŋbʌ sacerdote cotzoŋbapʌ'stʌ wa'ytyʌ nwʌ'aŋja'moytyamu.

² Jesujsis chʌcpa Diojsis šunbašej porque Diojsis quiopiŋu wa'y chʌjcu te'šejpʌ yoscuy. Te'šejtij chʌjque'tu Moisejsis, te' Diojsis quiopiŋupʌ pʌ'nojmota'm.

³ Pyʌcpa wa'ytyʌ más mʌja'ŋgʌna'tzʌyu Jesús que ja'n Moisés, jujcha'ndʌ más mʌja'ŋgʌna'tzʌpya tʌctzʌcpapʌ que ja'nde' tʌc.

⁴ Jujche'ŋ tʌc tʌ ŋguenba, iwʌjutiwʌ'ste' chʌjcu. Pero mumutiyʌta'm ijtu Diojsiste' chʌjcu.

⁵ Wiyuŋšej Moisés, jujcha' coyosa, myato'ŋoyjayu Dios mumutiyʌcʌsi yojsu'c te' Diojsis pyʌ'nojmota'm. Chamjayaju tiyʌta'm inʌc maŋba chamu Diojsis.

⁶ Pero Cristo myato'ŋoyjayu Dios mumutiyʌcʌsi yojsu'c te' Diojsis pyʌ'nojmocta'm, y ñe'cʌte' te' pʌ'nista'm Quiomi, porque Diojsiste' 'Yune. Y te' pʌnda'm tʌta'mde', juca tumʌtzocoytyʌ nite'tzʌyjojcʌtʌctamba ñe'cʌ, y oma'omatʌ njo'ctamba.

Ñimejcʌyu Diojsis sapʌjcuy ñe' pyʌngotoyata'm

⁷ Y como pʌ'nista'mde' Quiomi yʌ' Cristo pyʌcpa wa'ytyʌ ŋgoquendamu cuenta te' Espíritu Santo's chamušej: Juca išo'pyʌ jamamis matoŋjaytyamba Diojsis chame,

⁸ Uy yajnuyu'ajtame mista'm ndzocoy, Chʌquiajušej mista'm nwinatata'sta'm jamyato'ŋoyjaya'cʌj te' ya'acta'mbʌ aŋsʌ'ŋojmo. Pijche'cʌj tzʌjquišaju te' ja'itʌnʌmʌmʌy.

⁹ Te'yamʌj sunu oc'išajtʌ'ʌ mista'm nwinatata'sta'm. Te'yʌj tzʌjquišaju, y wʌstʌjqui's ame'ʌs nyajqueñaju te' isaŋwʌ'ajcuy ʌs ndzʌcjayajupʌ.

¹⁰ Te'šejta'mbʌ tiyʌcotoya jene tzʌjqui'šca'yaju'ʌj te' pijche'cta'mbʌ pʌ'nista'm. Y nʌmu'ʌj: Na' tocoquiuy quipšajpa choco'yojmo, Y ja'n quio'ŋyay te' Tuŋ ʌs nyajqueñajupʌ.

¹¹ Te'cotoya qui'šca'u'camʌj nʌmu'ʌj: Yajujche'c ja'n maŋu tyʌjcʌyaju maŋbamʌ'yʌs inʌc nyajsapʌquiaju.

¹² Coquendamʌ cuenta jeque, atzita'm, uy ijtu mi'ojmota'm yatzipʌ tzocoy ja'n wyʌ'aŋja'mopyʌ. Juca te'šejpʌ tzocomyis nʌ'ittamu maŋbamis ndzactamu te' quenjojcʌtʌcpapʌ Dios.

¹³ Más oye wa'mis yʌ'wʌ te'wʌ ndʌwʌ aŋnʌctza'mʌytyamu Diojsis chamepit tumdumʌ jama ijtu'cmaj tiempo, wa'y jana ya'iwʌ ñuyu'aju choco'yojmo yacha'cu'yis 'yaŋgoma'cʌ'oquiupyit.

¹⁴ Juca nite'tzʌytyamba Dios hasta ŋguendamba ñe'cʌ, y nwʌ'aŋjambatʌ jujcha'nde' mbʌjcʌchoŋdamu'cšejtʌ, maŋbatʌ nʌpʌctamu Cristo's jujche'ŋ ñe'cʌ's quiowindzʌmba.

¹⁵ Porque nʌmba te' Totojaye'ojmo: Juca išo'pyʌ jamamis matoŋjaytyamba Diojsis chame, Uy yajnuyu'ajtame mista'm ndzocoy, Chʌquiajušej mista'm nwinatata'sta'm tzʌjqui'šca'yaju'cʌj.

¹⁶ ¿Iwʌta'masʌ'ŋde' te' quiʌmato'ŋʌyajupʌ's Dios, y jʌsa'ca chʌjqui'šca'yaju? Yʌ'ta'mbʌ'ste', te' Moisejsis ñʌpujtyajupʌ Egipto'ojmoc.

¹⁷ ¿Iwʌta'mande' Diojsis qui'nišaju wʌstʌjqui's ame? Qui'nišaju Diojsis te' cowapa'tyajupʌ, y te'ta'mbʌte' ca'yaju te' ja'itʌnʌmʌmʌy.

¹⁸ ¿Y iwʌta'ma ñʌjayaju Diojsis: Yajujche'cmij ja'n maŋu ñdyʌjcʌytyamu maŋbamʌ'yʌsmij inʌc nyajsapʌctamu? Ñʌjayatʌju yʌ'šej te' jamyato'ŋoyapʌ.

¹⁹ Mustambatʌ que jamusʌ tyʌjcʌya porque jawyʌ'aŋjamya Dios tyumʌtzocoy.