El Apocalipsis 21 - Zoque Copainalá New Testament

Te' jomepʌ tzap y te' jomepʌ nas

¹ Y ʌs, Juan, ŋguenu'ʌs jomepʌ tzap y jomepʌ nas, porque yaju te' winbʌ tzap y te' winbʌ nas. Y te' mar ja'ndiya'a.

² Y ŋguengue'tu'ʌs te' masanbʌ cumguy, jomepʌ Jerusalén, nʌ wyanajcupʌ Diojsis chajpojmoc tzi'nmequia'upʌ jujcha' tzoŋbawʌ wa'y quiʌ'tzoŋu jyayaji'ŋ.

³ Y tzajpojmoc matoŋu'ʌs maya'aŋbʌ otowe nʌ ñʌmupʌ: Yʌ' jomepʌ Jerusale'ŋojmo maŋba tyumʌ'ijtu Dios pʌnji'ŋda'm wa'y tyumʌ'itjojcʌtʌjcu mumu jama ñe'cʌji'ŋda'm. Y tey maŋba quioqueñaju y quiopʌ'quiaju porque ñe'cʌ te' ñe'ta'm Dios y te' pʌnda'm ñe' quiumguy.

⁴ Pijche'c maŋba tyʌjtzu mumu pʌ'nis wyitʌm nʌ'. Y ja'na ya'iwʌ quia'e, y ja'na itque'temaj toya, jʌquiuy, ni wejcuy, porque te' yʌpyʌ nascʌsipʌ itcuy yajuwa'nde'.

⁵ Y te' aŋgui'mʌtʌjcuy-pyocscu'yojmo pocsupʌ's nʌjayu'ʌj: Quena Juan, muspa'ʌs njomecotzʌcpʌ'u mumutiyʌ. Y aŋgui'mu'ʌj y nʌmu: Ja'yʌ, porque wiyuŋbʌ y jicapyʌ tiyʌ te' nʌ nʌtzamupʌ tiyʌ'ʌsmij.

⁶ Y nʌjaquie'tu'ʌj: Yʌtij njomecotzʌcpʌ'wa'mʌs. Ʌjte' te' tzo'tzcuy y te' co'yajcuy, porque ʌjpit tzo'tzu mumutiyʌ y ʌjpit maŋba yaju mumutiyʌ. Y nʌ yoctʌjtzupʌ coyowataca'ʌs maŋba nyajnʌ'to'ŋu te' wombamʌy nʌ', te' yospapʌ ja'n yayepʌ quenguquiotoya.

⁷ Iwʌ's ñʌwʌ'ajpa, te'wʌ's maŋba ñʌtzʌ'pyʌ'u mumutiyʌ. Te'wʌte' ʌs une y ʌjte' te' ñe' Dios.

⁸ Pero te' mochcʌtʌŋyajpapʌ y te' ja'n wyʌ'aŋja'moyapyʌ, y te' mʌjša'ŋda'mbʌ pʌn, y te' yajca'oyajpapʌ, y te' ispʌquitzʌquiajpapʌ, y te' brujota'mbʌ, y te' quiʌna'tzʌyajpapʌ's comichʌqui y jujche'ŋ sujchajpapʌ, mumu maŋba quiojtyatʌju jucʌtʌcpʌ laguna'ojmo azufre's nʌ ñʌnemupʌ. Te'wʌte' te' myetzo'mopʌ ca'aŋ.

Te' jomepʌ Jerusalén

⁹ Y cʌ'minu'ʌj tumʌ te' cu'ya'pyo'mocpʌ angelejsis, te' pyʌjcʌchoŋyajupʌ's te' cu'ya'pyʌ taza jo'ʌyajupʌ inʌc último maya'aŋbʌ toyapʌjcupyit. Y oto'ŋʌyu'ʌj y nʌmu: Juan, minʌ yʌy, ʌsmij maŋba nyajquenu te' tzoŋbawʌ, te' Diojsis Ñchowambe's yomo.

¹⁰ Yʌ' angelejsis yajquenu'ʌj quene'ojmo que nʌ'ʌj nʌmaŋu ye'ŋupʌ y maya'aŋbʌ cotzʌjcʌsi, y teyma'ʌj yajquenu Espíritu Santo's te' maya'aŋbʌ y masanbʌ cumguy Jerusalén, Diojsis chajpojmoc nʌ wyanajcupʌ.

¹¹ Qui'toŋba inʌc nʌ'c minu Diojsis chi'muŋgʌji'ŋ. Y te' qui'toŋgʌ' wʌwʌ coyowapʌ jaspe-tza'šej inʌc qui'toŋba y sʌ'ŋjojpajcu jujcha' cristal.

¹² Y te' jomepʌ Jerusale'ŋis ijtu inʌc ye'ŋupʌ y mʌjapʌ cha'no'tze macwʌstʌjca'pyʌ's tyʌjcʌquiuy y tumdumʌ tʌjcʌquiu'yoyj tumʌ ángeles. Y tumdumʌpʌ tʌjcʌquiu'yaŋi tey inʌc ja'yʌyu tumdumʌpʌ Israe'lis 'yune'sta'm ñʌy.

¹³ Tuca'y inʌc tyʌjcʌquiuy te' cumgu'yisñe' tzotpamʌc jama, y tuca'y minbamʌc pacac sawa, y tuca'y minbamʌc jama sawa, y tuca'y tʌ'pamʌc jama.

¹⁴ Y te' cumgu'yis cha'no'tze'ojmo ijtu inʌc macwʌstʌjca'y aŋguinʌ-jequiajupʌ tza'cowi'na y tumdumʌpʌ tza'cʌsi, tey inʌc ja'yʌyu nʌy tumdumʌpʌ cʌ'we'ista'mñe', Ñchowambe Jesucristo's quiʌ'wejyajupʌ.

¹⁵ Te' ʌji'ŋ inʌc nʌ chamdzamnayupʌ's ñʌ'ijtu inʌc tumʌ oropʌ mujcoquiuy wa'y myujcu te' cumguy, y wa'y myucjayu te' tyʌjcʌquiuytya'm y te' cha'no'tze.

¹⁶ Y te' cumguy macšcu'y aŋguinʌpʌte', y pyʌ'yajcʌše'ŋ te'še'ŋdijque' inʌc pye'cha'cʌ'. Y yʌ' angelejsis myujcu te' cumguy te' myujcoquiupyit, tumʌ mone-co-majqui's legua. Te' pyʌ'yajcʌ' y te' ye'ŋa'cʌ' y te' pye'cha'cʌ' tu'mbacta'm inʌc.

¹⁷ Pijche'ca myujcu te' tza'no'tze tuqui's-co-tujta'y metro. Myujquiajpašej pʌ'nista'm, te'šej myujcu te' angelejsis.

¹⁸ Y tujcupʌpit te' tza'no'tze, tzi'muŋyajpapʌ jaspe-tza'pitte' tujcu. Pero te' cumguy cʌ'winbʌ oropʌte' y qui'toŋba inʌc jujcha' limpiopʌ espejo.

¹⁹ Y te' cumgu'yis ño'tze'ojmo ijtyajupʌ tza'cowi'nacʌsi, nottʌjcʌyu inʌc wi'ni eya tzi'muŋyajpapʌ tza' wʌwʌ coyowata'mbʌ. Y te' winbʌ tza'cowi'na, jaspe-tza'te', y te' myetzo'mo zafiro, y tyuca'yojmo ágata, myacšcu'yojmo esmeralda,

²⁰ myosa'yojmo ónice, tyujta'yojmo cornalina, quiu'ya'yojmo crisólito, tyucutujta'yojmo berilo, myacstujta'yojmo topacio, majca'yajcuy crisopraso, myactuma'yajcuy jacinto, y myacwʌstʌjca'yajcuy amatista.

²¹ Y te' macwʌstʌjca'pyʌ tʌjcʌquiuy, macwʌstʌjca'pyʌ perlaste', y tumdumʌpʌ tʌjcʌquiuy tumdumʌpʌ perlaste'. Y te' cumgu'yis jyojtuŋ cʌ'winbʌ oropʌte', sʌ'ŋgʌtʌcpapʌ jujcha' espejo.

²² Y tey jaŋguiena'ʌs templo porque tʌ Ngomi Dios, muspapʌ's chʌjcu mumutiyʌ, y te' Ñchowambe Jesucristo, ñe'cʌta'mde' te' templo.

²³ Te' jomepʌ Jerusale'ŋojmo ja'ndiya' pyena wa'y ijtu jama ni poyaj wa'y šʌ'ŋyaju teymʌ, porque teymʌ sʌ'ŋjojpacpa te' Diojsis chi'muŋgʌ', y te' ñe' Ñchowambe, te'wʌte' te' sʌ'ŋgʌtzʌjcopyapʌ.

²⁴ Y jujche'ŋ nación cotzoquiajupʌ, yʌ' jomepʌ Jerusale'ŋis šʌ'ŋgʌ'ojmo maŋba wyijtyaju. Y jujche'ŋ rey cotzoquiajupʌ, te'ta'mbʌ's maŋba myʌja'ŋwʌcotzamyaju y maŋba ñʌmaŋyaju cʌna'tzʌ'oquiuy te' cumgu'yojmo.

²⁵ Y te' tʌjcʌquiuytya'm nunca ja'n maŋu 'yaŋgʌyu jama's wyi'noyj. Y tey ja'na maŋu chu'yanʌmu.

²⁶ Y nacio'ŋista'm maŋba myʌja'ŋgotzamyaju y maŋba ñʌmaŋjayaju cʌna'tzʌ'oquiuy te' cumgu'yojmo.

²⁷ Teymʌ ja'n maŋu tyʌjcʌyu yu'cupʌ tiyʌ, ni te' chʌquiajpapʌ's mʌjša'ŋda'mbʌ tzʌqui, ni sujchajpapʌ. Tey maŋba tyʌjcʌyaju na' te' ja'yʌyajupʌ's ñʌy Ñchowambe's ñʌ'ijtupʌ libro'ojmo, ja'yʌyajumʌy ñʌy te' iscuy-quengu'yojmo maŋba tyʌjcʌyajupʌ'sñe'.