Hebreos 12 - Zoque Copainalá New Testament

Nguengʌspʌcta'mitʌy Jesuscʌsi

¹ Wʌwʌta'mbʌ pʌ'nis que'naŋgʌschi'ʌyajpatʌ ñe'ta'm wyʌ'aŋjamguy, te'cotoya ndzacta'mitʌy mumu ja'n 'yoyeta'mbʌ tiyʌ y tʌ ŋgowa yajwinducpapʌ'stʌ. Ngʌtzipitta'mitʌy pacienciapit nʌwa'ndʌ ndu'ŋajupʌ tiyʌ'ojmo,

² uytyʌ ŋguendocoytyamu Jesús quiojtupʌ's te' wʌ'aŋja'moquiuy tʌta'm ndzoco'yojmo. Ñe'cʌ'stʌ maŋba yajwʌ'aŋjamjojcʌtʌjcu. Jañʌctza'a'ʌ wa'y yajca'yaju cruzcʌsi porque myujsu que jʌsa'ca maŋba inʌc 'yomdzocopyajcu. Y yʌtij pocspajcu Diojsis chʌ'na'ŋoyj nimeque'ctijpʌ mʌja'ŋajcu'yojmo.

³ Quipstamʌ jutz ñʌmaŋu paciencia tʌ Ngomi's yajqueñaju'c toya cowatzʌquita'mbʌ pʌ'nis, wa'y pyaquipʌjcu mista'm ndzocoy y umij myocha'tamu.

⁴ Yʌtij nʌmis nʌquiptamu ŋgowa pero ja'nmajmis ndzi'oquia'tame nwin wa'mij ŋguia'tamu.

⁵ Ngomʌ'pya'ʌs que mista'm njambʌ'tamwa'mis jutzmij 'yaŋnʌctza'mʌytyamba jujcha' 'yune Diojsis, nʌmba'c: Tʌwʌy, nyajwinductamba'cmij tʌ Ngomi's, coquendamʌ cuenta wa'mij myato'ŋoytyamu. Ni uy tzocomyocha'tame 'yotoŋjaytyamba'cmij.

⁶ Porque tʌ Ngomi's iwʌta'm šunba yajwinducpa, Y iwʌta'm pyʌjcʌchoŋba 'yunešej ñacspa.

⁷ Juca mbʌ'mgopajcʌyjaytyambamis Diojsis ñacsoquiuy ñe' 'yunešejmijte' nʌ nyajwinductamu. Porque mumu tata'sta'm yajwinduquiajpa 'yune.

⁸ Y juca Diojsismij ja'n ñacstame mijta'm ñacšajpašej eyata'mbʌ, quipstamʌ ne'cʌ que ja'nmijte' ñe' 'yuneta'm.

⁹ Mustambatʌ que uneta'mʌ'cmajtʌ nacšajpatʌ inʌc tʌta'm ŋgoyajpʌ'na's, y mato'ŋoyjayajpatʌ inʌc. Te'cotoya yʌtij más oye wa'ytyʌ mato'ŋoyjaytyamu tzajpojmopʌ tʌ Ndata Dios wa'ytyʌ tzi'tamu oyepʌ quenguy.

¹⁰ Uša'ŋ aŋsʌŋgotoya te' tʌta'm ŋgoyajpʌ'na's nacšajpatʌ inʌc, ñe'cʌ's quipšajpašej inʌc que oye. Pero Diojsis nacspatʌ tʌte' nʌwʌ'ajcuquiotoya wa'ytyʌ ñe'cʌ's yajmasa'naju.

¹¹ Wiyuŋšej ja'ndʌ nʌ'ome nʌ'ctʌ nacsu Diojsis, sino que triste'ajpatʌ. Pero jʌsa'ca minbatʌ nʌctʌ'yu que nacswiyu'ŋajutʌ wa'ytyʌ nʌtu'ŋajtamu wiyuŋda'mbʌ tiyʌ šunbašej ñe'cʌ's, y wa'ytyʌ mba'ttamu sʌ'mnaquiuy juca te'šejtʌ nacswiyu'ŋatʌjtamba.

Te' jye'ŋjayajpapʌ's Diojsis 'yotowe

¹² Te'cotoya pʌmitzi'tamʌ ndʌwʌ y mista'm ne' nwin, y mochitzocoytya'mbʌ mis ndʌwʌji'ŋ naquiotzowatʌjtamʌ.

¹³ Me'tztamʌ te' oyepʌ tuŋ y te'wʌ pʌctamʌ wa'y jana tyuŋdocoyaju te' mochitzocoytya'mbʌ sino que wa'y pyʌmipʌquiaju.

¹⁴ Me'tztamʌ wa'mis sʌ'mnayu'c ittamu mumu pʌnji'ŋ, y ittamʌ masanbʌnšej porque iwʌ ja'n myasa'najyay ja'n maŋu quieñaju Dios.

¹⁵ Coquendamʌ cuenta oye'c uy ya'iwʌ's myatzwindujcu Diojsistʌ sunba tzi'upʌ yajya'moquiuy wa'ytyʌ cotzoŋu. Juca te'šej chʌcpa nʌte' tyaca'yaju chocoy, y te' tacapyʌ tzocopyit maŋba yajtaca'yaju eyata'mbʌ's chocoy.

¹⁶ Uy ijtu mi'ojmota'm ispʌquitzʌcpapʌ, ni ja'na quioquenjapyʌ's cuenta Diojsis chamupʌ tiyʌ, chʌjcušej Esau's quiacpʌ'u'c te' wyin-une'ajcu'yis quiowindzʌmbapʌ tiyʌ saŋdumnacapʌ cu'tcuquiʌsi.

¹⁷ Porque mustambamis que jʌsa'ca quiʌñʌñjo'yu wa'y ñicomasa'nʌyu tyata's, porque ñe'cʌte' te' wyin-une, tyata's jañicomasa'nʌ'a. Pero ñe'cʌ jʌyjo'yumaj wa'y pyʌcwitu'u te' wyin-une'ajcu'yis quiowindzʌmbapʌ tiyʌ ñempe quipswitu'u.

¹⁸ Pero yʌtij Diojsiste' wyi'naŋdʌjqui mij maŋba ŋguia'ŋnu'ctamu, y ja'ndejca'te' Sinaí naspu'mna'ŋi. Yʌ'wʌcʌsi nʌ inʌc ñemu jucʌtʌc, pijche'c pi'tzanʌmu y minu tuji'ŋbʌ sawa.

¹⁹ Y jañu'ctamʌmij te' mu'yajumʌy maŋba'c inʌc 'yotoŋu Dios, y myatoŋjayajupʌ's te' Diojsis 'yotowe nʌmyaju que ja'na inʌc suni myatoŋyaju.

²⁰ Te'šej nʌmyaju porque ja'n inʌc musi pyʌ'mgopajcʌyaju Diojsis inʌc nʌ 'yaŋgui'myajušej. Porque nʌmu que hasta te' copʌnda'm wa'y tyʌŋga'yaju tza'pit o wa'y wyotzca'yatʌju juca inʌc pyi'quišajpa te' pu'mna.

²¹ Y como na'chaŋbʌ tiyʌte' inʌc nʌ tyujcu, nʌmu Moisés: Jene nʌ'ʌj na'tzu y hasta nʌ'ʌj sʌtʌjtu.

²² Yʌtij jeque Sioŋ-gumgu'yojmomijte' nʌ myaŋdamu. Te'wʌte' te' Diojsis quiumguy, te' tzajpojmopʌ Jerusalén, tu'mʌyajumʌy omapit jana ma'yaŋda'mbʌ angelesta'm.

²³ Y ñu'ctambamij ijtumʌy te' tu'mʌquiuy ijtyajumʌy winata'mbʌ wʌ'aŋja'moye. Teymʌ ja'yʌyaju ñʌy Diojsis libro'ojmo. Teymʌ ijtu te' Dios, quiʌme'tzpapʌ's mumu'iwʌ. Y teymʌ ijtyaju mumu pʌ'nis 'yespiritu Diojsis ñʌcma'yʌyajupʌ justota'mbʌ pʌnšej.

²⁴ Y teymʌ itque'tu Jesús, y ñe'cʌpit tujcu te' más oyepʌ trato. Y ñʌtʌjcʌyu ñe'cʌ's ñe' ñʌ'pin que más oye yajyojsu que ja'nde' Abe'lisñe'.

²⁵ Coquendamʌ cuenta wa'mis mato'ŋoyjaytyamu Dios nʌmij 'yoto'ŋʌytyamupʌ's. Te' ya'acta'mbʌ pʌ'nis jašunʌ quiʌmato'ŋʌya te' minu 'yaŋnʌctza'mʌyajupʌ's yʌy najsacopajcʌsi, te'cotoya Diojsis jatyo'ya'ŋʌya. ¿Jutzandʌ maŋba to'ya'ŋʌytyamu juca ja'ndʌ ŋgʌmato'ŋʌy te' tzajpojmo ijtupʌ'stʌ nʌ aŋnʌctza'mʌyušej?

²⁶ Te' Sinaicʌsi otoŋu'c Dios, hasta mi'csu te' nas. Pero yʌtij nʌ ñʌmu: Ja'nʌs na' nastij maŋu nyajmi'csu, maŋba'ʌs nyajmi'csque'tu te' tzap.

²⁷ Nʌmu'c: Maŋba'ʌs nyajmi'csu, sunbate' ñʌmu que maŋba yajʌcʌ'pʌ'u mumu tʌ ŋgueñajpapʌ tiyʌ wa'y chʌ'yu ja'ndʌ ŋgueñapyʌ tiyʌ.

²⁸ Tʌta'm mbʌjcʌchoŋdamwa'ndʌ te' lugar ja'na yayepʌ aŋgui'mbamʌy Dios. Te'cotoya pyʌcpa wa'ytyʌ nʌjaytyamu yʌscotoya, y wa'ytyʌ tumʌtzocoy nyosjaytyamu, wa'ytyʌ na'tzu y ŋgʌna'tzʌyu, te'šejtʌ wa'y nyajtzocopyactamu Dios.

²⁹ Porque tʌta'm Dios jucʌtʌcšejpʌte', pyoŋbʌ'papʌ's mumu ja'n 'yoyeta'mbʌ tiyʌ.