Gálatas 5 - Zoque Copainalá New Testament

Pyʌcpa wa'ytyʌ librepʌ pʌŋšej ittamu

¹ Cristo'stʌ tzʌcʌpʌ'tamu u'yandʌ ndzʌ'ytyamu coyospawʌšej. Paquic ittamʌ tzʌcʌpʌ'uwʌšej, y u'yamis presošej ŋgotwʌtzʌctamu nwin aŋgui'mguquiʌ'mʌ.

² Ʌj, Pablo's, yʌti'ʌsmij nʌ ndzamjaytyamu: Juca šircuncidatzʌctambamij, yajtiyʌ mis ja'n maŋu nʌwʌ'ajtamu Cristopit.

³ Y ndzamgue'tpa'ʌs yʌ'šej: Mumu'iwʌ circuncidatzʌcpa tiene que wa'y quiojambʌ'u mumu te' aŋgui'mguy.

⁴ Juca sunbamis njustococottamu nwin te' aŋgui'mgupyit ja'ndiyʌ Cristo mista'm ndzoco'yojmo. Te'šej ja'nmis nʌ nwʌ'aŋjamdamu que Diojsismij maŋba nyajcotocoytyamu ñe' yajya'moquiupyit.

⁵ Pero te' Espiritu'stʌ cotzoŋdamba tʌta'm wa'ytyʌ njo'ctamu que Diojsistʌ maŋba justococottamu nwʌ'aŋjamgupyit.

⁶ Porque nwʌ'aŋjamdamba'candʌ Jesucristo, juca circuncidatzʌctamutʌ o jašircuncidatzʌctamʌtʌ, ja'n tiyʌ chʌqui. Pero ijtu pyena wa'ytyʌ nwʌ'aŋja'moytyamu y wʌ'aŋja'moquiupyit wa'ytyʌ našunʌtʌjtamu.

⁷ Sa'satijmiste' inʌc nʌ nʌtu'ŋajtamu nwʌ'aŋjamguy. ¿Iwʌ'sayʌ' nyajwinductamu wa'mis jana mato'ŋoyjaytyamu?

⁸ Ja'nde' Diojsis te' nyajwindujcupʌ'smij, porque ñe'cʌ'smij wina nwyejtamu.

⁹ Con tuma'ŋbʌn tzʌctoco'yopya, maŋba chʌctocopyʌ'yaju mumuta'mbʌ.

¹⁰ Ʌs nijamdamba'ʌsmij tʌ Ngomipit, que ja'nmij eya maŋu nwyʌ'aŋja'moytyamu. Pero iwʌ'smij nʌ ñchʌcjopi'ttamu maŋbapʌte' quio'aŋgʌyu iwa'ʌtij.

¹¹ Atzita'm, juca inʌjcʌs ndzamgopuŋbamaj que pyʌcpapʌte' wa'y šircuncidatzʌquiaju pʌnda'm, ja'nʌj inʌc yacsnutzʌquiay judio'sta'm. Juca inʌjcʌs te'šej nʌ ndzʌjcu, ja'ʌs inʌc nʌ ndzamgopuŋu que Cristo ca'u cruzcʌsi. Y te'šej ja'ʌs inʌc nyajnepcʌschʌmyay ya'iwʌ.

¹² Te' nʌmij ñchʌcjopi'tʌtʌjtamupʌ's oye inʌc wa'y šaŋgojaquia'utya' inʌc wyin.

¹³ Porque mijta'm, atzita'm, ñchʌcʌpʌ'tamumij y nwyejtamumij Diojsis, pero jañchʌcʌpʌ'tamʌmij wa'mis ndzʌctamu mis yatzipʌ nwi'nis šunbašej. Pero našunʌtʌjtamʌ y naquiotzowatʌjtamʌ ne'co'mo.

¹⁴ Porque mumu te' aŋgui'mguy ŋgojamdambamis juca ndzʌctambamis chambašej yʌ' aŋgui'mgu'yis: Sunʌ ndʌwʌ jujcha' mis sunbašej ne' nwin.

¹⁵ Pero juca ŋguiptambamij y ñaqui'nisʌtʌjtambamij coquendamʌ cuenta umij ñayayʌtʌjtamu.

Tiyʌta'm šunba pʌ'nis y tiyʌta'm šunba Espíritu Santo's

¹⁶ Nʌmba jeque'ʌj: Tu'ŋajtamʌ Espíritu Santopit wa'mis jana ndzʌctamu mista'm yatzipʌ nwi'nis šunbašej.

¹⁷ Porque tʌta'm yatzipʌ nwi'nis šu'noquiu'yis ñʌquijpa te' Espíritu, y te' Espiritu's ñʌquijpa tʌta'm yatzipʌ nwin. Yʌ'ta'mbʌ myejtzji'ŋ quipyajpa tʌta'm ndzoco'yojmo wa'ytyʌ jana ndzʌctamu tiyʌtʌ ne'cʌ sunba ndzʌctamu.

¹⁸ Pero juca te' Espiritu'smij ñʌtu'ŋajtamba, ja'namij ittame aŋgui'mguquiʌ'mʌ.

¹⁹ Y mustambatʌ tiyʌ chʌcpa te' pʌ'nis te' yatzipʌ wyi'nis šu'noquiupyit: Cʌtzʌjcʌ'opya, ispʌquitzʌcpa, y mʌjša'ŋda'mbʌ y tocoquiuytya'mbʌ tiyʌ chʌcpa.

²⁰ Wyʌ'aŋjamyajpa comichʌquita'm, chʌquiajpa brujo'ajcuy, naqui'nisʌtʌjyajpa, ñʌcʌpo'yajpa quipcuy, naquiʌjowatʌjyajpa, mawʌqui'šca'yajpa, na' ñe' 'yoye'ajcuy mye'chajpa, y yajquipswe'noyajpa.

²¹ Ñi'aŋsu'noyajpa, yajca'oyajpa, no'tyajpa, na' cu'tcuy quipšajpa, y mumu te'šejta'mbʌ tiyʌ chʌquiajpa. Ndzamjaytyamwa'mʌsmij y nʌwa'mʌsmij ndzamjaytyaŋgue'tu que iwʌ's chʌquiajpa te'šejta'mbʌ tiyʌ ja'n maŋu pyʌjcʌchoŋyaju yajtiyʌ te' aŋgui'mbamʌy Dios.

²² Pero te' Espíritu Santopit našunʌtʌjtambatʌ, oma'oma y sʌ'mnayu'ctʌ ittamba. Nʌmaŋjayajpatʌ paciencia ndʌwʌ, itpatʌ wʌpʌ-pʌ'najcuy, to'ya'ŋʌ'oquiuy y ñempetiyʌcʌsitʌ nijamʌtʌjtamba.

²³ Yajyumi'ajpatʌ, y cotzoŋbatʌ wa'ytyʌ njʌ'ctzʌ'ytyamu nwin. Y te' aŋgui'mgu'yis ja'n yajwinduqui yʌ'šejta'mbʌ tiyʌ.

²⁴ Porque jujche'ŋ Cristo'sañe'ta'm, mya'mʌyajwa'a cruzcʌsi te' yatzipʌ wyin y te' ja'n 'yoyeta'mbʌ šu'noquiuy.

²⁵ Como te' Espiritu'stʌ nʌ tzi'tamu quenguy, tu'ŋajta'mitʌy šunbašej te' Espiritu's.

²⁶ Uytyʌ mʌja'ŋdzʌctamu nwin wa'ytyʌ jana nachʌjqui'šca'ʌtʌjtamu ni uytyʌ nañi'aŋsunʌtʌjtamu ne'co'mota'm.