Hebreos 11 - Zoque Copainalá New Testament

Wʌ'aŋja'moyajupʌ pʌnda'm

¹ Juca tumʌtzocoytyʌ nijamba que maŋbatʌ mbʌjcʌchoŋdamu te' njo'cpapʌ tiyʌtʌ, wiyuŋšejpʌ wʌ'aŋja'moquiuytyʌ nʌ'ittamu. Y nwʌ'aŋjamdambatʌ que te' ja'nmajtʌ nʌ ŋguendamupʌ tiyʌ wiyuŋšejta'mbʌte'.

² Wyʌcocojtyaju Diojsis te' ya'acta'mbʌ pʌn porque te'šej wʌ'aŋja'moyaju.

³ Nwʌ'aŋjambatʌ Dios, te'cotoya mustambatʌ que Diojsis chʌjcu mumutiyʌ ñe' chamepit. Y chʌjcu te' ŋguendambapʌ tiyʌtʌ te' ja'ndʌ ŋguendamepʌ tiyʌpit.

⁴ Wyʌ'aŋjamu Abe'lis te' Dios, te'cotoya pyʌjcʌchoŋjayu Diojsis te' chi'oquia'upʌ copʌn, pero japyʌjcʌchoŋja Cai'ŋis chi'oquia'upʌ tiyʌ. Te'cotoya ñʌcma'yʌyu Diojsis te' Abel justopʌ pʌnšej pyʌjcʌchoŋjayu'c chi'oquiuy. Y ñempe ca'u que'naŋgʌschi'ʌpyatʌ wyʌ'aŋjamguy.

⁵ Wyʌ'aŋjamu Enojquis te' Dios, te'cotoya ñʌmaŋu tzajpojmo wa'y jana quia'u. Y yajuta'a jaquieña porque ñʌmaŋu Diojsis. Pero maŋba'cmaj ñʌmaŋu wyʌcotzamba te' Totojaye's que yajtzocopyajcu Dios.

⁶ Pero ja'ndʌ musi nyajtzocopyajcu Dios juca ja'ndʌ nwʌ'aŋjame. Porque iwʌ's sunba 'yoto'ŋʌyu Dios ijtu pyena wa'y wyʌ'aŋjamu que ijtupʌte' Dios, y que ñe'cʌ's maŋba chi'yaju tzajpojmopʌ yajya'moquiuy.

⁷ Wyʌ'aŋjamu Noe'is te' Dios, te'cotoya na'tzipit chʌjcu te' mʌja barco, yajmujsu'c Diojsis te' maŋbamaj inʌc tyujcupʌ toya. Te'wo'mo cotzojcu fyamiliaji'ŋ. Te'šejpʌ wʌ'aŋjamgupyit yajqueju Noe'is que pyʌcpa wa'y yajnʌco'aŋgʌyaju te' jana wʌ'aŋja'moyeta'm. Y Diojsis ñʌcma'yʌyu justopʌšej wyʌ'aŋjamgupyit.

⁸ Wyʌ'aŋjamu Abraha'ŋis te' Dios, te'cotoya mato'ŋoyu quiʌ'weju'c wa'y myaŋu te' najsoyj chamdzi'umʌy Diojsis wa'y pyʌjcʌchoŋu. Y tzu'cumu, ni ja'n inʌc myusi jutʌte' inʌc myaŋu.

⁹ Wyʌ'aŋjamu jeque te' Dios, te'cotoya tiju itma'ŋaju witišej Diojsis chamdzi'upʌ najsojmo, y jaquiomʌ'yʌ ñe'šej te' nas. Y itma'ŋaju nacatʌjcojmo Isaacji'ŋ y Jacobji'ŋ. Te'ta'mbʌ's maŋba inʌc pyʌjcʌchoŋyaju Abrahaŋji'ŋ te' Diojsis chamdzi'upʌ tiyʌ.

¹⁰ Porque te' Abraha'ŋis nʌ inʌc jyo'cu tyumʌtzocoy te' maŋba itjojcʌtʌjcupʌ mʌja cumguy, Diojsis quipsaŋgospo'ʌyupʌ y chʌjcupʌ.

¹¹ Wyʌ'aŋjamu Sara's te' Dios, te'cotoya ñicoma'sa'nʌyu Diojsis wa'y chejcʌyu ñempe yajujche'c jaquiena une. Minu yajpʌ'naju 'yune cʌtʌjcu'ca 'yame wa'y ijtu 'yune. Te'šej tujcu porque wyʌ'aŋjamu que ja'n šutzi te' chamdzi'upʌ's.

¹² Te'šejtijque' Abrahán tzamupʌnda'nde' inʌc y ja'na inʌc 'yunetzi'oy. Pero minu ijtu 'yune aŋba'te jujcha' matza tzajpojmo ijtyajupʌ, y jujcha' wa'na ma'ra'acapoyo'mo itpapʌ, ja'ndʌ musi mayupʌ.

¹³ Mumu yʌ'ta'mbʌ's hasta que ca'yaju jachaquia yʌ'šejpʌ wʌ'aŋja'moquiuy ñempe japyʌjcʌchoŋya'cmaj Diojsis chamdzi'yajupʌ tiyʌ. Na' ya'amyʌctij 'yocnʌque'nʌyaju, pero wyʌ'aŋjamyaju y ñijamyaju que wiyuŋbʌ tiyʌte'. Y nʌmyaju que minutijte' wyingʌtʌquiaju yʌy najsacopajcʌsi.

¹⁴ Porque te' nʌmyajpapʌ yʌ'šej yajnʌctʌ'yajpatʌ oye que nʌ mye'chaju eyaco nas maŋbamʌ'ya itjojcʌtʌquiaju.

¹⁵ Juca tumʌtzocoy nʌ inʌc quipšaju te' tzu'cumyajupʌ najsoyj muspa inʌc wyitu'yaju.

¹⁶ Pero quiʌñʌñajpa inʌc más oyepʌ, sunbate' ñʌmu, te' tzajpojmopʌ. Te'cotoya Dios ja'n cha'ay wa'y ñʌmu, Ʌjte' te' ñe'ta'm Dios. Y ñimejcʌyjayajupa'nde' itcuy.

¹⁷ Wyʌ'aŋjamu Abraha'ŋis te' Dios, te'cotoya chʌjquisu'c Diojsis yʌ' Abraha'ŋis chi'oquia'u te' 'yune Isaac. Y jañʌje'ŋa wa'y yajca'u te' tʌŋdumʌpʌ 'yune, ñempe Diojsis winatij chamdzi'u tiyʌ'iwʌ.

¹⁸ Diojsis ñʌjayu'ctya'nde' winatij: Isaacpitmijte' maŋba ŋguiopucsu.

¹⁹ Abraha'ŋis wyʌ'aŋjamba inʌc que Diojsis muspa inʌc yajwinsa'u hasta ca'yajupʌ, y chi'oquia'u'c quipsu que ca'uwa'nde', pero quenbawa'a chi'witu'u.

²⁰ Wyʌ'aŋjamu Isaajquis te' Dios, te'cotoya ñicomasa'nʌyu te' Jacob y te' Esaú, y ñʌtzamyaju tiyʌta'm inʌc maŋba quiʌtʌcjayaju.

²¹ Wyʌ'aŋjamu Jacojpis te' Dios, te'cotoya, maŋba'ca quia'u, ñicomasa'nʌyjayaju metzapʌ 'yune Jose'isñe'. Y wa'y quiʌna'tzʌyu Dios mujcʌñe'cu quiuytyacuscʌsi.

²² Wyʌ'aŋjamu Jose'is te' Dios, te'cotoya, maŋba'ca quia'u, chamutya'a que maŋba inʌc chu'cumyaju Israel-pʌnda'm te' Egipto-najsojmo. Y ñitza'mʌyu pyac wa'y ñʌtzu'cumyajque'tu.

²³ Wyʌ'aŋjamyaju Dios te' Moisejsis tyata'sta'm, y jaña'cha te' re'yis quiojtupʌ aŋgui'mguy. Te'cotoya, pʌ'naju'c yʌ' Moisés, tuca'y poyaj quiʌwʌ'ñaju, uy yajca'u re'yis. Te'šej chʌquiaju porque quieñaju que sa'sapʌ unete' inʌc.

²⁴ Wyʌ'aŋjamu Moisejsis te' Dios, te'cotoya pʌnbujtu'ca jašunʌ wa'y ñʌjayaju, yʌ'wʌ Farao'ŋisyʌ' 'yoco'une.

²⁵ Más šunu wa'y tyoyapʌjcu Diojsis pyʌnji'ŋda'm, y ja'n wa'y uša'ŋ aŋsʌŋ ñʌtzi'ŋbʌ'u cowapa'tcuy.

²⁶ Porque más myʌja'ŋgomʌ'yu yʌ' Moisejsis wa'y quienu toya Cristocotoya que ja'nde' wa'y pyʌjcʌchoŋu Egipto'ojmopʌ rico'ajcuy. Quiojtu choco'yojmo wa'y wyʌ'aŋja'moyu hasta que pyʌjcʌchoŋba Diojsis chamdzi'oquia'upʌ tiyʌ.

²⁷ Wyʌ'aŋjamu jeque Dios, te'cotoya tzu'cumu Egipto-najsojmo, y jaña'tzʌ ñempe qui'šca'u te' rey. Maŋdzʌ'yu'c quio'ŋu Diojsis chamupʌ tiyʌ jujcha' nʌ quienupʌ's te' ja'ndʌ ŋguenepʌ Dios.

²⁸ Wyʌ'aŋjamu Moisejsis te' Dios, te'cotoya ñʌcʌtzo'tzu te' pascua-sʌŋ, y wa'y wya'csu te' puertata'm nʌ'pinbit. Te'šej chʌjcu wa'y jana yajca'yaju te' Israel-pʌ'nista'm wyin-uneta'm te' yajca'opyapʌ angelejsis maŋba'ca quiʌtʌjcu wa'y yajca'yaju Egipto-pʌ'nista'm wyin-uneta'm.

²⁹ Wyʌ'aŋjamyaju Israel-pʌ'nista'm te' Dios, te'cotoya quiotʌtzjaquiaju te' ñʌjayajpapʌ inʌc Tzapas Mar. Y te'šej sunu chʌquiajtʌ'ʌ Egipto-pʌ'nista'm, pero sucsca'pʌ'yaju.

³⁰ Wyʌ'aŋjamyaju Dios, te'cotoya ju'mbʌ'u Jerico-cumgu'yis ño'tze-we'que quiʌwitu'yaju'c cu'ya'y jama.

³¹ Wyʌ'aŋjamu Rahajpis te' Dios, te'cotoya, ñempe inʌc malejyomo, jayajca'ya te' jamyato'ŋoyapʌji'ŋda'm. Porque yʌ' yomo's pyʌjcʌchoŋyaju oye te' minu tyu'nišajupʌ's te' nas.

³² ¿Jutza'mʌs nyajcoputtʌ'pa? Pʌmicʌtʌcpa aŋsʌŋ y ja'nʌs ŋgʌpa'te jutzʌs wa'y ndzamyajque'tu te' Gedeón, Barac, Sansón, Jefté y te' David, y te'šejtijque' Samuel y te' tza'maŋwa'oyeta'm.

³³ Yʌ'ta'mbʌ's wyʌ'aŋjamyaju Dios, te'cotoya quipcupyit ñʌwʌ'ajyaju aŋgui'mʌtʌjcuy, y aŋgui'moyaju jicapyʌ aŋgui'mʌtʌjcupyit. Pyʌjcʌchoŋyaju Diojsis chamdzi'oquiu'yajupʌ tiyʌ. Y como wyʌ'aŋjamyaju Dios, ñe'cʌ's quioquipyaju wa'y jana quiʌ'šaju tzapas ca'ŋista'm.

³⁴ Y te'šejtijque' yajcotzoquiaju Diojsis jucʌtʌjcomo ijtyaju'c, y sunu'c yajca'yatʌju espadapit. Hasta te' mochita'mbʌ paquipʌquiaju y ja'na inʌc ña'chay quipcu'yojmo, y myacpoyaju witi-soldadota'm.

³⁵ Ijtyaju inʌc yomo ca'yajupʌ's tyʌwʌ y pyʌjcʌchoŋwʌtzʌquiaju winsa'yajupa'a. Pero ijtyaju inʌc pʌn y yomota'm maya'aŋ nʌ tyoyapʌquiajupʌ y chamdzi'yatʌju wa'y chʌcʌpʌ'yatʌju, pero ñe'cʌ's jašuña ñempe toya'ojmo quia'ya inʌc. Te'šej chʌquiaju wa'y quiʌpa'tyaju más oyepʌ quenguy winsa'yaju'ca.

³⁶ Itque'tu wyinʌcnʌ'mnʌ'mwʌyatʌjupʌ, quiuñacšatʌjupʌ, y eyata'mbʌ wyajtyatʌju tʌ'ŋgupyit, y šomyatʌjupʌ preso'mo.

³⁷ Eyata'mbʌ tyʌŋga'yaju tza'pit, y ijtu jyaquiatʌjupʌ sierrapit, y tiyʌta'm chamdzi'yatʌju wa'ytyij chʌjquišatʌju, y ijtu espadapit yajca'yatʌjupʌ. Powyijtyaju yʌmʌc teymʌc y ñchowambe-naca y chiwu-nacatya' inʌc yamyajpa. Tyacsnijupyatʌju, jʌyu'c chaquiatʌju, y jene yacsnutzʌquiatʌju.

³⁸ Yʌmʌc teymʌc maŋu itma'ŋajyaju ja'itʌnʌmʌmʌy, cotzʌjcʌsita'm, tza'tʌjcojmo y tza'acʌ'mʌytya'a. Yʌ'šejta'mbʌ pʌn ja'n inʌc myerecetzʌquiay najsacopac pʌ'nista'm.

³⁹ Mumu yʌ'ta'mbʌ's wyʌ'aŋjamyaju tumʌtzocoy Dios. Y ñempe te' Totojaye's wyʌcotzamyajpa japyʌjcʌchoŋya te' Diojsis chamdzi'yajupʌ tiyʌ.

⁴⁰ Quipsu Diojsis que más oye tʌcotoyata'm wa'ytyʌ tumʌ'ajcu'yoyj ŋgota'nbʌ'tamu ñe'cʌji'ŋda'm, y ja'n na' ñe'cʌta'mdij quiʌ'wingʌ'y.