El Apocalipsis 1 - Zoque Copainalá New Testament

Jesucristo's yajqueñajupʌ tiyʌ te' San Juan

¹ Yʌ'šejta'mbʌ tiyʌ yajquenu Diojsis te' Jesucristo wa'y yajqueñajque'tu ñe' quioyosata'm tiyʌta'm pyʌcpa jʌ'nʌ'a wa'y tyujcupʌ. Y Cristo's quiʌ'weju 'yangeles wa'yʌj tza'maŋwajayu, ʌj Juan, ñe' quioyosa.

² Y ʌs ŋgotestigosajapya'ʌs Diojsis chame y Jesucristo's chambašej y mumu tiyʌta'm ʌs ŋguenu.

³ Dichoso iwʌ's tyu'nba yʌ' tza'maŋwa'oquiuytyoto wʌwʌ pʌ'nis wyi'naŋdʌjqui, y iwʌ'sta'mis myatoŋyajpa y quiojamyajpa tiyʌta'm ja'yʌyu yʌ' totocʌsi, porque nʌwa' tyo'mʌyu wa'y tyujcu yʌ'šejta'mbʌ tiyʌ.

Jyayjayajušej Jua'ŋis te' cu'ya'ytya'mbʌ tu'mʌquiuy

⁴ Ʌs Juan, nʌ'ʌsmij njayjaytyamu yʌ' ŋguenupʌ tiyʌ'ʌs, mijta'm te' cu'ya'ytya'mbʌ Diojsis tyu'mʌquiuy Asia-najsojmo ijtyajupʌ. Sunba'ʌs wa'y itjojcʌtʌjcu mi'ojmota'm yajya'moquiuy y sʌ'mnaquiuy tzi'papʌtʌ tʌ Ngomi Diojsis y ñe' cu'ya'pyʌ Espiritu's. Tʌ Ngomi Dios, jeque, ñe'cʌte' te' ijtupʌytya' inʌc, yʌtij tzajpojmo ijtupʌ, te' maŋba minupʌ. Y ñe' cu'ya'pyʌ Espíritu, Diojsis aŋgui'mʌtʌjcuy-pyocscu'yis wyi'naŋdʌjqui ijtyaju.

⁵ Te'šejtʌ tzi'que'tpa Jesucristo's, te' jicapyʌ testigujsis, te' winbʌ winsa'upʌ ca'yajupʌ'ojmoc pʌngotoyata'm. Te'wʌte' te' cowi'na najsacopajcʌsita'mbʌ re'yisñe'. Mʌja'ŋgotzamda'mitʌy yʌ' Cristo, te' sundambapʌ'stʌ, te' yajcotocoyjayupʌ's tʌ ŋgowa 'yumbʌ'u'c ñʌ'pin tʌcotoyata'm.

⁶ Y ñe'cʌ'stʌ cottamu reyšej y sacerdotešej wa'ytyʌ nyosjaytyamu Dios ñe' Tyataj. Mʌja'ŋgotzamda'mitʌy jeque Cristo. Mumu jama'c ñe'cʌ's yajnʌ'itʌ te' aŋgui'mʌtʌjcuy. Amén.

⁷ Ñe'cʌ jeque, maŋba minu o'na'ojmo y mumu pʌ'nis maŋba quienu y hasta te' wyojchajupʌ's. Y jujche'ŋ najsacopac-iti's maŋba jyʌyjayaju. Jʌ'ʌ, te'šej yajtucʌ. Amén.

⁸ Nʌmba tʌ Ngomi Dios: Ʌjte' te' tzo'tzcuy y te' co'yajcuy, porque ʌjpit tzo'tzu mumutiyʌ y ʌjpit maŋba yaju mumutiyʌ. Y ʌjte' te' ijtupʌytya' inʌc y yʌtij tzajpojmo'ʌj ijtu, y jʌsa'ca maŋba'ʌj minwʌtzʌjque'tu najsacopajcʌsi. Y ʌste' ndzʌcpa mumutiyʌ.

Quene'ojmo quienu Jua'ŋis te' mʌja'ŋbʌ Cristo

⁹ Ʌj Juan, mista'm atzi, tumʌ'ajcu'yoyjtyʌ yacsnutzʌcʌtʌjtamba, y Jesucristo'stʌ cotzoŋba'ŋmʌjcʌ, mbʌ'mgopajcʌytyambatʌ yacsnutzʌjcuy. Y te' aŋgui'mbamʌy Dios, ʌs maŋba ijtu ʌs mbarte miji'ŋda'm. Ʌj jeque, Patmos-isla'ojmo'ʌjyʌ' inʌc ijtu ma'racucmʌ ijtupʌ najsojmo. Teymʌ'ʌj cojtyaju porque ndzamgopuŋjapya'ʌs te' Diojsis chame y porque ŋgotestigosajpa'ʌs te' Jesucristo.

¹⁰ Tʌ Ngomi's jyamo'oyj ñe' 'Yespiritu'sʌj cotjayu nwitʌ'ma'ŋoyj quene y matoŋu'ʌs ucaŋgʌ'mʌc maya'aŋ nʌ 'yaŋjʌyupʌ otowe jujcha' mu'cu'yisñe'.

¹¹ Nʌ inʌc ñʌmu: Ʌjte' te' tzo'tzcuy y te' co'yajcuy, porque ʌjpit tzo'tzu mumutiyʌ y ʌjpit maŋba yaju mumutiyʌ. Ja'yʌ librocʌsi nʌmis ŋguenupʌ tiyʌ y cʌ'weya Asia-najsojmo ijtyajumʌy cu'ya'ytya'mbʌ Diojsis tyu'mʌquiuy, te' Efeso'ojmo, te' Esmirna'ojmo, te' Pergamo'ojmo, te' Tiatira'ojmo, te' Sardisojmo, te' Filadelfia'ojmo y te' Laodicea'ojmo.

¹² Pijche'ca quenwitu'u'ʌj wa'yʌs ŋguenu iwʌ'sʌjte' nʌ oto'ŋʌyu, y de que quenwitu'u'ʌj, ŋguenu'ʌs cu'ya'y orota'mbʌ no'a-sʌ'ŋguy.

¹³ Y te' cu'ya'pyʌ no'a-sʌ'ŋguquiucmʌ ŋguenu'ʌs tuma'ŋbʌn, Pʌ'nis 'Yunešej quenbapʌ, pʌpyʌ's pyama ñe'ŋbajcojmošej nu'cpapʌ, y quiʌpijta'u inʌc quiucpajcʌsi oropʌ wajtoquiuy.

¹⁴ Y te' quiopajcojmopʌ wyay, popo inʌc jujcha' tzowa y tza'tuj, y wyitʌm jujcha' jucʌtʌc-nema.

¹⁵ Y ñe'ŋbac, tzapas tʌ'ŋguyšej inʌc qui'toŋba jujcha' te' tʌ'ŋguy nʌmaj ñʌpujtyajupʌ jucʌtʌjcojmo, y 'yotowe jujcha' pʌmi-nʌ'is šowocʌ.

¹⁶ Y chʌ'naŋbʌ quiʌ'ojmoc cho'ŋaju inʌc cu'ya'y matza. Y 'yaŋnaco'moc nʌ inʌc pyujtu mejtza'ŋ wi'napʌ espada. Y wyinnaca mero nʌ ñembocsupʌ jamašej inʌc.

¹⁷ Y te' ŋguenu'cʌs, ca'uwʌše'ʌj cunu ñe'ŋbajcʌ'y. Y ñe'cʌ's quiojtu chʌ'naŋbʌ quiʌ' ʌjcʌsi y nʌjayu'ʌj: Uy na'tze. Ʌjte' te' winapʌ y te' ultimopʌ,

¹⁸ y ʌj quenbama'ʌj, ñempe tumnaca tiju'ʌj ŋga'u y winsa'que'tuti'ʌj y yʌtij quenba'ʌj mumu jamacotoya. Te'še'ande' tujcu. Te'cotoya ʌs nʌ'ijtu llave, sunba te' ñʌmu aŋgui'mʌtʌjcuy te' ca'yajupʌcʌsita'm y te' ijtyajumʌy ca'yajupʌ.

¹⁹ Ja'yʌ jeque tiyʌta'm mis ŋguenwa'a, y te' yʌtijta'mbʌ tiyʌ y jujche'ŋ maŋbamaj tyuquiajupʌ tiyʌ jʌsa'ca.

²⁰ Maŋba'ʌs ndza'maŋwaju te' cu'ya'pyʌ matza ŋguenupʌmis ndzo'ŋaju'ʌs tzʌ'naŋbʌ ŋgʌ'pit, y te' cu'ya'pyʌ no'a-sʌ'ŋguy orota'mbʌ: Te' cu'ya'pyʌ matza, tzʌcʌ cuenta nʌmis ŋguenu cu'ya'ytya'mbʌ coque'noye nʌ quioqueñajupʌ's te' cu'ya'ytya'mbʌ Diojsis tyu'mʌquiuy. Y te' cu'ya'pyʌ no'a-sʌ'ŋguy, tzʌcʌ cuenta nʌmis ŋguenu cu'ya'ytya'mbʌ tu'mʌquiuy Diojsisñe'.