Hebreos 2 - Zoque Copainalá New Testament

Ja'n 'yoye wa'ytyʌ njambʌ'u que Diojsistʌ yajcotzojcu

¹ Como wiyuŋšejta'mbʌ tiyʌyʌ', ijtu pyena wa'ytyʌ tumʌtzocoy mato'ŋoytyamu te' matoŋdamupʌ tiya'ndʌ uytya'ndʌ maŋu njascojchi'ttamu.

² Porque wiyuŋda'mbʌ tiyʌte' mumu Diojsis chamupʌ tiyʌ angelespitta'm. Y mumu te' yacha'cuy chʌquiajupʌ pʌ'nis y jamyato'ŋoyapʌ, Diojsis yajnʌco'aŋgʌyajwa'a pyʌcpašej.

³ Juca yajco'aŋgʌyatʌju te'šej, ¿ja'nsʌ'ŋdʌ maŋu yajnʌco'aŋgʌyu tʌ juca ja'ndʌ ŋgoquene cuenta wa'ytyʌ yajcotzojcu Diojsis, porque ñe'cʌ's sundambatʌ? Winatij chamgopuŋu tʌ Ngomi Jesujsis que Diojsis sunbatʌ yajcotzojcu. Y te' quiʌmato'ŋʌyajupʌ's ñe'cʌ's chamušej tzamjayajque'tutʌ que wiyuŋbʌ tiyʌte' tʌ Ngomi's chamušej.

⁴ Y Diojsis yajquendaŋgue'tutʌ que wiyuŋdzamyaju chʌquiaju'c señalta'm, maya'aŋda'mbʌ tiyʌ y wi'ni eyata'mbʌ isaŋwʌ'ajcuy Diojsis pyʌmipit. Y quejque'tu chi'yatʌju'c te' Espíritu Santo ñe'cʌ's šunušej.

Jesucristo pʌnšej tiju wyijtu quia'ŋu

⁵ Porque jaquiojtya Diojsis te' angelesta'm ñe'cʌ's wa'y 'yaŋgui'myaju te' maŋbamaj tyujcupʌ najsacopac, yʌtijtʌ nʌ ndzamdamupʌ.

⁶ Tuma'ŋbʌ'nis yʌ'šej ñʌjayu Dios salmo'ojmo: Tiyʌjanatiyʌta'mde' te' pʌnda'm, ¿tiyajca'nde' njamwʌtzʌquiajpa? Y te'šejtijque' te' pʌ'nista'm 'yune, ¿tiyajca'nde' ŋgoqueñajpa?

⁷ Uša'ŋmis más cʌmaŋ ndzʌquiaju te' pʌnda'm que ja'nde' angelesta'm, Ndzi'yajumis mʌja'ŋajcuy y mujsoquiuy.

⁸ Ngojtumis te' pʌnda'm wa'y ñe'cʌ's 'yaŋgui'myaju mumutiyʌ. Y como Diojsis quiojtu te' pʌn wa'y 'yaŋgui'myaju mumutiyʌ, mumutiyʌ maŋba 'yaŋgui'mu te' pʌ'nista'm. Pero mustambatʌ que yʌtij ja'nmaj nʌ 'yaŋgui'myaju mumutiyʌcʌsi.

⁹ Pero mustambatʌ que Diojsis quiojtu te' Jesús uša'ŋ más cʌmaŋbʌ que ja'nde' angelesta'm. Pero yʌtij Diojsis chi'u mʌja'ŋajcuy y aŋgui'mʌtʌjcuy, porque toyapʌjcu y ca'u mumu pʌngotoya wa'ytyʌ yajcotzoctamu Diojsis yajya'moquiupyit.

¹⁰ Diojsis chʌjcu mumutiyʌ y ñe'cʌcotoyate' ijtu. Wyʌcomʌ'yu ñe'cʌ's wa'y chajcu te' 'Yune wa'y tyoyapʌjcu, te'šej wa'y yajcota'nu, porque ñe'cʌ'ste' maŋba inʌc yajcotzojcu wʌwʌ pʌnda'm. Y ñe'cʌte' te' cowi'na maŋba ñʌtʌjcʌyajupʌ's tzajpojmo.

¹¹ Te' yajmasa'na'opyapʌ Jesús y te' masa'najyajpapʌ, tumʌta'mbʌtijte' Tyata Dios. Te'cotoya te' yajmasa'najyajpapʌ's ja'n quiotza'ajyay wa'y ñʌjayaju: Ʌs atzita'm, te' ñe'cʌ's yajmasa'najyajupʌ.

¹² Itque'tu yʌ'šej nʌmbamʌy: Maŋba'ʌs nyajmujšaju ʌs ndʌwʌta'm que mijte' te' Dios. Maŋba'ʌs nwanjayu mis mʌja'ŋajcuy te' masanbʌ tu'mʌquiu'yojmo.

¹³ Y eyaco naco'oyj nʌmgue'tu: Ʌs nite'tzʌyjojcʌtʌcpa'ʌs Dios. Y nʌmgue'tu: Yʌtij yʌ'yʌj ijtu te' Diojsisʌj tzi'yajupʌ uneji'ŋ.

¹⁴ Tʌta'm Diojsistʌyʌ' 'yuneta'm, y pʌnda'mdʌyʌ'. Te'cotoya te'šejtijque' minu pyʌ'najque'tu ñe'cʌ pʌnšej. Y ca'u wa'y yaju ñe'cʌ's te' diablo, porque te'wʌ'stʌte' yajca'tamba pyʌmipit.

¹⁵ Y yʌ' Jesujsis minu yajcotzojcu jujche'ŋdʌ aŋgui'mba inʌc diablo's porque mumu jamatʌ inʌc na'tzi ittamba porque maŋbatʌ inʌc ŋga'u.

¹⁶ Porque wiyuŋšej ja'n quiotzowe Jesujsis te' angelesta'm, sino que quiotzoŋba mumu pʌn, Abrahaŋšej wʌ'aŋja'moyajpapʌ.

¹⁷ Te'cotoya ijtu inʌc pyena wa'y minu pyʌ'naju pʌnšej te' Jesús, wa'ytyʌ 'yatzišej comʌ'ytyamu mumutiyʌcʌsi. Y te'šej wa'y pyʌjcʌchoŋu sacerdote'ajcuy maŋba tyo'ya'ŋʌyajupʌ's pʌnda'm, y maŋbapʌ's chʌjcu Diojsis šunbašej. Y minu wa'y chi'oquia'u wyin wa'y quioyojayaju pʌ'nista'm quiowa.

¹⁸ Porque jene quienu toya ñe'cʌ's 'yoc'isu'c te' yatziwʌ's. Te'cotoya muspa quiotzoŋyaju te' 'yoc'išatʌjpapʌ yatziwʌ's.