Gálatas 6 - Zoque Copainalá New Testament

Naquiotzowatʌjtamʌ ne'co'mo

¹ Atzita'm, juca iwʌjutiwʌ mi'ojmota'mbʌ cowapa'tpa ja'n tiyʌ nʌ ñijamu'c, como mijta'm ŋguiotzoŋdamba'mij Diojsis 'Yespiritu's, pyʌcpa wa'mis ndzamnʌctʌ'ytyamu yumijpʌ tzocopyit wa'y pyiŋwʌtzʌjcu wyin. Y iwʌ's maŋba 'yoto'ŋʌyu yajcoquena cuenta uy ñʌcpʌjcʌquie'tu ñe'cʌ te' oc'isoye's.

² Naquiotzowatʌjtamʌ ne'co'mo ŋguendamba'cmis iwʌjutiwʌ atzi nʌ pyetewijtupʌ. Te'šej ŋgojamdambamis te' aŋgui'mušejtʌ Cristo's.

³ Juca iwʌ's quiomʌ'pya que mʌja'ŋbʌ pʌnde', y que ja'nde' te'šejpʌ, ñe'cʌtij 'yaŋgoma'cʌpya wyin.

⁴ Te'šej jeque pyʌcpa tumduma'ŋbʌ'nis wa'y quiʌme'tzu wyin jutz tu'ŋajpa. Y juca putpa oye maŋba 'yomdzocopyajcu ñe' chʌquipit y ja'n eyapʌ's chʌquipit.

⁵ Porque tumduma'ŋbʌ'nis ñe'cʌte' maŋba ñʌ'aŋgueju tiyʌta'm chʌjcu.

⁶ Iwʌ 'yaŋmayajwa'a te' Diojsis chamepit, pyʌcpa wa'y ñʌwe'nu jujche'ŋ ñʌ'ijtupʌ te' ñe' 'yoyepʌ aŋma'yoye.

⁷ Uy aŋgoma'cʌytyame ne' nwin. Dios ja'ndʌ musi ŋgʌsijcʌyu. Porque tiyʌ ñipcotpa pʌ'nis te'wʌtij pyʌjque'tpa jʌsa'ca.

⁸ Iwʌ's chʌcpa ñe' yatzipʌ wyi'nis šunbašej, tyocoquiuytye' nʌ ñimejcʌyu te'šejpʌ wyi'nis chʌquipit. Pero iwʌ's chʌcpa te' Espíritu Santo's šunbašej maŋba pyʌjcʌchoŋu ja'n yayepʌ quenguy te' Espiritupit.

⁹ Te'cotoya uytyʌ ndzocomyocha'tamu, sino que ndzʌcta'mitʌy oyeta'mbʌ tiyʌ, porque nu'cpa'cande' te' aŋsʌŋ maŋbatʌ mbʌjcʌchoŋdamu te' ja'n yayepʌ quenguy juca ja'ndʌ ndzocomyocha'tame.

¹⁰ Te'šej jeque, mientrastʌ quendambamaj ndzʌcta'mitʌy oyeta'mbʌ tiyʌ mumu'iwʌcotoya, nimeque'ctij te' wʌ'aŋja'moyajpapʌcotoya.

Ultimota'mbʌ dyujchi'oquiuy y tiyʌta'm wa'y myujšajutya'a

¹¹ Quendamʌ jutzʌsmij mbʌyʌjtya'mbʌ letrapit nʌ njayjaytyamba ne' ŋgʌ'pit.

¹² Te' 'yaŋgui'myajpapʌ'smij wa'mij šircuncidatzʌctamu, šuñajpa wa'mis ndzʌctamu te'šej wa'ytyij chʌ'yaju oye pʌ'nista'm wyi'naŋdʌjqui. Te'šej chʌquiajpa wa'ytyij jana yacsnutzʌquiatʌju ñempe wyʌ'aŋjamyajpa que Cristo ca'u cruzcʌsi.

¹³ Porque te'ta'mbʌ comequete' circuncidatzʌquiajpa, ni ñe'cʌ'sta'm ja'n quiojamyay te' aŋgui'mguy. Pero šuñajpa wa'mij šircuncidatzʌctamu wa'y quieju que aŋgui'moyeta'mde' porque yajcircuncidatzʌcʌtʌjtambamij.

¹⁴ Pero ʌs nunca'ʌs ja'n aŋgui'moyešej ndzʌqui nwin, sino que nwi'naŋgotpa'ʌs que tʌta'm Ngomi Jesucristo ca'u cruzcʌsi. Porque ñe'cʌpit ca'uwʌše'ʌs ndzʌcpa nwin u'yʌs aŋsunu najsacopajcʌsita'mbʌ tiyʌ, y yajupʌ tiyʌšejte' te' najsacopajcʌsita'mbʌ tiyʌ ʌs nwi'naŋdʌjqui.

¹⁵ Porque nwʌ'aŋjamdamba'candʌ Jesucristo, juca circuncidatzʌctamutʌ o jašircuncidatzʌctamʌtʌ, ja'n tiyʌ chʌqui. Pero Cristo's šunba jomecotzʌjcupʌ tzocoy.

¹⁶ Y mumu te' tu'ŋajyajpapʌ yʌ' aŋma'yoquiu'yojmo sunba'ʌs wa'mij ñchi'tamu sʌ'mnaquiuy y wa'mij ñdyo'ya'ŋʌytyamu Diojsis. Sunba'ʌjte' nʌmu wa'mij ñchi'tamu te'šej jujche'ŋmis nwʌ'aŋjamdamba Dios, y mijta'mde' te' wiyuŋšejpʌ Israel-pʌnda'm Diojsisñe'.

¹⁷ U'ya'mʌj ya'iwʌ's yajquenu toya porque yʌ' conacsa'ŋis ʌs ŋgüerpocʌsi ijtyajupʌ yajquejpa que Ngomi Jesujsisʌjyʌ' quioyosa.

¹⁸ Atzita'm, tʌ Ngomi Jesucristo'smij yajtzi'tamʌ yajya'moquiuy mista'm ndzoco'yojmo. Amén.