Hebreos 13 - Zoque Copainalá New Testament

Jutz pyʌcpa wa'ytyʌ nyajtzocopyajcu Dios

¹ Našunjojcʌtʌctamʌ atzi'ojmota'm.

² Tzi'tamʌ jejcuy ja'nmis ispʌctamepʌ atzita'm, porque ijtu yajejyajupʌ's y ni jamyuša ñe'cʌ'sta'm yajejyaju angelesta'm tyʌjcaŋʌ.

³ Cotzoŋdamʌ te' somyajupʌ preso'mo, como que ñdyumʌsomatʌjtamumij ñe'cʌji'ŋda'm. To'ya'ŋʌytyaŋgue'ta te' nʌ quieñajupʌ's toya, como que ñe'cʌji'ŋda'm mij nʌ ñdyoyapʌctamu.

⁴ Masanbʌ tiyʌte' te' co'tʌjcajcuy, y jene oyepʌ tiyʌte' wa'y ñʌ'ijtu yomo te' pʌ'nis, y wa'y ñʌ'ijtu jyayaj te' yomo's. Pero Diojsis maŋba quiʌme'chaju ispʌquitzʌquiajpapʌ y cʌtzʌjcʌ'oyajpapʌ.

⁵ Uy aŋsundame najsacopajcʌsipʌ itʌpa'tcuy. Tzocopyactamʌ te' nʌšejtijmij njyamacʌtʌctamu, porque Dios nʌmba: Ja'ʌsmij maŋu njambʌ'u, ni ja'ʌsmij maŋu ndzajcu.

⁶ Te'cotoya jana na'chcuytyʌ muspa nʌmu: Diojsisʌj maŋba cotzoŋu, Ja'namʌs na'tze ya'iwʌ juca tiyʌ'iwʌ'ʌj sunba tzʌcjayaju.

⁷ Jamwʌtzʌctamʌ ŋguioqueñajupʌ'smij y ñchamgopuŋjayajupʌ'smij wina te' Diojsis chame. Quipstamʌ jutz tu'ŋajyaju oye y wʌ'aŋja'moytyamʌ ñe'cʌ wʌ'aŋja'moyajušej.

⁸ Cʌtʌquiajupʌ aŋsʌ'ŋojmo y te' yʌtijpʌ y te' minbapʌ y maŋbapʌ aŋsʌ'ŋojmota'm Jesucristo ja'n quiacpʌ'i.

⁹ Uy pʌjcʌchoŋdame wi'ni eyata'mbʌ aŋma'yoquiuy ni te' cʌmchʌlʌytya'mbʌ. Más oye wa'y pyaquipʌjcu mista'm ndzocoy Diojsis yajya'moquiupyit y ja'n cu'tcuytya'mbʌ tiyʌpit. Te' cu'tcuy ñijamyajpapʌ's ja'n yajtiyʌ ñʌwʌ'ajyay.

¹⁰ Tʌta'm, nwʌ'aŋjamdambatʌ te' Cristo, te' tumnacatij yajca'yajupʌ, y te' quio'ŋyajpapʌ's ya'acta'mbʌ cʌna'tzʌ'oquiuy ja'n musi ñʌctʌjcʌ'yʌyaju.

¹¹ Te' mʌja'ŋbʌ sacerdote's ñʌtʌjcʌpya inʌc copʌ'nista'm ñʌ'pin te' Más Masanbʌ Luga'rojmo wa'y te'wʌpit quioyojayaju pʌ'nista'm quiowa. Te' copʌ'nista'm cuerpo ñʌpujtyajpa inʌc te' cumgu'yojmoc wa'y maŋu pyoŋbʌ'yaju.

¹² Te'šejtijque' Jesús ñʌpujtyaju te' cumgu'yojmoc wa'y maŋu yajca'yaju. Te'šej ca'u wa'y yajmasa'najyaju pʌnda'm ñe' ñʌ'pinbit.

¹³ Ma'nta'm Jesusji'ŋ wa'ytyʌ ŋguendamu toya ñe'cʌ's quienušej toya ñʌpujtyaju'c te' cumgu'yojmoc.

¹⁴ Yʌy najsacopajcʌsi minbatijtʌyʌ' nwingʌtʌctamu. Nʌmajtʌ njo'ctamu te' tzajpojmopʌtʌ itcuy ja'n yayepʌ.

¹⁵ Como nwʌ'aŋjamdambatʌ Jesús, pyʌcpa wa'ytyʌ nwʌcotzamdamu Dios ñe'cʌpit, ja'n copʌn-nʌ'pinbʌ cʌna'tzʌ'oquiupyit. Pyʌcpa wa'ytyʌ nʌjayu yʌscotoya te' ñe' yajya'moquiuquiotoya.

¹⁶ Uy jambʌ'tame wa'mis nayajyamʌtʌjtamu ne'co'mo, porque yʌ' yajya'moquiu'yis yajtzocopyacpa Dios más que ja'nde' copʌn-nʌ'pi'nis.

¹⁷ Mato'ŋoyjaytyamʌ mista'm ŋgoque'nopyapʌ. Tzʌctamʌ ñe'cʌ's chamyajpapʌ tiyʌ, porque ñe'cʌ'smijte' ñʌtu'ŋajyajpapʌ. Yʌ'ta'mbʌ's maŋba ñʌtzamyaju jutzmij ñʌtu'ŋatʌjtamu. Te'cotoya tzʌcme'tztamʌ umis maŋu ndza'ajcuychi'tamu, sino que oma'oma wa'y 'yaŋdzoŋyaju Diojsis wyi'naŋdʌjqui. Juca ja'n tye'šej maŋbamij ñdyoyapʌctamu.

¹⁸ Wa'coytyamʌ Dioscʌsi tʌjcotoya. Tʌs ndzoco'yis ja'ndʌj nicotza'mʌy. Tu'ŋajtyo'yutʌj oye'c mumutiyʌ'ojmo.

¹⁹ Nwa'cjaytyamba'ʌsmij, jeque, wa'mis tumʌtzocoy nwa'cjaytyamu Dios ʌjcotoya, wa'yʌj jʌ'nba'oyj mujsu minu tey ittamumʌmyij.

Ultimota'mbʌ nicomasa'nʌquiuy y dyujchi'oquiuy

²⁰ Diojsis yajwinsa'u tʌ Ngomi Jesucristo ca'yajupʌ'ojmoc. Yʌ'wʌte' te' mʌja'ŋbʌ ñchowambe-coque'noye, y ñe' ñʌ'pinbit tujcu te' ja'na yayepʌ trato. Yʌ' Dios, yajwinsa'upʌ's Jesús, yʌ'wʌ'ste' šajpa sʌ'mnaquiuy.

²¹ Sunba'ʌs wa'mij nyajtziŋi'ajtamu Diojsis, wa'mis ndzʌctamu mumu oyeta'mbʌ tiyʌ šunbašej ñe'cʌ's. Y wa'y yajcota'njayu mista'm ndzoco'yo'c nʌctʌ'yoquiuy Jesucristopit wa'mis nyajtzocopyactamu Dios. Y ma'ndʌ nwʌcotzamjojcʌtʌctamu ñe'cʌ. Amén.

²² Pero nwa'cjaytyamba'ʌsmij, atzita'm, wa'mis mbʌ'mgopajcʌyjaytyamu ʌsyʌ' aŋnʌctza'mʌ'oquiuy nʌše'ʌsmij njayjaytyamu uša'ŋ.

²³ Mustamʌ que chʌcʌpʌ'yajwa'a tʌta'm atzi Timoteo. Juca minba jʌ'nba'oyj yʌy, minbatʌj mejtzji'ŋ wa'ytyʌsmij minu ndu'nistamu tey.

²⁴ Dyujchi'jaytyamʌ mumu mista'm ŋgoque'nopyapʌ, y mumu te' atzita'm. Italia-najsojmota'mbʌ's ñdyujchi'taŋgue'tpamij.

²⁵ Diojsis yajya'moquiu'yismij yajcotzoŋdamʌ. Amén.