Hebreos 10 - Zoque Copainalá New Testament

¹ Ʌwyo'mošejtijte' yajnʌctʌ'yoyu te'šejta'mbʌ aŋgui'mgu'yis te' maŋba inʌc miñajupʌ tiyʌ oyeta'mbʌ tʌcotoyata'm. Y ja'ndʌ inʌc yajnʌctʌ'i te' wiyuŋšejta'mbʌ tiyʌ. Te'cotoya te' aŋgui'mgu'yis ja'n inʌc musi yajcota'nu te' quiʌna'tzʌyjojcʌtʌquiajpapʌ's inʌc Dios tumdumʌ ame copʌn-yajca'oquiupyit.

² Juca inʌc muspa yajcota'njayaju chocoy te'šejta'mbʌ tiyʌ's, ja'ndiya' inʌc pyena wa'y te'šej quiʌna'tzʌyjojcʌtʌquiaju. Tumnacatij inʌc cʌna'tzʌ'oyajpa, y cowajyajpa inʌc chocoy. Ja'na inʌc ñi'aŋba'tyay wyin cowapit.

³ Pero yʌ' copʌn-yajca'oquiupyit jyamwʌtzʌquiajpa inʌc quiowa tumdumʌ ame.

⁴ Porque te' toro-nʌ'pi'nis y chiwu-nʌ'pi'nis ja'n musi yajʌcʌ'jayu pʌ'nista'm quiowa.

⁵ Te'cotoya minu'c Cristo najsacopajcʌsi, ñʌjayu Tyata Dios: Copʌn-nʌ'pin ni tiyʌjanatiyʌ tzi'oquiuy jašunʌmis. Pero nimejcʌyjayumis ʌs ŋgüerpo.

⁶ Jayajtzocopyacʌmij poŋbʌ'yajupʌ copʌ'nis ni copʌn-nʌ'pi'nis wa'y quioyojyaju pʌ'nista'm quiowa.

⁷ Pijche'cʌj nʌmu: Tata Dios, yʌ'yʌj minu ʌj wa'yʌs ndzʌjcu mis sunbašej, Ja'yʌyajuše' ʌj misne' libro'ojmo.

⁸ Wina nʌmu: Jašunʌmis copʌn-nʌ'pin, ni tzi'oquiuytya'm, ni poŋbʌ'yajupʌ copʌn, ni te'šejta'mbʌ tiyʌ wa'y quioyojyaju quiowa. Yʌ'šejta'mbʌ tiyʌ ñʌ'aŋguejyajpa inʌc te' aŋgui'mgu'yis chambašej.

⁹ Pijche'ca nʌmu: Tata Dios, yʌ'yʌj minu wa'yʌs ndzʌjcu mis sunbašej. Nʌmu'c te'šej yajqueju que yajʌcʌ'u te'šejta'mbʌ aŋgui'mguy wa'y tyʌjcʌyu ñe'cʌ wa'y chʌjcu Diojsis šunbašej.

¹⁰ Y tujcu yʌ' yʌ'šej šunbašej Diojsis porque tumnacatij chi'oquia'u Jesucristo's te' wyin y ca'u wa'ytyʌ yajmasa'najtamu.

¹¹ Wiyuŋšej mumuta'mbʌ sacerdote's tumdumʌ jama inʌc yosjayajpa Dios wa'y ñʌ'aŋguejyaju copʌn-nʌ'pin ja'n musi yajʌcʌ'jayupʌ's pʌ'nista'm quiowa.

¹² Pero Cristo's tumnacatij 'yumbʌ'u ñʌ'pin wa'y yajʌcʌ'jayu tʌta'm ŋgowa, y maŋu pyocspajcu Diojsis chʌ'na'ŋoyj nimeque'ctijpʌ mʌja'ŋajcu'yojmo.

¹³ Teymʌ nʌ jyo'cu hasta que Diojsis yajmaŋgopajcʌpyʌ'yajpa'cše'ŋoyj te' qui'nišajpapʌ's.

¹⁴ Pero ñe'cʌ's tumnacatij chi'oquia'u wyin wa'y yajcota'ñaju mumu jamacotoya te' ñe'cʌ's yajmasa'najyajupʌ.

¹⁵ Te' Espíritu Santo'stʌ yajmuspa que wiyuŋbʌ tiyʌte' wina chamu'c:

¹⁶ Yʌ'wʌte' te' trato maŋba'ʌs ndzʌjcupʌ Israel-pʌnji'ŋda'm Cʌtʌjcu'ca ʌ'ta'mbʌ jama, nʌmba tʌ Ngomi, Maŋba'ʌs nyajnʌctʌ'yaju choco'yojmo ʌsne' aŋgui'mguy. Maŋba'ʌs ŋgotjayaju quipsoquiu'yojmo wa'y tey chʌ'yu ja'yʌyupʌ tiyʌšej.

¹⁷ Y nʌ'ma'ŋʌyu: Y yajujche'camʌs ja'n maŋu njamwʌtzʌcjayaju ni quiowa ni yacha'cuy.

¹⁸ Juca Diojsis yajcotocopya te'šej mumu pʌ'nista'm quiowa, ja'na pyʌqui wa'ytyʌ nʌ'aŋgueju tiyʌ'iwʌ wa'ytyʌ ŋgoyoju ŋgowa.

Ngʌnu'cʌytya'mitʌy Dios

¹⁹ Te'cotoya atzita'm, como 'yumbʌ'u ñʌ'pin Jesucristo's tʌcotoyata'm jana na'chuy muspatʌ ndʌjcʌytyamu te' Más Masanbʌ Luga'rojmo.

²⁰ Muspatʌ ndʌjcʌytyamu tey porque ñe'cʌ'ste' wyina'aŋwaju tʌjcʌquiuy. Te'šej chʌjcu ca'u'c tʌcotoyata'm wa'ytyʌ tzi'tamu quenguy.

²¹ Y yʌtij ittamutʌ mʌja'ŋbʌ sacerdote quioquenbapʌ's Diojsis 'yuneta'm.

²² Ngʌnu'cʌytya'mitʌy Dios wa'ytyʌ oto'ŋʌyu tumʌtzocoy, wiyuŋšejpʌ wʌ'aŋjamgupyit, cowajupʌ ndzocopyit, nyajʌcʌ'jayu'c yatzipʌ tʌ ŋguipsoquiuy, y ŋgotze'u'candʌ ŋgüerpo susnʌpʌ nʌ'pit.

²³ Uytyʌ metzatzoco'yajtamu sino que tumʌtzocoytyʌ nwʌ'aŋjamda'mi, porque nʌtʌ njo'ctamu Dios. Porque tiyʌtʌ ñe'cʌ's tzamdzi'u maŋbapʌte' chʌjcu.

²⁴ Uytyʌ najyambʌ'ʌtʌjtamu wa'ytyʌ ŋgue'naŋgʌschi'ʌytyamu ndʌwʌ wa'y našunʌtʌjyaju ñe'co'mo, y wa'y chʌquiaju oyeta'mbʌ tzʌqui.

²⁵ Maŋda'mitʌy tu'mʌquiu'yojmo wa'ytyʌ ŋgue'naŋgʌschi'ʌyaju ndʌwʌta'm wa'y myaŋyajque'tu ñe'cʌ. Uytyʌ ndzʌctamu eyata'mbʌ's chʌquiajpašej ja'na tyijyapyʌ. Juca nʌ tyo'mʌyu te' aŋsʌŋ wa'y minu tʌ Ngomi, más pyʌcpa wa'ytyʌ na'yaŋnʌctza'mʌtʌjtamu.

²⁶ Juca nimequetʌ ne'cʌ cowapa'tjojcʌtʌcpa nʌctʌ'yu'candʌ y mbʌjcʌchoŋu'candʌ te' wiyuŋbʌ tiyʌ, ja'ndiya'a eyapʌ nʌ'pin tiyʌ'stʌ wa'y cocoyoju.

²⁷ Na'chaŋdʌ njo'ctamba tiyʌ jama maŋba'candʌ cʌme'tztamu Diojsis. Y jujche'ŋ pʌn tʌ'ojmota'mbʌ's qui'nišajpa Dios, ju'ŋupapʌ jucʌtʌjcojmotʌ maŋba yajtamu.

²⁸ Iwʌ's inʌc myaŋgocʌtʌcpa Moisejsis 'yaŋgui'mguy y metza o tuca'pyʌ pʌn minba inʌc ñʌmyaju que wiyuŋšejte', yajca'yajpa inʌc pʌ'nista'm y ja'n inʌc tyo'ya'ŋʌyay.

²⁹ Más na'chaŋ maŋba quio'aŋgʌyaju te' ja'n myato'ŋoyjayapyʌ's te' Diojsis 'Yune, y myaŋgocʌtʌcpa te' trato chʌjcupʌ Jesujsis ñe' ñʌ'pinbit. Yʌ'wʌ's yajmasa'najtʌ'u, pero jyojtʌjcʌyu te' Espíritu Santo tzi'papʌ'stʌ yajya'moquiuy.

³⁰ Mustambatʌ que tʌ Ngomi nʌmu: Ʌste' maŋba nyajnʌco'aŋgʌyaju wa'yʌs ndzi'yaju quioyowa pyʌcpašej, nʌmba tʌ Ngomi. Y emʌ nʌmgue'tpa que maŋba quiʌme'tzu te' pyʌnda'm tʌ Ngomi's.

³¹ Na'chaŋbʌ tiyʌte' juca te'šejpʌ cowatʌ nʌ'aŋguejpa quenjojcʌtʌcpapʌ Diojsis wyi'naŋdʌjqui.

³² Pero jamwʌtzʌctamʌ te' cʌtʌquiajupʌ jamata'm nu'cu'cmajte' sʌ'ŋgʌ' mista'm ndzoco'yojmo. Mbyetewitu'tamumij wa'mij mbʌ'mgopajcʌytyamu toyapʌjcuy.

³³ Wiyuŋšej ijtu mi'ojmota'm wyinʌcnʌ'mnʌ'mwʌyatʌjupʌ y yacsnutzʌquiatʌjupʌ wʌwʌ pʌ'nis wyi'naŋdʌjqui. Y ijtyajque'tu mi'ojmota'm tʌjcʌyajupʌ wa'mij ŋguiotzowatʌjtamu mista'm ndoyapʌjcu'yojmo.

³⁴ Mista'm ndo'ya'ŋʌytyamumis te' šomyatʌjupʌ preso'mo. Jambyʌcjaytyamʌmis maya'cuy sino que nʌ'omdamumis ñempemij ñinu'mʌtʌjtamu. Porque mustambamis que maŋbamis mbʌjcʌchoŋdamu tzajpojmo más oyeta'mbʌ tiyʌ ja'n yayepʌ.

³⁵ Te'cotoya jeque uy tzocomyocha'tame. Quipstʌjwʌytyamʌ Diojsismij maŋba ñchi'tamupʌ tiyʌ.

³⁶ Pyʌcpa wa'mis mbʌ'mgopajcʌytyamu pacienciapit, y wa'mis ndzʌctamu tiyʌ šunba Diojsis wa'mis mbʌjcʌchoŋdamu ñe'cʌ'smij ñchamdzi'tamupʌ tiyʌ.

³⁷ Porque te' Totojaye nʌmba: Jʌ'nʌ'a minba te' maŋba minupʌ, Y ja'na maŋu ya'yu wa'y minu.

³⁸ Te' jyustococojtyajupʌ pʌ'na wyʌ'aŋjamgupyit maŋba pya'tu quenguy. Pero juca metzatzoco'yajpa, ja'nʌj maŋu yajtzocopyajcu.

³⁹ Pero tʌta'm, ja'ndʌyʌ' nde'šejta'mbʌ wa'ytyʌ metzatzoco'yajtamu tʌta'm ndocoquiuquiotoya. Pero tʌta'm nʌtʌ nwʌ'aŋjamdamu tʌ Ngomi wa'ytyʌ tzi'tamu quenguy.