Filipenses 2 - Zoque Copainalá New Testament

Cristo tiju coyospawʌšej pero Diojsis myʌja'ŋdzʌjcu

¹ Cristo jeque, ijtu mista'm ndzoco'yojmo. ¿Ja'nja nʌctʌ'ytyame que ñe'cʌ's pyʌmitzi'japya tʌta'm ndzocoy, y que ñe'cʌ'stʌ yajtzocopyactamba ñe' yajya'moquiupyit? ¿Y ja'nja nʌctʌ'ytyame que te' Espíritu Santo ijtu tʌta'm ndzoco'yojmo wa'ytyʌ cotzoŋdamu? ¿Ja'nja sundame ndumʌtzocoy mista'm atzi, y ja'nja ndo'ya'ŋʌyay? Jʌ'ʌ, mustambamis y ndzʌctambamis yʌ'šejta'mbʌ tiyʌ.

² Te'cotoya yajtzocopyactamʌ'ʌj. Y wa'yʌj ndzocopyajcu oye, tumʌpʌ quipsoquiuy nʌtu'ŋajtamʌ ne'co'mo, y našunʌtʌjtamʌ ne'co'mo, y uy tzactame te' tumʌco quipsoquiuy.

³ Uy yajtiyʌ quipcuchʌquia'tame ni uy ne'cʌtij mʌja'ŋdzʌctame nwin, pero pyʌcpa wa'mis nyumijcotzʌctamu nwin y wa'mis más mʌja'ŋgomʌ'ytyamu te' eyata'mbʌ mis atzita'm que ja'n misne nwin.

⁴ Y pyʌjque'tpa wa'mis winac ŋguipsjaytyamu te' atzi'sta'm 'yoye'ajcuy, y pijche'c wa'mis ŋguipstamu ne' oye'ajcuy.

⁵ Quengʌspʌctamʌ tʌ Ngomi Jesucristocʌsi wa'mij ŋguipsoytyamu ñe'cʌ quipsoyušej.

⁶ Ñe'cʌ's jeque, ñʌ'itjayu Diojsis itcuy y chocoy, y ñe'cʌ y Dios tumo'pyʌ tiyʌte'. Ñempe tu'mbac Diosji'ŋ, jachi'ʌ pena wa'y chʌ'yu te'šej.

⁷ Jawyi'naŋgota ñe' myʌja'ŋajcuy sino que minu pyʌ'naju yʌy najsacopajcʌsi pʌnšej, y coyospawʌšej chʌjcu wyin yʌ' Cristo's.

⁸ Y yʌy najsacopajcʌsi'a ijtu'c pʌnšej, yajyumi'aju wyin, y myato'ŋoyjayu Dios mumutiyʌcʌsi. Y chi'oquia'u wyin wa'y yajca'yaju. Y cruzcʌsi ca'u.

⁹ Te'cotoya Diojsis más yajmʌja'ŋaju te' Jesucristo que ja'n ya'iwʌ, y quiotjayu más itniqui'ma'ŋʌyupʌ nʌy que ja'n ya'iwʌ'sñe'.

¹⁰ Y te' más itniqui'ma'ŋʌyupʌ Jesujsis ñʌy wa'ytye' mumupʌ's quiujnayjayaju jujche'ŋ quengu'yʌyajupʌ tiyʌ's, te' tzajpojmo ijtyajupʌ's, te' najsacopajcʌsi ijtyajupʌ's y te' ca'yajupʌ's.

¹¹ Y myuma'ŋgʌ'y wa'y quiowʌ'aŋjamyaju que Jesucristote' te' Comi, y te'šej wa'y myʌja'ŋwʌcotzamyaju tʌ Ndata Dios.

Cristo-wʌ'aŋja'moyeta'm sʌ'ŋgʌšejta'm najsacopajcʌsi

¹² Te'cotoya pyʌcpa wa'mis mato'ŋoyjojcʌtʌcjaytyamu Dios. Pero ja'n na' teytyi'ʌj ijtu'c miji'ŋda'm, más pyʌcpa wa'mis mato'ŋoyjaytyamu yʌtij porque ya'a'yʌj ijtu. Como Diojsismij nyajcotzoctamu, tu'ŋajtamʌ jujcha' ña'tzpapʌ's, y coquendamʌ cuenta u'yamij maŋu ŋguiowapa'twʌtzʌctamu.

¹³ Y Diojsis pyaquitzi'japya mista'm ndzocoy wa'mis sundamu oyeta'mbʌ tiyʌ, y wa'mis ndzʌctamu šunbašej ñe'cʌ's.

¹⁴ Tzʌctamʌ tiyʌta'm pyʌcpa wa'mis ndzʌctamu, y uy nu'motoŋdame ni uy quipotoŋdame.

¹⁵ Te'šej tzʌctamʌ uy yajtiyʌcʌsi pya'tjatʌjtamu mista'm ŋgowa, sino que wiyuŋdu'ŋajtamʌ. Te'šejmij Diojsis 'yunešej maŋba ñdyu'ŋajtamu cowataca te' yatzita'mbʌ y nuyuta'mbʌ pʌ'nojmo. Y matzašejmij maŋba ñchi'muŋdamu ñe'ta'm quiucmʌ.

¹⁶ Y tzijpana-nʌ'itjaytyamu mista'm ndzoco'yojmo te' Diojsis chame tzi'papʌ'stʌ quenguy. Y juca te'šej mis ndzʌctamba maŋba quieju que jaquiomeque'ʌj yosa mi'ojmota'm ndzamgopuŋjaytyamu'cʌsmij te' evangelio. Te'cotoya maŋba'ʌs mujsu nwʌcotzamu nwin mijpitta'm te' jamo'oyj minba'ca Cristo.

¹⁷ Mis jeque, nwʌ'aŋjamdamumis Dios y ndzi'oquia'tamumis ne' nwin ñe'cʌcʌsi jujcha' tzi'oquiuy. Y ñempe'ʌj yajca'ya oma'oma'ʌs maŋba ndzi'oquia'u nwin Dioscʌsi, porque te'še'ʌs maŋba nyajcota'nbʌ'u mista'm ndzi'oquiuy. Te'cotoya tzi'ŋbʌ'pa'ʌj y omdzocopyacpa'ʌj miji'ŋda'm.

¹⁸ Y te'šejtijque' tzi'ŋbʌ'tamʌ y omdzocopyactamʌ mijta'm porque te'še'ʌj itque'tu ʌj.

Te' Timoteo y te' Epafrodito

¹⁹ Juca tʌ Ngomi Jesujsis šunba, maŋba'ʌsmij ŋgʌ'wejaytyamu jʌ'nʌ'oyj te' Timoteo. Y witu'pa'ca teymʌc ñe'cʌ'sʌj maŋba yajmujsu jutzmij nʌ ñdyu'ŋajtamu. Y aŋjamba'ʌs que maŋba'ʌj ndzocopyajcu mijpitta'm.

²⁰ Ja'ndiyʌ yʌy eyapʌ más que yʌ' Timoteo šundambapʌ'smij jujcha' ʌs, porque wiyuŋšej ñe'cʌ'smij jene sunba ŋguiotzoŋdamu.

²¹ Eyata'mbʌ's na' ñe' 'yoye'ajcuy mye'chajpa y ja'n suni chʌquiaju tiyʌta'm šunba tʌ Ngomi Jesucristo's.

²² Pero jujcha' ñe' une's ñʌyospa tyataj, te'še'ʌj nʌyospa Timoteo's wa'ytyʌs ndzamgopuŋu te' evangelio. Y mustamba'mis que te' Timoteo cosujupʌ pʌnde', y que tumʌyospa ʌji'ŋ.

²³ Te'cotoya sunba'ʌsmij ŋgʌ'wejaytyamu yʌ' Timoteo jʌ'nʌ'oyj, de que muspa'ʌs jutzʌj maŋba ndzʌ'yu.

²⁴ Y nijamba'ʌs que tʌ Ngomi'sʌj maŋba yajminu jʌ'nʌ'oyj wa'yʌsmij minu ndu'nistamu.

²⁵ Pero ŋgomʌ'pya'ʌs que ijtu pyena wa'yʌsmij ŋgʌ'wejaytyamu te' atzi Epafrodito, tumʌyospapʌ ʌji'ŋ, y quioquijpapʌ's te' evangelio ʌji'ŋ. Yʌ' Epafrodito ŋgʌ'wejaytyamumisʌj wina wa'yʌj yosjayu y cotzoŋu.

²⁶ Pero ñe'cʌ's quiʌñʌñba inʌc wa'mij ŋguiendamu mumu mijta'm. Y jene toyapʌjcu porque mustamumis que ca'epa'tu.

²⁷ Wiyuŋšej ca'epa'tupʌte' inʌc y hasta ca'pa inʌc. Pero Diojsis tyo'ya'ŋʌyu y to'ya'ŋʌquie'tu ʌj, y yajtzojcu u'yʌj nduyu'yoyjojcʌtʌjcu.

²⁸ Te'cotoya'ʌsmij nʌ ŋgʌ'weju yʌ' Epafrodito wa'mis ŋguenwʌtzʌctamu, y wa'y chi'ŋbʌ'u mista'm ndzocoy. Y te'šej más aŋje'cpa ʌs ndoya yʌy.

²⁹ Oma'oma'c pʌjcʌchoŋdamʌ tʌ Ngomi's ñʌquiʌsi Y mʌja'ŋgocottamʌ ñe'cʌšejta'mbʌ pʌn.

³⁰ Porque wa'ytyij yojsu Cristo's yoscu'yojmo yʌ' Epafrodito maŋba inʌc quia'u. Jyambʌ'u wyin wa'ytyi'ʌj cotzoŋu misʌj ja'n musi ŋgotzoŋdamupʌ tiyʌcʌsi.