El Apocalipsis 7 - Zoque Copainalá New Testament

Te' Israel-pʌn quiopiŋyatʌjupʌ

¹ Jʌsa'ca ŋguengue'tu'ʌs macšcu'y angelesta'm tenayajupʌ najsacopajquis macšcu'pyʌ aŋginʌ'ojmo. Te'ta'mbʌ's nʌ inʌc yajwinduquiaju macšcu'pyʌ sawa yʌmʌc teymʌc popyapʌ najsacopajcʌsi, uy šujte'tzte'tzwʌ'oyu nascʌsi ni ma'rojmo ni nijutzpʌ mʌja cuquiʌsi.

² Y ŋguengue'tu'ʌs eyapʌ ángeles nʌ qui'mupʌ tzotpamʌc jama, nʌ ñʌminupʌ's te' quenbapʌ Diojsis šello wa'y šello'ʌyu jujche'ŋ Diojsis pyʌn. Y maya'aŋ weju wa'y wyejco'myaju te' macšcu'ytya'mbʌ ángeles te' chi'yatʌjupʌ inʌc aŋgui'mʌtʌjcuy wa'y chʌcjayaju toya te' najsacopac y te' mar.

³ Y nʌmu te' ángeles: Uy tzʌcjay toya te' nas ni te' mar, ni te' mʌja cuytya'm hasta que ŋgotjayajpatʌs sello wyinbactza'cʌsita'm yosjayajpapʌ's tʌta'm Dios.

⁴ Y matoŋu'ʌs jujche'ŋ ijtyaju sello'ʌyajupʌ, ciento cuarenta y cuatro mil ñʌ'itjayajupʌ's te' Diojsis šello. Yʌ'ta'mbʌ mumu te' Israe'lis 'yune'sta'm wyinboya'ojmocpʌ.

⁵ Juda's wyinboya'ojmocpʌ macwʌstʌjca'y mil sello'ʌyajupʌ, Rube'ŋis wyinboya'ojmocpʌ macwʌstʌjca'y mil sello'ʌyajupʌ, Gajtis wyinboya'ojmocpʌ macwʌstʌjca'y mil sello'ʌyajupʌ,

⁶ Ase'ris wyinboya'ojmocpʌ macwʌstʌjca'y mil sello'ʌyajupʌ, Neftali'is wyinboya'ojmocpʌ macwʌstʌjca'y mil sello'ʌyajupʌ, Manasejsis wyinboya'ojmocpʌ macwʌstʌjca'y mil sello'ʌyajupʌ,

⁷ Simeo'ŋis wyinboya'ojmocpʌ macwʌstʌjca'y mil sello'ʌyajupʌ, Levi'is wyinboya'ojmocpʌ macwʌstʌjca'y mil sello'ʌyajupʌ, Isaca'ris wyinboya'ojmocpʌ macwʌstʌjca'y mil sello'ʌyajupʌ,

⁸ Zabulo'ŋis wyinboya'ojmocpʌ macwʌstʌjca'y mil sello'ʌyajupʌ, Jose'is wyinboya'ojmocpʌ macwʌstʌjca'y mil sello'ʌyajupʌ, y Benjami'ŋis wyinboya'ojmocpʌ macwʌstʌjca'y mil sello'ʌyajupʌ.

Aŋba'te te' sujpopota'mbʌ's pyama

⁹ Jʌsa'ca ŋguenu'ʌs tey inʌc ijtyaju aŋba'te pʌn, jana ma'yaŋ tu'mʌyajupʌ yu'tzišej, soneco nación, soneco raza, soneco najsacopac-iti y soneco otowe'ʌyajupʌ cutzunayajupʌ te' aŋgui'mʌtʌjcuy-pyocscu'yis wyi'naŋdʌjqui y Ñchowambe Jesucristo's wyi'naŋdʌjqui. Y mumu inʌc sujpopota'm pyama y cho'ŋajyajupʌ's sa'ŋij quiʌ'ojmo.

¹⁰ Y weju'c inʌc nʌmyajpa: Te' aŋgui'mʌtʌjcuy-pyocscu'yojmo pocsupʌ Ndata Diojsis y te' Ñchowambe's, te'wʌ'stʌjyʌ' yajcotzojcu.

¹¹ Y tenayu'c inʌc quiʌne'ŋgʌwitu'yaju te' Diojsis aŋgui'mʌtʌjcuy-pyocscuy mumupʌ angelejsis. Tey inʌc ijtyaju ancianota'm y te' macšcu'ytya'mbʌ copʌn, y myuma'ŋgʌ'y mucscʌne'cpʌ'yaju wyinnacapit te' pocscu'yis wyi'naŋdʌjqui y quiʌna'tzʌyaju Dios.

¹² Y nʌmyaju: Amén. Wʌcotzamda'mitʌy yʌ' Dios, mʌja'ŋgotzamda'mitʌy porque mʌja'ŋmujsopya. Nʌjaytya'mitʌy yʌscotoya, ŋgʌna'tzʌytya'mitʌy tʌta'm Dios porque mʌja'ŋ pyʌmi y 'yaŋgui'mʌtʌjcuy mumu jamacotoya. Amén.

¹³ Pijche'ca tumʌ tey ijtupʌ anciano's nʌjayu'ʌj: ¿Iwʌta'masʌ'ŋyʌ' yʌ' sujpopta'mbʌ's pyama y jutʌjcasʌ'ŋyʌ' miñajupʌ?

¹⁴ Aŋdzoŋu'ʌs y nʌjayu'ʌs: Señor, bieŋdijmis muspa. Y te' anciano's nʌjayu'ʌj: Yʌ'ta'mbʌ pujtyajupʌyʌ' te' yacsnutzʌquiatʌjumʌy. Yʌ'ta'mbʌte' te' yajcotocoyatʌjupʌ y quiotze'yatʌjupʌ quiowapit Ñchowambe's ñʌ'pi'nojmo.

¹⁵ Te'cotoyate' yʌy ijtyaju Diojsis aŋgui'mʌtʌjcuy-pyocscu'yis wyi'naŋdʌjqui, y tzu'ji'ŋ jamaji'ŋ yosjayajpa ñe' tyemplo'ojmo. Y te' pocscu'yojmo pocsupʌ's maŋba quiopʌ'quiaju y quiotu'šaju.

¹⁶ Ja'na maŋu yu'yaju, ni yoctʌjchaju, ni jama's ja'n maŋu pyoŋyaju, y nijutzpʌ piyʌnʌmgʌ's,

¹⁷ porque te' Ñchowambe Jesucristo te' Diojsis 'yaŋgui'mʌtʌjcuy-pyocscu'yis wyi'naŋdʌjqui ijtupʌ, te'wʌ's maŋba quioqueñaju y ñʌmaŋyaju wombamʌy nʌ' yospapʌ ja'n yayepʌ quenguquiotoya. Pijche'c maŋba tyʌjtzu mumu pʌ'nis wyitʌm-nʌ'.