Gálatas 4 - Zoque Copainalá New Testament

¹ Pero nʌmgue'tpa'ʌj que te' une, maŋbapʌ's ñʌtzʌ'yjayu tyata's itʌpa'tcuy, nʌ'cmaj myʌja'u coyosašej 'yaŋgui'mdochʌquiajpa, ñempe ñe'cʌte' te' itʌpa'tcu'yis quiomi.

² Pero eyata'mbʌ's quioqueñajpa y 'yaŋgui'myajpa tyiyʌjanatiyʌcʌsita'm hasta que nu'cpa te' aŋsʌŋ chamušej te' tyata's.

³ Te'šejtijque' tʌta'm, ja'nmajtʌ nʌctʌ'i'c inʌc, coyosašejtʌte' inʌc 'yaŋgui'mguquiʌ'mʌ.

⁴ Pero nu'cu'cande' jama yajpʌ'naju Diojsis te' 'Yune Jesús yʌy najsacopajcʌsi, y yomo's yajpʌ'naju. Y ijtu inʌc pyena wa'y pyʌ'naju judio'sta'm 'yaŋgui'mguquiʌ'mʌ.

⁵ Te'šej minu pyʌ'naju wa'y chʌcʌpʌ'u te' aŋgui'mguquiʌ'mʌ ijtyajupʌ, y wa'ytyʌ 'yunešej pʌjcʌchoŋdamu Diojsis ñe'cʌpit.

⁶ Y como 'yuneta'm mij, Diojsis quiojtu te' 'Yune's 'Yespiritu mista'm ndzoco'yojmo, y te'wʌ's wyejwindzoŋba, y nʌmba: Abba, Tatay.

⁷ Te'šej jeque, ja'namijte' coyosata'm, sino que Diojsisamijyʌ' 'yuneta'm. Y como ñe'amijte' 'yuneta'm maŋbamij ñchi'tamu mbarte Cristopit.

Pablo's quio'uquia'yajpa wʌ'aŋja'moyeta'm

⁸ Winata'mbʌ tiempo'oyj, ja'nmajmis inʌc ispʌctame'c Dios, ŋgʌna'tzʌytyambamis inʌc te' chʌquichʌquita'mbʌ dios.

⁹ Pero yʌtij ispʌctambamis Dios, y Diojsismij ŋguio'ispʌctamba oye mijta'm. Y ¿tiyʌcotoya jeque ŋgʌwitu'ʌytyamba te' mochita'mbʌ aŋma'yoquiuy ja'ndʌ musipʌ's yajcotzojcu? ¿Tiyʌcotoya sunba wa'mij 'yaŋgui'mwʌtzʌctaŋgue'tu te'šejta'mbʌ tiyʌ's?

¹⁰ Ngojamdambamis nimequeta'mbʌ jama, y poyaj, y aŋsʌŋda'm, y ameta'm.

¹¹ Nʌcna'tzʌytyamba'ʌsmij uytya'mʌj comeque tzamgopu'ŋoyu mi'ojmota'm.

¹² Atzita'm, nwa'cjaytyamba'ʌsmij wa'mis ndzʌctamu ʌs ndzʌjcušej. Ja'na'mʌs ŋgojamjay te' mis sunba ŋgojamdambapʌ tiyʌ, sino que ndzacwa'mʌs. Yajtiyʌ mal misʌj jañchʌcjaytyamʌ.

¹³ Pero mustambamis que ndzamgopuŋjaytyamu'ʌsmij wina te' evangelio porque ca'e inʌc ʌs ŋgüerpo.

¹⁴ Y te' ʌs ŋga'cuy mbʌ'mgopajcʌyjaytyamumis, jamyenoschʌctamʌmisʌj, ni jañʌmdamʌmij: Yʌ'wʌ ca'epʌyʌ', sino que Diojsis 'yangelesšej misʌj mbʌjcʌchoŋdamu, y jujcha' Jesucristo.

¹⁵ ¿Nʌja njambʌ'tamu te' dichosopʌ tzocoy mis inʌc nʌ'ittamupʌ? Porque pijche'c hasta mista'm nwitʌm, juca inʌc mis muspa mbo'tzputtamu, ndzi'tamumisʌj inʌc.

¹⁶ ¿Y yʌtij nʌsʌ'ŋʌsmijte' ŋgui'nistamu mijta'm porque nʌ'ʌsmij ndzamjaytyamu wiyuŋbʌ tiyʌ?

¹⁷ Tey nʌ tyijyajupʌ pʌ'nista'm jene šunʌtʌjtambamij, pero ja'nde' oyepʌ su'noquiupyit, sino que šuñajpa wa'mistʌj ndzactamu y wa'mis ŋgo'ŋyaju ñe'cʌta'm.

¹⁸ Wiyuŋšej oye wa'ytyʌ ŋgotziŋya'yaju eyata'mbʌ pʌn pero wʌpʌ tiyʌcotoya. Yʌ'šej oye wa'mis ndzʌctamu ja'n na' te'yʌj ijtu'c miji'ŋda'm.

¹⁹ Tʌwʌy, toyapʌcpaše'ŋ yomo maŋbapʌ's ijtu 'yune, jʌpya'ʌj y toyapʌcpa'ʌj mijcotoyata'm, hasta que quejpa que ijtu Cristo's pyʌmi mista'm ndzoco'yojmo.

²⁰ Sunba inʌjcʌj tey ijtu yʌtij miji'ŋda'm sa'sa'ʌsmij wa'y oto'ŋʌytyamu, porque nʌ'ʌsmij nʌcna'tzʌytyamu.

Te' Sara y te' Agar

²¹ Tzamjaytyamʌ'ʌj jujche'ŋmij sunba ittamupʌ te' aŋgui'mguquiʌ'mʌ, ¿nʌctʌ'ytyambasʌ'ŋmis tiyʌ chamba te' aŋgui'mgu'yis?

²² Porque te' Totojaye's chamba que te' Abraha'ŋis tiju ijtu metza 'yune. Tumʌ yajpʌ'najupʌ te' quioyomo's, y te' eyapʌ yajpʌ'naju te' ñe' yomo's, te' ja'n inʌc coyomo.

²³ Pero te' coyomocʌsi pʌ'najupʌ, pʌ'niste' šu'noquiupyit pʌ'naju. Y te' ja'n inʌc coyomocʌsi pʌ'najupʌ, minu pyʌ'naju porque te'šej chamdzi'u Diojsis.

²⁴ Yʌ' metzata'mbʌ yomocʌsi chambʌjcu Diojsis te' metzapʌ trato. Te' Agar, te'wʌte' te' winapʌ trato chʌjcupʌ Diojsis Sinai-pu'mnacʌsi. Yʌ' tratocʌ'mʌ ijtyajpapʌ coyoscuy-ñuyu'ajyajpa.

²⁵ Porque Diojsis chambʌjcu yʌ' Agar jujcha' Sinai-pu'mna te' Arabia-najsojmo ijtupʌ. Y chambʌjque'tu te' ñʌjayajpapʌ Jerusalén. Te'wʌ y te' cumguy-itita'm mumu coyoscuy-ñuyu'ajyajpa.

²⁶ Pero te' ja'n quioyoma'epʌ yomocʌsi chambʌjcu Diojsis te' tzajpojmopʌ Jerusalén librepʌ. Te'wʌte' tʌ nanašej nʌ'ittamu yʌtij.

²⁷ Porque yʌ'šej ja'yʌyu Totojaye'ojmo: Omdzocopyacʌ, mij, mape-yomo, porque ja'itʌmajmis une, Omaweya porque ja'nmis musi jutz toya wa'y ijtu une. Porque más wʌwʌ maŋba ijtu mis une, mij, mape-yomo que ja'nde' te' tijupʌ's ñʌ'itjayu mis njayaj.

²⁸ Te'šej jeque, atzita'm, mumu tʌta m Diojsistʌyʌ' 'yuneta'm jujcha' Isaac, porque te'šej chamdzi'u Diojsis te' Abrahán.

²⁹ Pero te'ta'mbʌ tiempo'ojmo te' pʌ'najupʌ pʌ'nista'm šu'noquiupyit, te'wʌ's qui'nispa inʌc te' pʌ'najupʌ chamdzi'ušej Diojsis 'Yespiritu's. Te'šejtij chʌquiajque'tpa yʌtij.

³⁰ Pero yʌ'šej nʌmba te' Totojaye: Macputʌ te' coyomo 'yuneji'ŋ, porque te' coyomo's 'yune's ja'n maŋu pyʌjcʌchoŋu yajtiyʌ te' ja'n quioyoma'epʌ yomo's 'yuneji'ŋ.

³¹ Te'cotoya tʌ, atzita'm, ja'ndʌyʌ' coyospapʌ yomo's 'yuneta'm, sino que te' ja'n quioyosepʌ yomo'stʌyʌ' 'yuneta'm wʌ'aŋjamgupyit.