Gálatas 3 - Zoque Copainalá New Testament

Te' aŋgui'mguy o te' wʌ'aŋja'moquiuy

¹ Ay mijta'm, ŋgo'sawa Galacia-pʌnda'm. ¿Iwʌ'sayʌ' 'yaŋgoma'cʌytyamu wa'mis jana mato'ŋoyjaytyamu wiyuŋbʌ tiyʌ? Mista'm nwi'naŋdʌjqui ndza'maŋwaju'ʌs oye jutz mya'mʌyaju Jesucristo cruzcʌsi.

² Yʌ'wʌti'ʌs sunba wa'misʌj nyajmustamu: ¿Mbʌjcʌchoŋdamuja te' Espíritu Santo porque ŋgojamdamumis te' aŋgui'mguy, o porque matoŋdamumis te' evangelio y nwʌ'aŋjamdamumis?

³ ¿Ja'nmaja ñʌctʌ'yoytyame? Espíritu Santopitte' tzo'tzu mista'm nwʌ'aŋja'moquiuy. ¿Y yʌtij misja ne'ta'm mbʌmipit maŋba nyajcoputtamu?

⁴ ¿Ja'nsʌ'ŋmiste' comeque ŋguendamu toya soneta'mbʌ tiyʌcʌsi? Sunjo'pya'ʌs wa'mis tiyʌ'iwʌ nʌwʌ'ajtamu.

⁵ Diojsismij ñchi'tamba te' Espíritu Santo, y chʌcpa isaŋwʌ'ajcuy mi'ojmota'm. ¿Chʌcpasʌ'ŋ te'šej porque ŋgojamdambamis te' aŋgui'mguy, o porque matoŋdambamis te' evangelio y nwʌ'aŋjamdambamis?

⁶ Te' Totojaye nʌmba: Te'šej wyʌ'aŋjamu Abraha'ŋis te' Dios, y te'wʌcotoyate' ñʌcma'yʌyu Diojsis justopʌšej.

⁷ Te'cotoya mustamʌ que iwʌta'm wiyuŋšej wʌ'aŋja'moyajpa, yʌ'ta'mbʌte' te' Abraha'ŋis wiyuŋšejpʌ wyinboyata'm.

⁸ Chamba te' Totojaye's que Diojsis maŋba inʌc ñʌcma'yʌyoyaju justota'mbʌšej wʌ'aŋjamgupyit te' gentilta'm. Y maŋba'cmaj tyujcu, Diojsis chamjayu te' Abrahán yʌ' oyeta'mbʌ tiyʌ. Yʌ'šej ñʌjayu: Mijpit maŋba'ʌs nicomasa'nʌpyʌ'u te' naswindumʌta'mbʌ.

⁹ Jujcha' Abraha'aŋis wyʌ'aŋjamu Dios, y Diojsis ñicomasa'nʌyu, te'šej mumu wyʌ'aŋjamyajpapʌ's yʌ' Dios, maŋba ñicomasa'nʌyatʌju.

¹⁰ Jujche'ŋ ñite'tzʌyajpapʌ's que Diojsis maŋba jyustococojtyaju porque myato'ŋoyjayajpa te' aŋgui'mguy, tocoyajupa'nde' Diojsis wyi'naŋdʌjqui. Porque yʌ'šej chamba Totojaye's: Tocoyupa'nde' Diojsis wyi'naŋdʌjqui iwʌ'sta'mis ja'n chʌcjojcʌtʌquiay mumu jujche'ŋ ja'yʌyu aŋgui'mguy-libro'ojmo.

¹¹ Pero mustambatʌ que te' pʌn ja'n maŋu jyusto'aju Diojsis wyi'naŋdʌjqui porque quiojamu te' aŋgui'mguy, porque ja'yʌyupʌte': Te' jyustococojtyajupʌ pʌ'na wyʌ'aŋjamgupyit maŋba pya'tu quenguy.

¹² Muspatʌ ndzʌcme'tzu wa'ytyʌ ŋgojamu te' aŋgui'mguy ñempe ja'ndʌ nwʌ'aŋjamdamu Cristo, porque te' aŋgui'mguy nʌmba: Iwʌ's quiojamba te' aŋgui'mguy maŋba pya'tu quenguy porque te'wʌ quiojamba.

¹³ Porque ja'ndʌ musi ŋgojamdamu te' aŋgui'mguy, tocoyupa'ndʌte' inʌc Diojsis wyi'naŋdʌjqui. Pero Cristo'stʌ jupyuttamu tocoquiu'yojmoc, porque Diojsis ñʌcma'yʌyu Cristo tocoyupʌšej tʌcotoyata'm. Yʌ'šej ja'yʌyu Totojaye'ojmo: Tocoyupa'nde' iwʌta'm jyʌ'mga'yajpa cuquiʌsi.

¹⁴ Y te'šej tujcu wa'y jyustococojtu Diojsis te' gentilta'm Jesucristopit, jujcha' jyustococojtu Abrahán. Te'šej chʌjcu wa'ytyʌ mbʌjcʌchoŋdamu wʌ'aŋjamgupyit te' Espíritu Santo tzamdzi'tamupʌtʌ.

Te' Diojsis chamdzi'oquia'upʌ tiyʌ y te' aŋgui'mguy

¹⁵ Atzita'm, ndzambʌcpa'ʌs jutz chʌquiajpašej pʌ'nista'm: Chʌquiajpa'c trato, ñempe pʌ'nojmopʌ tratotij chʌquiaju, myujšajpa'ca que wiyuŋbʌ tiyʌte' ja'na ya'iwʌ's jyastocoye ni 'ya'ŋʌy.

¹⁶ Diojsis chamdzi'u te'šejta'mbʌ tiyʌ te' Abrahán, y te' 'yune. Te' Totojaye'ojmo ja'n ñʌmi te' 'yuneta'm, como que ijtu inʌc sone 'yune, sino que tumʌtij chamba, y te'wʌte' te' Cristo.

¹⁷ Yʌ'še'ʌste' nʌ ndzamu: Diojsis chʌjcu trato Abrahaŋji'ŋ y Cristopit yajqueju que wiyuŋbʌ tiyʌte'. Minu tyʌjcʌyu te' aŋgui'mguy tumʌ mone-co-ips-co-mac ame'a cʌtʌjcu'c. Ni te'wʌ's ja'n musi yajco'tzu te' trato wa'y jana tyujcu Diojsis chamdzi'oquia'upʌ tiyʌ.

¹⁸ Porque juca inʌctʌ mbʌjcʌchoŋba tʌ mbarte porque ŋgojamdambatʌ te' aŋgui'mguy ja'nande' porque Diojsistʌ tzamdzi'u. Diojsis chi'u Abrahán te' pyarte porque te'šejte' chamdzi'u.

¹⁹ ¿Tiyʌcotoyasʌ'ŋ yospa jeque te' aŋgui'mguy? Jʌsa'ca tʌjcʌyu wa'ytyʌ yajquendamu que ijtu wʌwʌ tʌta'm ŋgowa. Y te'šej tzʌ'yu hasta que minu te' Diojsis 'Yune. Te'wʌte' chamdzi'u Diojsis yʌ'šejta'mbʌ tiyʌ. Y quiojtu te' aŋgui'mguy te' angelespitta'm. Te'ta'mbʌ's wa'y chi'oquia'yaju te' tzamdʌjcʌ'opyawʌ Moisejsis quiʌ'ojmo.

²⁰ Ndzʌctamba'c tʌ trato pyʌcpa iwʌ'stʌ wa'y tzamdʌjcʌyu. Pero Diojsis ñaytyumʌtijte' chamdzi'u te' Abrahán.

Tiyʌcotoyate' tʌjcʌyu te' aŋgui'mguy

²¹ ¿Ñʌquijpasʌ'ŋ te' aŋgui'mgu'yis te' Diojsis chamdzi'oquia'upʌ tiyʌ? Ja'ne nijutz. Porque juca inʌc quiojtu Diojsis aŋgui'mguy šajpapʌ's iscuy-quenguy, pijche'c wiyuŋšej justococotpatʌ inʌc Diojsis ŋgojamba'ctʌ inʌc te' aŋgui'mguy.

²² Pero te' Totojaye nʌmba que mumu pʌn cowapa'tyaju y cowa'sande' myo'cšajupʌ. Te'cotoya ijtu pyena wa'y wyʌ'aŋjamyaju Jesucristo wa'y chi'yaju Diojsis te' ñe'cʌ's chamdzi'upʌ tiyʌta'm jujche'ŋ wyʌ'aŋjamyajpapʌ's.

²³ Pero jaminʌ'cmaj Jesucristo, te' maŋbapʌtʌ inʌc nwʌ'aŋjamdamu, nʌtʌ inʌc coquendamu Diojsis te' aŋgui'mgupyit. Presošejtʌ inʌc ittamu, hasta que minu te' maŋbapʌtʌ nwʌ'aŋjamdamu.

²⁴ Te'šejtʌ jeque coquendamba inʌc te' aŋgui'mgu'yis. Y coquendamutʌ hasta que minu Cristo, wa'ytyʌ justococojtu Diojsis tʌ nwʌ'aŋjamgupyit.

²⁵ Pero yʌtij nwʌ'aŋjamdambatʌ te' Cristo, y ja'nandʌ coquendame te' aŋgui'mgu'yis.

²⁶ Porque mumu mijta'm, juca judiota'm o ja'ne, Diojsismijte' 'yuneta'm, porque nwʌ'aŋjamdamumis Jesucristo.

²⁷ Porque jujche'ŋmij ñʌ'yʌytyamwa'a Cristo-wʌ'aŋjamgu'yojmo, ñdyumʌtzʌctamwa'mij Cristoji'ŋ.

²⁸ Yʌtij ja'ndiyʌ chʌqui juca judío o juca griegomij, juca coyospapʌ o juca librepʌmij, juca pʌn o juca yomomij, porque ñdyumo'yjtya'm mij Cristoji'ŋ.

²⁹ Y como Cristo'samij ñe'ta'm, yʌtij wiyuŋšej Abraha'ŋismijte' wyinboyata'm. Y maŋbamis mbʌjcʌchoŋdamu mbarte Diojsis chamdzi'ušej ñe'cʌ.