Filipenses 3 - Zoque Copainalá New Testament

Te' ñʌtu'ŋajyajpapʌ's wiyuŋbʌ tiyʌ

¹ Yʌtij jeque atzita'm, oma'oma ittamʌ porque tʌ Ngomi'smijyʌ' ñe'ta'm. Ja'ʌs mbʌcjay maya'cuy wa'yʌs njawyʌtzʌjcu tiyʌta'mʌs wina njayjaytyamupʌ, porque oyepʌ tiyʌte' mijcotoyata'm.

² Coquendamʌ nwin umij 'yaŋgoma'cʌtʌjtamu yatzipʌ tiyʌcotoya yojšajpapʌ's. Coquendamʌ nwin umij 'yaŋgoma'cʌtʌjtamu te' judiota'm chi'yajpapʌ's pena wa'mij ŋguiojacʌtʌjtamu.

³ Tʌta'mde' te' wiyuŋše'a circuncidatzʌctamupʌ. Porque ndumʌtzoco'yandʌ ŋgʌna'tzʌytyamba Dios, y oma'omatʌ ittamba Cristo Jesuspit, y ja'ndʌ ne' nwin nijamdame.

⁴ Juca inʌjcʌs ʌs sunba nijamu nwin muspa'ʌs inʌc nijamu. Juca iwʌ's quiomʌ'pya que muspa ñijamu wyin, ʌs más ʌs muspa nijamu ʌsne' nwin.

⁵ Porque ʌj tucutujta'y jama nʌ tya'nu'c circuncidatzʌquiaju'ʌj. Y Israe'lisʌjyʌ' wyinboya, Benjami'ŋis ñe'ŋa'ojmocpʌ. Te'cotoya wiyuŋšejpʌ judio'ʌjyʌ' jujcha' ʌs ndatajta'm, y aŋgui'mguywyʌ'aŋjamgu'yojmo ʌs ŋgʌ'ñʌcojambʌ'pa'ʌs inʌc.

⁶ Jene ŋgʌjoŋba'ʌs inʌc ne' religión, y nyacsnutzʌquiajpa'ʌs inʌc te' tu'mʌyajpapʌ Diojsis ñʌquiʌsi. Y juca inʌjcʌs cʌme'chaju te' aŋgui'mgupyit japya'tjaya inʌc nijutzpʌ ʌs ŋgowa.

⁷ Pero mumu yʌ' wʌcocojtyajpapʌ tiyʌ'sʌj inʌc, tocoquiuytya'mbʌ tiyʌše'ʌs ŋgomʌ'yajpa desde que sunu'ʌs y ndumʌtzoco'yʌs nite'tzʌyu Cristo.

⁸ Wiyuŋšej mumu yʌ'šejta'mbʌ tiyʌ tocoquiuyše'amʌs nʌ'ijtyaju porque más oye wa'yʌs wiyuŋšej ndumʌtzocoy ispʌjcu Cristo Jesús, ʌs Ngomi. Ñe'cʌcotoya mumutiya'mʌs tocoyupʌ tiyʌšej ndzajcu, y putziše'amʌs ŋgomʌ'pya wa'ytyi'ʌs ndumʌtzocoy nite'tzʌyu yʌ' Cristo.

⁹ Y yʌ'še'ʌs ndzʌjcu wa'ytyi'ʌs ndumʌtzʌjcu Cristoji'ŋ, pero ja'n ʌsne' njusto'ajcupyit ŋgʌpa'tupʌ'ʌs aŋgui'mgupyit, sino que te' justo'ajcuy ŋgʌpa'tpapʌtʌ porque nwʌ'aŋjambatʌ Cristo. Yʌ'šejpʌ justo'ajcuy Diojsistʌte' tzi'tamba porque nwʌ'aŋjamdambatʌ yʌ' Cristo.

¹⁰ Mumu yʌ'šejta'mbʌ tiyʌ ʌs ndzʌcpa wa'ytyi'ʌs ispʌjcu oye tʌ Ngomi Jesucristo, y wa'yʌj Diojsis tzi'u pʌmi ndzoco'yojmo chi'ušej pʌmi Cristo wa'y wyinsa'u ca'yajupʌ'ojmoc. Y jujcha' toyapʌjcu Cristo, te'šejti'ʌj sunba ndoyapʌjque'tu ʌj ñempe'ʌj yajca'ya.

¹¹ Y te'še'ʌs sunba ndzʌjcu wa'yʌs ŋgʌpa'tu wa'yʌj winsa'que'tu ca'yajupʌ'ojmoc te' winsa'cuy-jyamo'oyj.

Ndzʌcme'tzta'mitʌy wa'ytyʌ ŋgʌpa'tu ŋgoyowa

¹² Muspa'ʌs que jaŋguiʌpa'tʌma'ʌj mumu yʌ'šejta'mbʌ tiyʌ'ojmo, porque faltamaj wa'yʌj ŋgota'nbʌ'u Diojsis wyi'naŋdʌjqui ñe'cʌ's šunbašej. Pero nʌ'ʌs ŋgo'ŋjojcʌtʌjcu jowi'cše'ʌs muspa ŋgota'nu Jesucristo's šunbašej wa'yʌj ŋgota'nu.

¹³ Atzita'm, aŋjamba'ʌs que jaŋguiʌpa'tʌma'ʌs yʌ'šejta'mbʌ tiyʌ. Wiyuŋšej tiyʌ'ʌste' yʌtij nʌ ndzʌjcu, nʌ'ʌs njambʌ'u tiyʌta'mʌj cʌtʌcjawya'a y nʌ'ʌs ndzʌcme'tzu wa'yʌs ŋgʌpa'tu nʌ'ʌs ocnʌque'nʌyupʌ tiyʌ.

¹⁴ Y maŋba'ʌs ŋgo'ŋjojcʌtʌjcu wa'yʌj nu'cu maŋbamʌ'yʌj coyoju Diojsis. Porque ñe'cʌ'stʌ wejtamu wa'ytyʌ mbʌjcʌchoŋdamu tʌ mbarte porque Jesucristo'sandʌyʌ' ñe'ta'm.

¹⁵ Te'šejtʌ maŋba ŋguipsoytyamu jujche'ŋdʌ cota'nbʌ'wa'a. Y juca tiyʌ'iwʌcʌsi mij eya ŋguipsoytyamba, Diojsismij maŋba nyajquendamu jutz oye wa'mij ŋguipsoytyamu.

¹⁶ Y aŋmaytyamuše'amis, te'šej quipstamʌ y te'šej tu'ŋajtamʌ.

¹⁷ Atzita'm, quengʌspʌctamʌ ʌjcʌsi wa'mij oye ñdyu'ŋajtamu. Y coquendaŋgue'ta cuenta jutz tu'ŋajyajpa te' quiengʌspʌquiajupʌ's tʌjcʌsi.

¹⁸ Nwitʌm nʌ'ʌcʌ'mʌ'ʌsmij ndzamwʌtzʌcjaytyaŋgue'tpa que wʌwʌ ijtyaju itcupyit yajquejyajpapʌ's que qui'nisjayajpa Cristo's cruz.

¹⁹ Myato'ŋoyjayajpa yʌ'ta'mbʌ's te' yatzi wyi'nis šunbapʌ tiyʌ. Myʌja'ŋdzamyajpa chʌquiajpa'c tza'ajcuytya'mbʌ tiyʌ, y na' najsacopajcʌsita'mbʌ tiyʌ quipšajpa. Te'ta'mbʌ jeque maŋba tyocopyʌ'yaju.

²⁰ Pero tʌta'm tzajpojmopʌ itcu'yisandʌyʌ' cowindzʌmdambapʌ. Y nʌtʌ njo'ctamu wa'y wyanajcu desde tzajpojmoc tʌ nyajcotzojcopyapʌ. Te'wʌte' tʌta'm Ngomi Jesucristo.

²¹ Y ñe'cʌ's maŋba quiacpʌ'jayu tʌta'm ca'papʌ ŋgüerpo wa'y tyu'mbajcaju ñe' masanbʌ cuerpoji'ŋ. Y muspa chʌjcu yʌ'šejpʌ tiyʌ te' Cristo's porque pʌmi'ʌyupʌte' y ijtu 'yaŋgui'mʌtʌjcuy mumutiyʌcʌsi.