El Apocalipsis 3 - Zoque Copainalá New Testament

Yʌ'šej jyayjayu te' Sardis-tu'mʌquiuy

¹ Ʌj Juan, nʌjaquie'tu'ʌj Cristo's: Jayjaquie'ta te' nʌ quioquenupʌ's Sardis-tu'mʌquiuy. Tzamja te' coque'noye y te' tu'mʌquiuy que ʌste' nʌ'ijtu te' cu'ya'pyʌ Espíritu Diojsisñe', y ʌjte' te' cho'ŋajupʌ's te' cu'ya'pyʌ matza y que muspa'ʌs tiyʌta'm mis ndzʌctamba. Chamjayajpa mis nʌy que ittamumajmij, pero ʌs nwi'naŋdʌjqui ŋguia'tamupa'mijte'.

² Coquendamʌ cuenta mumutiyʌcʌsi porque ijtumaj eyata'mbʌ tiyʌ oyeta'mbʌ wa'mis nyajpaquipʌctamupʌ. Juca ja'ne, maŋbamis nyajtocoytyaŋgue'tu yʌ' oyeta'mbʌ tiyʌ, porque nʌ'ʌs ŋguenu que Diojsis wyi'naŋdʌjqui ja'nmis nʌ ndzʌctamu cota'nupʌ tiyʌ.

³ Jamwʌtzʌctamʌ jutzta'm mij ñchamjayaju y tiyʌta'm mis matoŋdamu y sa'sa'c cojamya, pero quipswitu'cuyji'ŋ. Y juca ja'nmis ŋgoquendame cuenta, maŋba'ʌj minjumbʌ'u jujcha' nu'mbawʌ y ja'nmis maŋu mustamu tiyʌ hora'ʌj minjumbʌ'pa.

⁴ Pero mij Sardis-tu'mʌquiuy ijtu metza tuca'y mis ndu'mʌquiu'yojmo jayajyu'quiapʌ's myeque cowa'ojmo. Te'šejta'mbʌ maŋba itjojcʌtʌquiaju ʌji'ŋ popo meque'ojmo porque te'šej pyʌcpa wa'y tyu'ŋajyaju ʌji'ŋ masanda'mbʌ pʌn.

⁵ Iwʌ's ñʌwʌ'ajpa, maŋba yajmequia'yaju popota'mbʌ mequepit, y ja'ʌs maŋu njaytyocoyjayu ñʌy te' libro'ojmo jya'yʌyjayumʌy Diojsis te' iscuy-quengu'yojmo maŋba tyʌjcʌyajupʌ'sñe'. Y maŋba'ʌs ŋgowʌ'aŋjamjayu ñʌy ʌs Ndata's wyi'naŋdʌjqui y 'yangelejsista'm wyi'naŋdʌjqui.

⁶ Iwʌ's ijtyaju quiowi wa'y myatoŋyaju, yajcʌmato'ŋʌya te' Espíritu Santo's 'yoto'ŋʌyajpašej te' Diojsis tyu'mʌquiuytya'm.

Yʌ'šej jyayjayu te' Filadelfia-tu'mʌquiuy

⁷ Y tyujta'y ñaco'mo nʌjaquie'tu'ʌj Cristo's: Jayjaquie'ta te' nʌ quioquenupʌ's Filadelfia-tu'mʌquiuy. Tzamja te' coque'noye y te' tu'mʌquiuy que ʌjte' te' wiyuŋšejpʌ Diojsis Myasanbʌn y que ʌs nʌ'itjayu Davijtis llave, sunba'ʌjte' nʌmu wa'yʌs nyajtʌjcʌyaju aŋgui'mbamʌy Dios. Ʌs jutimʌ'yʌs ya'aŋwajpa, ya'iwʌ's ja'n ya'aŋga'me, y jutimʌ'yʌs ya'aŋga'mba, ya'iwʌ's ja'n musi ya'aŋwaju.

⁸ Tzamjaquie'ta que muspa'ʌs tiyʌta'm mis ndzʌctamba. Yʌtij jeque wojnawya'nde' te' tʌjcʌquiuy nya'aŋwajumʌ'yʌs mijcotoya, ya'iwʌ's ja'n musi ya'aŋga'mupʌ. Y musque'tpa'ʌs que ñempe cʌmaŋ mis mbʌmi, ŋgojamjaytyamumis ʌs ndzame, y ŋgowʌ'aŋjamjaytyamumis ʌs nʌy.

⁹ Yʌtij jeque maŋba'ʌs nwejmiñaju te' tu'mʌyajpapʌ wa'y chʌcjayaju Satanajsis šu'noquiuy. Yʌ'ta'mbʌ nʌmyajpa que judio-pʌnda'mde', y ja'nde' pitta'm, sujchajpapʌte'. Te'ta'mbʌ jeque, maŋba'ʌs nwejmiñaju wa'y minu quiʌna'tzʌ'oyaju mis nwi'naŋdʌjqui wa'y myujšaju que jene sunu'ʌsmij mij, ʌs ndu'mʌquiuy.

¹⁰ Como mbyʌ'mgopajcʌ'oytyamumij toyapʌjcu'yojmo aŋgui'muše'ʌsmij, te'cotoya'ʌsmij maŋba ŋgopʌ'cu ŋgotu'su nu'cu'cande' hora wa'y chʌjquišatʌju toyapit mumu najsacopajcʌsita'mbʌ pʌn.

¹¹ Yʌtij jeque, jʌ'nʌ'amʌj maŋba minu. Pero ʌs ndzameta'm nʌ'itjaytyamupa'mis, cojamjojcʌtʌctamʌ umis maŋu nyajtocoytyamu mista'm ŋgorona te' maŋbamis mbʌjcʌchoŋdamupʌ.

¹² Iwʌ's ñʌwʌ'ajpa, maŋba'ʌs nyajpaquipʌjcu jujcha' oye cʌ'pu'ŋʌyupʌ com tzajpojmopʌ Diojsis tyemplo'ojmo, y ya'iwʌ'sa ja'n musi tyo'pʌ'upʌ teymʌ. Te' comgʌsi maŋba'ʌs nja'yʌyjayu ʌsne' Diojsis ñʌy, y te' ñe' quiumgu'yis ñʌy jomepʌ Jerusalén. Y te' jomepʌ Jerusalén, Diojsiste' chajpojmoc maŋba wyanajcupʌ.

¹³ Iwʌ's ijtyaju quiowi wa'y myatoŋyaju, yajcʌmato'ŋʌya te' Espíritu Santo's 'yoto'ŋʌyajpašej te' Diojsis tyu'mʌquiuytya'm.

Yʌ'šej jyayjayu te' Laodicea-tu'mʌquiuy

¹⁴ Y quiu'ya'y ñaco'mo nʌjaquie'tu'ʌj Cristo's: Jayjaquie'ta te' nʌ quioquenupʌ's Laodicea-tu'mʌquiuy. Tzamja te' coque'noye y te' tu'mʌquiuy que ʌjte' te' pʌn que tiyʌ'ʌs ndzamba ndzʌcpapʌ'ʌste'. Ʌjte' te' jicapyʌ y wiyuŋdzambapʌ testigos. Ʌjpitte' tzo'tzu mumutiyʌ Diojsisñe'.

¹⁵ Tzamjaquie'ta que muspa'ʌs tiyʌta'm mis ndzʌctamba: Ni ja'nmij nwyitu'tame wa'mis ndzactamu mis nwʌ'aŋja'moquiuy ni ja'nmij ñdyu'ŋa'a'ŋʌy wa'mis a'ŋʌytyamu mis nwʌ'aŋja'moquiuy. Más inʌc oye juca nwyitu'tampapʌmijte', witu'tamʌ, y juca ñdyu'ŋajtambapʌmijte' tu'ŋa'a'ŋʌytyamʌ.

¹⁶ Pero como tumʌmʌmyij ittamba, ni ucaŋgʌ'mʌc ja'nmij nwyitu'tame ni wi'na'ŋojmo ja'nmij ñdyu'ŋa'a'ŋʌytyame, ʌs ŋguipswa'mʌs que maŋba'ʌsmij njaŋbejpʌ'chactamu.

¹⁷ Mij jeque, ñʌmdambamij: Ʌs itwa'mʌs mumu ndiyʌ, rico'ajwa'mʌj, y ja'namʌs yajtiyʌcʌsi ŋguene toya. Y te'šejmij ñʌmdamba porque ja'nmis nʌctʌ'ytyame que mij mbyʌnducuta'm mij, ja'ndita'm mis nyajndiyʌ, ñdyumindacata'm mij, ñdyo'tita'm mij y ñicotacata'm mij.

¹⁸ Te'cotoya yʌtij aŋnʌctza'mʌytyamba'ʌsmij wa'mis ʌjpit me'tztamu mista'm ŋgotzojcuy, porque te' cotzojcuy jucʌtʌjcojmo copoŋupʌ orošejpʌte'. Te'wʌte' te' wiyuŋšejpʌ rico'ajcuy Diojsis wyi'naŋdʌjqui. Y aŋnʌctza'mʌytyamba'ʌsmij, yamdamʌ popopʌ mista'm meque wa'mij jana maŋu ncha'ajcuchi'tamu mista'm nicotacapʌ ŋgüerpo's Diojsis wyi'naŋdʌjqui. Tzo'yʌytyamʌ ndzocoy ʌs ndzamepit jaspašejtʌ coliriopit nwitʌm wa'y chojcu.

¹⁹ Otoŋjayajpa'ʌs y ndapšajpa'ʌs ʌs une suñajpapʌ'ʌs. Te'cotoya tziŋitzʌctamʌ nwin y quipswitu'tamʌ.

²⁰ Yʌtij puertaše'ʌs nʌ ŋgocsu mumu tzocoy wa'yʌj ndʌjcʌyu. Iwʌ'sʌj cʌmato'ŋʌpya y ya'aŋwajpa chocoy wa'yʌj ndʌjcʌyu, maŋba'ʌj ŋgomipʌjcu ñe'cʌji'ŋ.

²¹ Iwʌ's ñʌwʌ'ajpa, te'wʌ maŋba'ʌs nyajpocsu ʌji'ŋ wa'ytyʌj tumʌ'aŋgui'mu ʌsne' aŋgui'mʌtʌjcuy-pyocscu'yojmo, jujcha' ʌs nʌwʌ'aju y pocsu'ʌj Ndataji'ŋ ñe' 'yaŋgui'mʌtʌjcuy-pyocscu'yojmo.

²² Iwʌ's ijtyaju quiowi wa'y myatoŋyaju, yajcʌmato'ŋʌya te' Espíritu Santo's 'yoto'ŋʌyajpašej te' Diojsis tyu'mʌquiuytya'm.