Filemón 1 - Zoque Copainalá New Testament

Jyayjayušej Pablo's te' Filemón

¹ Ʌjte' te' Pablo. Somyaju'ʌj preso'mo porque ndzi'oquia'u'ʌs nwin Jesucristocʌsi. Atzi Filemón, jene sunba'ʌsmij ʌs y te' atzi Timoteo's porque tʌsmijte' ŋgoyospa-tʌwʌ. Nʌtʌsmij njayjayu mij,

² y tʌta'm ŋgose Apia, te' sungue'tpapʌtʌs, y te' Arquipo tʌta'm ndʌwʌ quioquipque'tpapʌ's te' evangelio. Yajmujšajque'ta yʌ' toto wʌ'aŋja'moyeta'm mis ndʌjcaŋʌ tu'mʌyajpapʌ.

³ Sunba'ʌs wa'mij ñchi'tamu yajya'moquiuy y sʌ'mnaquiuy tʌ Ndata Diojsis y tʌ Ngomi Jesucristo's.

Jene wyʌ'aŋjamba y šunba tʌ Ngomi Filemo'ŋis

⁴ Ja'ʌsmij njambʌ'i jujche'ŋ naca'ʌs oto'ŋʌpya Dios, y mijcotoya nʌjapya'ʌs ñe'cʌ yʌscotoya.

⁵ Porque mujswa'mʌs que ndzijpana-nwʌ'aŋjambamis y jene sunbamis tʌta'm Ngomi Jesús, y te'šejmis sungue'tpa mumu wʌ'aŋja'moyeta'm.

⁶ Y como nwyʌ'aŋja'mopyamij tʌšej, nwa'cpa'ʌs wa'mis nwʌ'aŋjamu y aŋmayu más, hasta wa'mis mujsu mumu oyeta'mbʌ tiyʌ ijtupʌ tʌcotoyata'm Cristo Jesuspit.

⁷ Atzi, jene nʌ'omba'ʌs y tzocopyacpa'ʌj porque sunbamis te' atzita'm y nyajtzocopyaquiajpamis.

Chamdʌjcʌpya Onésimo te' Pablo's

⁸ Como Cristo'sʌjyʌ' quiʌ'wej muspa'ʌsmij inʌc aŋgui'mu wa'mis ndzʌjcu pyʌcpašej,

⁹ pero como sunba'ʌsmij, ja'ʌsmij aŋgui'mi, sino que nwa'cpa'ʌs, porque tzamupʌ'na'mʌj, y somyaju'ʌj preso'mo porque ndzi'oquia'u'ʌs nwin Jesucristocʌsi.

¹⁰ Te'cotoya jeque, nwa'cjapya'ʌsmij ʌs une Onesimocotoya. Ʌs uneše'ʌs ŋgomʌ'pya porque nyajwʌ'aŋjamu'ʌs Cristo yʌy somyajumʌ'yʌj.

¹¹ Cʌtʌquiajupʌ aŋsʌ'ŋojmo yʌ' Onesimo's jene ŋguiʌwaychʌcjapyamij inʌc. Pero yʌtij nijamba'ʌs que maŋbamij ñchiŋitzʌcjayu tey porque jene tziŋitzʌcjapya'mʌj yʌy.

¹² Y yʌtij nʌ'ʌsmij ŋgʌ'wejwʌtzʌcjayu. Pʌjcʌchowa como que ʌj misʌjte' nʌ mbʌjcʌchoŋu.

¹³ Sunjo'pya'ʌs wa'y chʌ'yu ñe'cʌ ʌji'ŋ, wa'yʌj cotzoŋu como que misʌj nʌ ŋgotzoŋu yʌy somyajumʌ'yʌj porque nwʌ'aŋjamba'ʌs te' evangelio.

¹⁴ Pero jašunʌ'ʌs nyajtzʌ'yʌ yʌy juca ne'cʌ mis ja'n suni, porque ja'ʌsmij suni njupcosujcu. Juca sunbamisʌj ŋgotzoŋu, sunba'ʌs wa'mis tumʌtzʌcoy ndzʌjcu.

¹⁵ Ngomʌ'pya'ʌs que te'cotoyamijte' mbyochajcu uša'ŋ aŋsʌŋgotoya wa'mis mbʌjcʌchoŋwʌtzʌjcu wa'y itjojcʌtʌcwa'a miji'ŋ.

¹⁶ Pyʌcpa wa'mis mbʌjcʌchoŋu tʌta'm atzišej, y ja'n saŋgoyospawʌšej, sino que jujcha'ndʌ jene sunbapʌ atzi. Ʌs jene sunba'ʌs, y ŋgomʌ'pya'ʌs que mis más mis sunba, porque mis te'ne' ndʌwʌ, y yʌtij wʌ'aŋja'mopyapʌ atzi'ande'.

¹⁷ Te'šej jeque juca wʌ'aŋja'moye-tʌwʌšej misʌj ŋgomʌ'pya, pʌjcʌchowa ñe'cʌ como que ʌj misʌjte' nʌ mbʌjcʌchoŋu.

¹⁸ Juca tiyʌ'iwʌ mij ñchʌcjayu ñe'cʌ's o njya'tzjapyamij, ʌs maŋba ŋgoyoju.

¹⁹ Ʌs Pablo, nimeque'ʌsmij ne' ŋgʌ'pit nʌ njayjayu wa'mis jana nʌcna'tzʌyu porque ʌsmijte' maŋba ŋgoyoju, wempe misʌj mis nja'tzjapya hasta ne' nwin.

²⁰ Yʌtij jeque atzi tzʌcja'ʌj yʌ' yajya'moquiuy tʌ Ngomi's ñʌquiʌsi. Te'šejmis wa'y nyajtzocopyacjayu ʌs ndzocoy tʌ Ngomi Jesuspit.

²¹ Nʌ'ʌsmij njayjayu porque muspa'ʌs que myato'ŋopyamij. Y muspa'ʌs que maŋbamis ndzʌjcu más que ja'nʌs nʌ ndzamuše'ŋ.

²² Nwa'cjaquie'tpa'ʌsmij wa'misʌj nimejcʌyjayu tʌc jutimʌ'yʌj wa'y nu'cu. Porque njo'cpa'ʌs que nʌmis oto'ŋʌytyamu Dios wa'yʌj cotzoŋu wa'yʌj nu'cu mis ndʌjcaŋʌ.

Ultimota'mbʌ dyujchi'oquiuy

²³ Ñdyujchi'pamij Epafrajsis yʌy tumʌsomupʌ ʌji'ŋ porque chi'oquia'u wyin Jesucristocʌsi.

²⁴ Y ñdyujchi'yajque'tpamij Marcojsis, Aristarco's, Demajsis y Lucajsis te' ʌji'ŋ tumʌyojšajpapʌ.

²⁵ Sunba'ʌs wa'mij ñchi'tamu yajya'moquiuy tʌta'm Ngomi Jesucristo's. Amén.