Filipenses 1 - Zoque Copainalá New Testament

Preso ijtu'c Pablo jyayjayaju Filiposojmota'mbʌ wʌ'aŋja'moye

¹ Ʌj Pablo y Timoteo, Jesucristo'stʌjyʌ' quioyosa. Nʌtʌsmij njayjaytyamu mijta'm, Diojsis quio'aŋgui'moye, ancianota'm y mumu wyʌ'aŋjamyajpapʌ's Cristo Jesús tey Filipos-cumgu'yojmo.

² Sunbatʌs wa'mij nyajyamdamu y wa'mij ñchi'tamu sʌ'mnaquiuy tʌ Ndata Diojsis y tʌ Ngomi Jesucristo's.

Pablo's 'yoto'ŋʌyu Dios wʌ'aŋja'moyecotoyata'm

³ Jujche'ŋ naca'ʌsmij njamwʌtzʌctamba nʌjapya'ʌs Dios: Tatay, yʌscotoya mis ndzʌjcu.

⁴ Y jujche'ŋ naca'ʌs oto'ŋʌpya Dios, tzi'ŋbʌ'pa ʌs ndzocoy wa'yʌj nwa'coyu mijcotoyata'm.

⁵ Porque desde te' jama nwʌ'aŋjamdamu'cmis te' evangelio hasta yʌtij tumʌco yoscuytyʌ nʌ ndzʌctamu wa'ytyʌ ndzamgopuŋu te' evangelio.

⁶ Diojsis jyomecotzʌcjayu mista'm ndzocoy nwʌ'aŋjamdamu'cmis te' evangelio. Ni'aŋjamba'ʌs Dios que ñe'cʌ's maŋba pyʌmitzi'jayu mista'm ndzocoy hasta tiyʌ jama mingue'tpa tʌ Ngomi Jesucristo.

⁷ Jene oye wa'yʌs te'šej ŋguipsu mijcotoyata'm porque jene sundamba'ʌsmij ndzoco'yojmo. Y mista'm, jene nʌmisʌj ŋgotzoŋdamu somumʌ'yʌj, y nʌ'cše'ŋo'yʌs ndzamgopuŋu y ŋgoquijpu te' evangelio. Te'šejmis nʌ nyajquejtamu que mbʌjcʌchoŋdamwa'a mis te' Diojsis yajya'moquiuy jujcha' ʌs mbʌjcʌchoŋu.

⁸ Diojsis myuspa jutzʌsmij jene sundamba ndzoco'yojmo, jujcha' Jesucristo'smij maya'aŋ šundamba ñe' choco'yojmo.

⁹ Y nwa'cjapya'ʌs Dios wa'mij más aŋba'te'c našunjojcʌtʌctamu ne'co'mo, y wa'mis nʌ'ittamu oyepʌ mujsoquiuy y nʌctʌ'yoquiuy mumutiyʌcʌsi,

¹⁰ te'šej wa'mis mujsu ŋgopiŋdamu te' más oyeta'mbʌ tiyʌ. Y maŋbamij ñdyu'ŋajtamu wiyu'ŋajcu'yojmo y yajtiyʌcʌsimij ja'n maŋu ŋguionocatʌjtamu te' jamo'oyj minba'ca Cristo.

¹¹ Y Jesucristo maŋba itjojcʌtʌjcu mista'm ndzoco'yojmo wa'mij ñdyu'ŋajtamu mumu jama masa'najcu'yojmo. Te'šejmis maŋba nyajquejaytyamu Diojsis myʌja'ŋajcuy, y maŋbamis nwʌcotzamdamu.

Ʌs Cristo'ʌs nwi'naŋgotpa jujche'ŋdiempo'ʌj quenba

¹² Atzita'm, sunba'ʌs wa'mis mustaŋgue'tu jujche'ŋʌj tiyʌta'm cʌtʌcjawya'a ʌj, wiyuŋšej yʌ'šejta'mbʌ tiyʌ's jene nʌ quiotzoŋu wa'y quiopuŋu te' evangelio.

¹³ Te'cotoya mumu te' palacio-coque'noye's, y yʌ' cumgupyʌ'nista'm myujšajpa'a que somyaju'ʌj porque ndzamgopuŋba'ʌs Jesucristo.

¹⁴ De que myujšaju wʌwʌta'mbʌ atzi'sta'm jutzʌs ŋgoquijpa Jesucristo somumʌ'yʌj, nʌ chamgopuŋyaju jana na'chcuy te' Diojsis chame. Y tʌ Ngomi's nʌ pyʌmitzi'yaju wa'y te'šej chamgopuŋyaju.

¹⁵ Wiyuŋšej ijtyaju eyata'mbʌ chamgopuŋyajpapʌ's Cristo ñi'aŋsu'noquiupyit y quipcupyit. Pero eyata'mbʌ's chamgopuŋyajpa Cristo oyepʌ tzocopyit.

¹⁶ Y te' chamgopuŋyajpapʌ's Cristo ja'n 'yoyepʌ tzocopyit jañʌ'ijtyapʌte' wiyuŋbʌ tzocoy. Te'ta'mbʌ's te'šej chʌquiajpa wa'ytyijte' chʌcjʌ'mʌyjayaju ʌs ndoya yʌ' preso'mo.

¹⁷ Pero te' eyata'mbʌ's chamgopuŋyajpa Cristo porque jene suñajpa'ʌj, y porque myujšajpa que yʌ'yʌj somyaju porque ŋgoquijpa'ʌs te' evangelio.

¹⁸ Pero ja'ʌs tiyʌ maya'cuy mbʌqui juca oyepʌ tzocopyit o ja'n 'yoyepʌ tzocopyit nʌ chamgopu'ŋoyaju. Nʌ'omba'ʌs y maŋbama'ʌs nʌ'omgue'tu, porque Cristote' nʌ chamgopuŋyaju.

¹⁹ Porque muspa'ʌs que mumu yʌ'šejta'mbʌ tiyʌ maŋba yojsu ʌs oye'ajcuquiotoya porque nʌmij nwya'coytyamu Dioscʌsi ʌjcotoya y porque tʌ Ngomi Jesucristo's 'Yespiritu'sʌj nʌ paquitzi'u.

²⁰ Njo'cpa'ʌs ndumʌtzocoy que yajtiyʌcʌsi'ʌj ja'n maŋu ndza'aju. Y njo'que'tpa'ʌs que jana na'chcu'yʌs ndzamjojcʌtʌcpa te' Diojsis chame. Sunba'ʌs nyajquejayu Cristo's myʌja'ŋajcuy mumu jama ʌs ŋguengupyit, juca quenbama'ʌj o ca'pa'ʌj.

²¹ Nʌ'cše'ŋo'mya'ʌj ŋguenu yʌy, Cristo'ʌs nʌwi'najpa ndumʌtzocoy, y juca ca'pa'ʌj nʌwʌ'ajupa'mʌste'.

²² Pero juca quenbama'ʌj yʌy muspa'ʌs nyosjayumaj tʌ Ngomi Jesucristo. Te'cotoya ja'ʌs musi tiyʌ oye wa'yʌs ŋgopiŋu, te' wa'yʌj ijtu yʌy najsacopajcʌsi o wa'yʌj ŋga'u.

²³ Yʌ' metzapʌ tiyʌ'sʌj yajmetzaŋdzoco'yajpa. Sunbati'ʌj ŋga'que'tu wa'yʌj maŋu ndumʌ'ijtu Cristoji'ŋ, y muspa'ʌs que ñe'cʌji'ŋbʌ tumʌ'itcuy te'wʌte' te' más oyepʌ.

²⁴ Pero wa'yʌsmij ŋgotzoŋdamu mijta'm, más pyʌcpa wa'yʌj ijtumaj yʌy najsacopajcʌsi.

²⁵ Pero ni'aŋjamba'ʌs que maŋbama'ʌj ndzʌ'yu yʌy najsacopajcʌsi y njamacʌtʌjcu miji'ŋda'm. Y maŋba'ʌsmij ŋgotzoŋdamu wa'mij oma'oma'c ittamu Cristo-wʌ'aŋjamgu'yojmo.

²⁶ Y minba'camʌsmij ndu'nistaŋgue'tu, maŋbamis nʌ'o'maŋgʌtʌctamu y maŋbamis nwʌcotzamdamu Cristo Jesús.

²⁷ Te'cotoya ndzamjaytyamba'ʌsmij wa'mij ñdyu'ŋajtamu oye pyʌcpašej, porque nwʌ'aŋjamdambamis te' Cristo's 'yevangelio. Y juca minba'ʌsmij ndu'nistamu o ja'nʌj mini pero sunba'ʌs wa'yʌj yajmujšaju que tumupʌ quipsoquiuytyijmis nʌ nʌtu'ŋajtamu ndumʌtzocoy. Y sunba'ʌs musque'tu que tumʌ'ajcu'yoyj nʌmis ŋgoquipjaytyamu te' Cristo's 'yevangelio nwʌ'aŋjamdambapʌtʌ.

²⁸ Y umis na'tztamu te' qui'nišajpapʌ's te' evangelio. Te'šej qui'nisoyajpapʌ's yajquejyajpa que maŋbapʌte' tyocoyaju. Y mijta'm maŋbamij ŋguiotzojcoctuctamu. Pero yʌ' cotzojcuy Diojsiste' maŋba chʌjcu.

²⁹ Y yajya'moquiupyit Cristo'smij mbyaquitzi'tamba wa'mis jana na'chcuy nwʌ'aŋjamdamu ñe'cʌ, y ja'n na' te'wʌtij sino que wa'mij nyacsnutzʌcʌtʌjtaŋgue'tu porque nwʌ'aŋjamdambamis ñe'cʌ.

³⁰ Nguendamwa'mis wina jutzʌj yacsnutzʌquiaju y matoŋdamwa'mis jutzʌj yʌtij nʌ yacsnutzʌquiaju, y te'šejtijmij nʌ yacsnutzʌcʌtʌjtaŋgue'tu mijta'm.