El Apocalipsis 4 - Zoque Copainalá New Testament

Tzajpojmo ijtyajupʌ's quiujnayjayaju Dios

¹ Jʌsa'ca ŋguenu'ʌs tzajpojmo puerta aŋwajupʌ. Matoŋgue'tu'ʌs te' winbʌ otowe te' nʌ inʌc 'yaŋjʌyupʌ jujcha' mu'cuy. Ʌjte' inʌc nʌ oto'ŋʌyu y nʌjayu'ʌj: Qui'mʌ yʌmʌ y ʌsmij maŋba nyajquenu maŋbamaj tyuquiajupʌ tiyʌ jʌsa'ca.

² Mecša'ŋo'yʌj cotjayu Espíritu Santo's ʌs nwitʌ'ma'ŋoyj quene. Y ŋguenu'ʌs aŋgui'mʌtʌjcuy-pyocscuy patznayupʌ tzajpojmo y te' pocscuquiʌsi pocsu inʌc tuma'ŋbʌn.

³ Y te' tey inʌc pocsupʌ, aŋba'te coyowapʌ diamantešej inʌc quenba, y jujcha' tzapas qui'toŋbapʌ tza'. Y tzujtzu qui'toŋbapʌ juŋguwi'chis inʌc quiʌwitu'u te' pocscuy arcošej.

⁴ Y te' aŋgui'mʌtʌjcuy-pyocscuy ñe'ŋgʌwitu'u inʌc ips-co-macšcu'pyʌ pocscu'yis, y ips-co-macšcu'pyʌ anciano'sta'm inʌc ñʌpocsʌyaju te' pocscuytya'm, sujpopota'mbʌ's myeque, y parejo inʌc yamyaju oropʌ corona.

⁵ Y te' aŋgui'mʌtʌjcuy-pyocscu'yojmoc nʌ inʌc pyujtu ne'mgʌ' y aŋjʌquiʌ' y otoweta'm. Y te' pocscu'yis wyi'naŋdʌjqui ijtyaju inʌc cu'ya'y sʌ'ŋgʌ' nʌ ñemyajupʌ. Te'ta'mbʌ Diojsiste' cu'ya'pyʌ 'Yespiritu.

⁶ Y te' aŋgui'mʌtʌjcuy-pyocscu'yis wyi'naŋdʌjqui ijtu inʌc espejošejpʌ mar cristalšej quenbapʌ. Y te' pocscu'yaŋi quiʌne'ŋgʌwitu'yaju inʌc macšcu'pyʌ copʌ'nis, cʌmwitʌmda'mbʌ's wi'na'ŋojmoc y 'yucaŋgʌ'mʌc.

⁷ Y tumʌ te' copʌn, tzapas caŋšej inʌc quenba. Te' myetzo'mopʌ, wacas-unešej inʌc quenba. Y tyuca'yojmopʌ, pʌn winnaca inʌc ñʌ'ijtu. Y myacšcu'yojmopʌ nʌ šitijtupʌ mʌja tajpišej inʌc quenba.

⁸ Y te' macšcu'ytya'mbʌ copʌ'nis, tumdumʌpʌ's ijtu inʌc tujta'y šaj y te' šajta'm cʌmwitʌmda'm inʌc cʌsmʌc y jojmoc. Y ja'n inʌc šapʌquiay tzu'ji'ŋ jamaji'ŋ wa'y ñʌmyaju: Maya'aŋde' masanbʌ tʌ Ngomi Dios, muspapʌ's chʌjcu mumutiyʌ, te' ijtupʌytya' inʌc, yʌtij tzajpojmo ijtupʌ, te' maŋba minupʌ.

⁹ Y te' copʌ'nista'm myʌja'ŋgotzamyajpa y quiʌna'tzʌyajpa y ñʌjayajpa inʌc yʌscotoya Dios te' pocsupʌ aŋgui'mʌtʌjcuy-pyocscu'yojmo, te' itjojcʌtʌcpapʌ mumu jamacotoya.

¹⁰ Y jujche'ŋ naca te'šej wyʌcotzamyajpa, pijche'c inʌc cutcʌne'cpʌ'yajpa te' ips-co-macšcu'ytya'mbʌ ancianota'm te' aŋgui'mʌtʌjcuy-pyocscu'yojmo pocsupʌ's wyi'naŋdʌjqui, y quiujnayjayajpa inʌc te' itjojcʌtʌcpapʌ mumu jamacotoya. Y quiojtyajpa inʌc quiorona te' aŋgui'mʌtʌjcuy-pyocscu'yis wyi'naŋdʌjqui, y nʌmyajpa inʌc:

¹¹ Señor, mijte' pyʌcpa wa'ytyʌsmij mʌja'ŋwʌcotzamu, ŋgʌna'tzʌyu y wa'mis mbʌjcʌchoŋu aŋgui'mʌtʌjcuy, porque miste' ndzʌjcu mumutiyʌ y mis ne' su'noquiupyit ijtyaju y tuquiaju.