Efesios 1 - Zoque Copainalá New Testament

Jyayjayajušej Pablo's te' Efeso'ojmota'mbʌ wʌ'aŋja'moye

¹ Ʌjte' te' Pablo, Jesucristo'sʌjyʌ' quiʌ'wej Diojsis šu'noquiupyit. Atzita'm, nʌ'ʌsmij njayjaytyamu mijta'm, Diojsis pyʌnda'm wyʌ'aŋjamyajpapʌ's Cristo Jesús tey Efeso-cumgu'yojmo.

² Sunba'ʌs wa'mij nyajyamdamu y wa'mij ñchi'tamu sʌ'mnaquiuy tʌ Ndata Diojsis y tʌ Ngomi Jesucristo's.

Espiritu'ojmopʌ nicomasa'nʌquiuy Cristopit

³ Wʌcotzamda'mitʌy Dios, tʌ Ngomi Jesucristo's Tyataj. Como tumʌtzʌctamutʌ Cristoji'ŋ, Diojsis yajpaquipʌcjapya tʌta'm nwʌ'aŋja'moquiuy y nʌctʌ'yoquiuy mumu oyeta'mbʌ tiyʌcʌsi jujcha'ndʌ tzajpojma' ittamu'cšej.

⁴ Maŋba'cmaj chʌjcu'c Diojsis yʌ' najsacopac, copiŋdamutʌ porque myujsu que maŋbatʌ inʌc yajcotzoctamu Cristopit. Copiŋdamutʌ jeque wa'ytyʌ masanbʌ mbʌnbuttamu y wa'ytyʌ ŋgowajtamu ŋgowapit ñe' wyi'naŋdʌjqui.

⁵ Porque Diojsistʌ jene sundamu'ŋmʌjcʌ, copiŋdamutʌ antestij wa'ytyʌ ñe' 'yune'ajtamu. Ñe'cʌ's šunušej, minutʌ 'yune'ajtamu Jesucristopit.

⁶ Te'cotoya wʌcotzamda'mitʌy Dios porque sa'sapʌte' te' ñe' yajya'moquiuy. Jenetʌ yajyamdamba jeque porque ñe' šunbapʌ 'Yune'stʌ yajcotzojcu.

⁷ Ca'u'c te' 'Yune Jesucristo cruzcʌsi, jupyujtutʌ ñe' ñʌ'pinbit. Y ñe'cʌpit Diojsis yajcotocoyjapya tʌ ŋgowa, porque aŋba'tepʌte' te' ñe' yajya'moquiuy.

⁸ Y te' yajya'moquiupyit Diojsistʌ tzi'tamba mujsoquiuy y nʌctʌ'yoquiuy mumutiyʌcʌsi.

⁹ Diojsis nʌtʌ yajmustamu tiyʌta'm quipsu y šunu wina wa'y chʌjcu, te' jayajqueyapʌ tiyʌ ya'ajca. Yajmustambatʌ tiyʌta'm quipsu wa'y chʌjcu Cristopit.

¹⁰ Y wina quipsušej Diojsis, te'šej maŋba chʌjcota'nu mumutiyʌ nu'cu'cande' aŋsʌŋ. Cristopit maŋba yajtumʌtzʌjcu mumutiyʌ ñe'cʌcotoya, te' najsacopajcʌsita'mbʌ tiyʌ y te' tzajpojmota'mbʌ.

¹¹ Te' Dios, chʌcpapʌ's ñe'cʌ's quipspašej y šunbašej, copiŋdamutʌ antestij wa'ytyʌ ñe' 'yune'ajtamu Jesucristopit.

¹² Y tʌs, jujche'ŋ judio-pʌ'nis, nwʌ'aŋjamutʌs tʌ Ngomi Jesucristo más wina que ja'n eyata'mbʌ's. Y Diojsistʌj copiŋu wa'y yajqueju ñe' myʌja'ŋajcuy tʌjpit wa'y mumu pʌ'nis wyʌcotzamyaju ñe'cʌ.

¹³ Te'šejtijque' Diojsismij 'yune'ajtamu mijta'm Jesucristopit. Matoŋdamu'cmis te' wiyuŋbʌ evangelio, chambapʌ's jutztʌ cotzocpa, pijche'cmis nwʌ'aŋjamdamu tʌ Ngomi Jesucristo. Y chamdzi'oquia'ušej Diojsis, te'šejmij ŋguiʌ'wejaytyamu te' Espíritu Santo wa'y ijtu mis ndzoco'yojmota'm wa'y quieju que ñe'mijyʌ'ta'm.

¹⁴ Diojsistʌ prendatzʌcjayu wina te' Espíritu Santo wa'ytyʌ mustamu que maŋbatʌ mbʌjcʌchoŋdamu tʌ mbarte tiyʌ jama Diojsistʌ yajcotzojcoctuctamba. Te'šej maŋba chʌjcu Diojsis te' ñe' pyʌngotoyata'm wa'y mumu pʌ'nis wyʌcotzamjayaju ñe' myʌja'ŋajcuy.

Wya'cpa Dioscʌsi Pablo's wa'y chi'yaju mujsoquiuy wʌ'aŋja'moyeta'm

¹⁵ Matoŋwa'mʌs que mista'm nwʌ'aŋjamdambamis tʌ Ngomi Jesús y que jene sundambamis mumu masanbʌnda'm.

¹⁶ Te'cotoya jujche'ŋ naca'ʌs oto'ŋʌpya Dios mijcotoyata'm, nʌmba'ʌj: Yʌscotoya chʌcpa Diojsis.

¹⁷ Nwa'cjapya'ʌs Dios wa'y ñe' 'Yespiritu'smij wa'y nyajnʌctʌ'ytyamu tiyʌta'm mij nyajquendambapʌ wa'mis te'šej ispʌctamu oye'c tʌ Ngomi Jesucristo's Dios, tʌta'm mʌja'ŋbʌ Ndataj.

¹⁸ Y nwa'que'tpa'ʌs wa'y yajsʌ'ŋjayu Diojsis mista'm nʌctʌ'yoquiuy wa'mis nʌctʌ'ytyamu oye que Diojsismij nwyejtamu wa'mis njo'ctamu te' ñe'cʌ's chamdzi'oquia'upʌ tiyʌ. Y nwa'que'tpa'ʌs wa'mis nʌctʌ'ytyaŋgue'tu que te' mista'm mbarte Diojsis wyi'naŋdʌjqui sa'sapʌ y mʌja'ŋbʌ tiyʌte'. Y yʌ'šejta'mbʌ tiyʌ maŋba chi'yaju Diojsis mumu ñe' pyʌnda'm.

¹⁹ Nwa'que'tpa'ʌs wa'mis nʌctʌ'ytyaŋgue'tu que te' mʌja'ŋbʌ Diojsis pyʌmi'stʌ cotzoŋdamba mumutiyʌcʌsi. Y nwʌ'aŋjamdambatʌ tʌta'm ñe'cʌ. Y muspatʌ que chʌcwa'a Diojsis maya'aŋbʌ isaŋwʌ'ajcuy ñe' pyʌmipit

²⁰ yajwinsa'u'c te' Cristo ca'yajupʌ'ojmoc y yajpocspajcu ñe' chʌ'na'ŋoyj nimeque'ctijpʌ mʌja'ŋajcu'yojmo, te' ʌmʌ tzajpojmo.

²¹ Diojsis yajmʌja'ŋaju jeque te' Cristo wa'y ijtu 'yaŋgui'mʌtʌjcuy mumutiyʌcʌsi, mumu jutzta'mbʌ aŋgui'myajpapʌcʌsi y mumu cowi'nacʌsita'm y aŋnama'ŋ y mʌja'ŋda'mbʌ co'aŋgui'moyecʌsita'm, ñempe yʌy najsacopajcʌsi y teymʌ tzajpojmo ijtyajupʌcʌsita'm.

²² Te'šej quiojtu Diojsis te' Cristo wa'y 'yaŋgui'mu mumutiyʌ y wa'y quiowi'na'u ñe' wʌ'aŋja'moye-tu'mʌquiuquiʌsi.

²³ Te' Diojsis tyu'mʌquiuy, tzʌctamʌ cuenta jujcha' tumʌpʌ cuerpo, y Cristo jujcha' te' cuerpo's quiopac. Y Cristo cota'nbʌ'pa ñe' tyumʌquiuyji'ŋ y itjojcʌtʌcpa mumujutʌ.