El Apocalipsis 13 - Zoque Copainalá New Testament

Te' metza cʌ'soyajpapʌ copʌn

¹ Tenayu inʌjcʌj ma'ris 'yacapoyo'oyj y ŋguenu'ʌs nʌ qui'mbujtu'c ma'rojmoc tumʌ copʌn. Y ijtu inʌc cu'ya'y quiopac y majca'y wya' y tumdumʌpʌ wya'cʌsi ijtu inʌc tumʌ corona y tumdumʌpʌ quiopajcʌsi ijtu inʌc nʌy 'yotowewʌ'ajapyapʌ's Dios.

² Y te' ŋguenupʌ copʌ'nʌs mʌja caŋšej inʌc quenba, y te' ñe'ŋbac oso'sñe'šej inʌc, y 'yaŋnaca tzapas ca'ŋisñe'šej inʌc. Y te' drago'ŋis chi'u ñe' pyʌmi y aŋgui'mʌtʌjcuy-pyocscuy wa'y 'yaŋgui'mu pyʌmi'ojmo.

³ Y ŋguenu'ʌs tumʌ te' copac te' copʌ'nisñe' na'chaŋbʌ's jyete, maŋbapʌ's inʌc yajca'u, pero te' na'chaŋbʌ jyete tzojcu. Y mumu najsacopajcʌsita'mbʌ's ñʌmaya'yaju y quio'ŋyaju te' copʌn.

⁴ Y quiʌna'tzʌyaju te' dragón, te' chi'upʌ's pʌmi te' copʌn, y quiʌna'tzʌyaju te' copʌn y nʌmyaju: ¿Iwʌ'sasʌ'ŋ ñʌtu'mbajcajpa yʌ'wʌ, y iwʌ'sasʌ'ŋ muspa ñʌquijpu yʌ'šejpʌ copʌn?

⁵ Y jayajwinduquia te' copʌn wa'y chamu maya'aŋda'mbʌ tiyʌ y wa'y 'yotowewʌ'ajayu Dios. Y chi'yaju aŋgui'mʌtʌjcuy wa'y yojsu wʌstʌjqui's-co-metza poyaj.

⁶ Y ya'aŋwaju 'yaŋnaca wa'y 'yotowewʌ'ajayu Dios y Diojsis ñʌy, y ñe' šantuario, y wa'y 'yotowewʌ'ajayaju te' tzajpojmo ijtyajupʌ.

⁷ Y chi'yaju lugar te' copʌn wa'y ñʌquipyaju Diojsis myasanbʌnda'm, hasta wa'y wyʌyaju. Te'šejtij chi'yajque'tu wa'y 'yaŋgui'myaju mumu raza, jujche'ŋ najsacopac-iti, wi'ni eya otoweta'mbʌ y mumu nacio'ŋojmota'mbʌ.

⁸ Y te' copʌn quiujnayjayaju jujche'ŋ najsacopac-iti'sta'm ja'ndita'mbʌ's ñʌy ja'yʌyupʌ Ñchowambe's ñʌ'ijtupʌ libro'ojmo. Desde que tujcu yʌ' najsacopac, tey te' libro'ojmo ja'yʌyaju ñʌy te' iscuy-quengu'yojmo maŋba tyʌjcʌyajupʌ'sñe'. Y yʌ' Ñchowambete' yajca'yaju desde pijche'c.

⁹ Iwʌ's ijtyaju quiowi wa'y myatoŋyaju, yajcʌmato'ŋʌya Dios.

¹⁰ Iwʌ's quiotpa tyʌwʌ preso'mo, te'šejtij maŋba quiojtyajque'tu ñe'cʌ. Iwʌ yajca'opya espadapit, ijtu pyena wa'y espadapit yajca'yajque'tu. Yʌtij jeque pyʌcpa wa'y yajquejyaju te' wyʌ'aŋja'moquiuy te' masanbʌ'nista'm y wa'y pyʌ'mgopajcʌ'oyaju mumutiyʌcʌsi.

¹¹ Jʌsa'ca ŋguengue'tu'ʌs eyapʌ copʌn najsojmoc nʌ wyombujtupʌ. Y ijtu inʌc metza wya' ñchowambe'sñe'šejpʌ, pero dragonšej inʌc tzamdzamnapya.

¹² Y te' winbʌ copʌ'nis inʌc 'yaŋgui'mʌtʌjcuy yajyosjapya yʌ' metza wa'pʌ copʌ'nis te' winbʌ copʌ'nis wyi'naŋdʌjqui. Y quiojtu aŋgui'mguy wa'y quiʌna'tzʌyaju jujche'ŋ najsacopac-iti's te' winbʌ copʌn, te' tzojcupʌ's jyete maŋbapʌ's inʌc yajca'u.

¹³ Y chʌcpa maya'aŋda'mbʌ isaŋwʌ'ajcuy, cosaque'cše'ŋoyj yajwanacpa jucʌtʌc tzajpojmoc yʌ' najsacopajcʌsi pʌ'nista'm wyi'naŋdʌjqui.

¹⁴ Y 'yaŋgoma'cʌ'pya najsacopac-iti te' chi'yajupʌ señalpit wa'y chʌjcu te' winbʌ copʌ'nis wyi'naŋdʌjqui. Y 'yaŋgui'mba najsacopac-iti wa'y chʌcjayaju quiendʌwʌ te' winbʌ copʌ'nisñe', te' ijtupʌ's espada-jete, y jaquia'ʌ.

¹⁵ Y chi'yaju lugar wa'y šu'ʌyjayu je'e te' copʌ'nis quiendʌwʌ wa'y chamdzamnayu te' copʌ'nis quiendʌwʌ. Y jujche'ŋ ja'n suni quiʌna'tzʌyupʌ's te' copʌ'nis quiendʌwʌ, pyʌcpa wa'y yajca'yaju.

¹⁶ Y te' copʌn aŋgui'mu wa'y myarca'ʌyaju mumu pʌn tzʌ'naŋbʌ quiʌ'ojmoc o wyinbactza'cʌsi, aŋnamaŋda'mbʌ, mʌja'ŋda'mbʌ, y rico, pobre, librepʌ y mozota'm.

¹⁷ Y ja'n inʌc chi'yay lugar ya'iwʌ wa'y jyu'yoyu o wa'y mya'aju juca ja'nde' te' marcatzʌquiajupʌ te' copʌ'nis ñʌpyit o ñumeropit.

¹⁸ Yʌy pyʌcpa mujsoquiuy: Iwʌ nʌctʌ'yopya, yajmayja te' copʌ'nis ñumero porque te' número, pʌ'niste' quiowindzʌmba. Te' copʌ'nis ñumero seiscientos sesenta y seiste'.