Hebreos 1 - Zoque Copainalá New Testament

Oto'ŋʌytyamuwa'ndʌ Diojsis Ñe' 'Yunepit

¹ Cʌtʌquiajupʌ aŋsʌ'ŋojmo 'yoto'ŋʌyjayaju Diojsis tʌta'm ya'acta'mbʌ ndataj te' tza'maŋwa'oyajpapʌpit. 'Yoto'ŋʌyjayaju sone naca y wi'ni eyata'mbʌ tiyʌpit.

² Pero yʌ' ultimota'mbʌ aŋsʌ'ŋoyj oto'ŋʌytyamuwa'ndʌ Diojsis te' 'Yunepit. Y ñe'cʌpittijte'que' chʌjcu Diojsis mumutiyʌ y quiopiŋu wa'y ñe'cʌ's pyʌjcʌchoŋbʌ'u.

³ Yʌ' Diojsis 'Yune mʌja'ŋbʌyʌ' jujcha' Dios, y tzi'muŋba myʌja'ŋajcu'yojmo Diojsis myʌja'ŋajcupyit. Y Tyata Diojsis chocoy y itcuy ñʌ'itjayu. Y como mʌja'ŋbʌte', 'yaŋgui'mba ñe'cʌ's mumutiyʌ chamepit. Yajcowajayu'ca tʌta'm ndzocoy cowapit, pijche'c maŋu pyocspajcu tzajpojmo Diojsis chʌ'na'ŋoyj nimeque'ctijpʌ mʌja'ŋajcu'yojmo.

Diojsis 'Yune maste' mʌja'ŋbʌ que ja'n angelesta'm

⁴ Más yajmʌja'ŋaju Diojsis yʌ'wʌ que ja'n angelesta'm, y yajcʌpa'tu más mʌja'ŋbʌ nʌy que ja'nde' angelesta'm.

⁵ Porque nijutipʌ angelesmaj jañʌjatyʌ'ʌ Diojsis yajtya' tumnaca: Mijte' te' ʌs Une, Išo'yʌs nyajquejpa que mijte' te' ʌs Une. Ni jachamʌ nijutipʌ ángeles wa'y ñʌmu: Ʌjte' te' Tyataj, Ne'cʌ ʌste' Une.

⁶ Pero quiʌ'weju'c Diojsis te' mʌja'ŋbʌ 'Yune yʌy najsacopajcʌsi nʌmu: Pyʌcpa wa'y quiujnayjayaju ʌs Une mumu angelejsista'm.

⁷ Wiyuŋšej yʌ'šej chamu Diojsis te' angelesta'm: Nyajmiñajpa'ʌs ʌs angelesta'm jujcha' sawa, Y jene ʌs maŋba mbʌmitzi'yaju wa'yʌj yosjayaju te' yosjayajpapʌ'sʌj.

⁸ Pero chamu'c te' 'Yune, nʌmu: Mijte' te' Dios, y mi'ande' maŋba 'yaŋgui'mjojcʌtʌjcu. Y maŋbamij 'yaŋgui'moyu misne' jicapyʌ aŋgui'mʌtʌjcupyit.

⁹ Sunbamis te' wiyuŋbʌ tiyʌ, y ŋgui'nisbamis te' yacha'cuy. Te'cotoya ʌs, misne' Diojsis, nya'omdzocopyajcu'ʌsmij más que ja'nde' eyata'mbʌ pʌn.

¹⁰ Y chamgue'tu Diojsis te' 'Yune emʌ, nʌmu'c: Señor, tzo'tzcu'yojmomiste' ndzʌjcu te' najsacopac. Y misne' ŋgʌ'pit ndzʌjcumis mumutiyʌ ijtyajupʌ tzajpojmo.

¹¹ Te'ta'mbʌ yajyajpapʌ tiyʌte', pero mij, itjojcʌtʌcpamij. Mumu te'ta'mbʌ maŋba pyeca'yaju jujcha' pama-meque.

¹² Maŋbamis ŋguetejʌcʌ'u te'ta'mbʌ jujcha' pama, te'šejmis maŋba ŋgacpʌ'u, Pero ne'cʌ itʌmʌytyijmij maŋba ijtu, Y ja'nmij ñchamupʌ'nay yajujche'c.

¹³ Pero nijutipʌ angelesmaj jañʌjatyʌ'ʌ Diojsis yajtya' tumnaca: Pocsa yʌy ʌs ndzʌ'na'ŋoyj mʌja'ŋajcu'yojmo, Nyajmaŋgopajcʌyajpa'cše'ŋo'yʌsmij te' ŋgui'nišajpapʌ'smij.

¹⁴ Nijutipʌ jañʌjaya te'šej porque te' angelesta'm espirituta'mdijte'. Te'ta'mbʌ quiʌ'wejyatʌjpa Diojsis wa'y quiotzoŋyaju pʌn hasta que cotzojcoctuquiajpa.