Colosenses 3 - Zoque Copainalá New Testament

¹ Como ñdyumʌtzʌctamumij jeque Cristoji'ŋ ñe' wyinsa'cu'yojmo, cottamʌ ndzocoy tzajpojmo ijtyajupʌ tiyʌcʌsi pocspajcumʌy Cristo Tata Diojsis chʌ'na'ŋoyj mʌja'ŋajcu'yojmo.

² Cottamʌ ŋguipsoquiuy jeque tzajpojmo ijtyajupʌ tiyʌcʌsi y ja'n yʌy nascʌsita'mbʌ tiyʌcʌsi.

³ Porque ñdyumʌtzʌctamwa'mij Cristoji'ŋ ñe' quia'a'ŋojmo y yʌtij Cristo Diosji'ŋa ijtu y ñe'cʌ'smij ñchi'tamba iscuy-quenguy.

⁴ Cuando minba'ca Cristo, te' tzi'papʌ'stʌ iscuy-quenguy, pijche'cmij maŋba ŋguieñajque'tu mijta'm ñe'cʌji'ŋ ñe' myʌja'ŋajcu'yojmo.

Tʌta'm pecapʌ itcuy y te' jomepʌ

⁵ Te'cotoya yajʌcʌ'tamʌ mis ne'ta'm yatzipʌ su'noquiuy ndzoco'yojmo: te' ispʌquitzʌjcuy, te' tzi'sʌmguy, te' jaragan itcuy y eyata'mbʌ tiyʌ mʌjša'ŋda'mbʌ. Y uy aŋsundame yatzita'mbʌ tiyʌ ni uy ni'aŋsundame ndʌwʌ porque juca te'šej mis ndzʌctamba, ja'nmis nʌ sundamu Cristo pyʌcpašej.

⁶ Te'cotoya maŋba yajnʌco'aŋgʌyaju Diojsis te' ja'n myato'ŋoyjayapyʌ's ñe'cʌ porque chʌquiajpa te'šejta'mbʌ tiyʌ.

⁷ Ñdye'šejta'm mij inʌc mijta'm wina, ndzʌctambamis inʌc te'šejta'mbʌ tiyʌ porque nʌmis inʌc ŋgo'ŋdamu mista'm yatzipʌ nwi'nis šu'noquiuy.

⁸ Pero yʌtij jeque tzactamʌ yʌ'šejta'mbʌ tiyʌ: qui'šca'cuy y mawʌqui'šca'cuy. Y uy ŋgui'nistame ndʌwʌ ni uy nisujtzʌytyame ni uy otowewʌ'ajaytyame ya'iwʌ mista'm ndzamdzamnaquiuquiʌsi.

⁹ Como ndzactamwa'mis mista'm yatzipʌ nwi'nis šu'noquiuy ndzʌctambašejmis inʌc wina, ja'n 'yoye yʌtij wa'mis sutzjaytyamu yʌ'wʌ te'wʌ.

¹⁰ Y como mbʌjcʌchoŋdamwa'mis te' njyomecotzʌctamupʌ'smij, maŋbamis aŋmayjojcʌtʌctamu jutz wa'mij ñdyu'mbajcajtamu y wa'mij ñdyuctamu jujcha'nde' njyomecotzʌctamupʌ'smij.

¹¹ Como njyomecotzʌctamwa'mij, ñdyumo'ytya'mamij. Y Cristo itpa mumu ñe' pyʌnji'ŋda'm y tyumʌcotzʌcpʌ'pa wa'y jana ijtu ni griego ni judio-pʌn, ni te' circuncidatzʌjcupʌ ni te' jašircuncidatzʌcʌpʌ, ni te' witi ni te' pagano, ni te' mozo ni te' librepʌ.

¹² Como Diojsismij ŋguiopiŋdamu y nyajmasa'najtamu y šundamu, pyʌcpa wa'mis te'šej ndo'ya'ŋʌytyamu ndʌwʌ, wa'mis ndzʌcjaytyamu bien mumutiyʌcʌsi, wa'mis nyajyumi'ajtamu ne' nwin y ne' ndzocoy ñe' wyi'naŋdʌjquita'm y wa'mis nʌmaŋjayaju paciencia.

¹³ Juca ijtu tiyʌ'iwʌ qui'šca'cuy mi'ojmota'm, napyʌ'mgopajcʌtʌjtamʌ ne'co'mota'm y yajcotocoytyamʌ ndʌwʌ ne'co'mota'm. Te' nyajcotocoytyamušejmij Cristo's, te'šej yajcotocoytyamʌ mista'm ndʌwʌ.

¹⁴ Y nʌtu'ŋajtamʌ nimeque'ctij te' tʌwʌ-sunguy porque te'šejtʌ muspa nʌtu'ŋajtamu mumu oyeta'mbʌ tiyʌ porque te'šejtʌte' nyajcota'nba.

¹⁵ Y tzi'tamʌ lugar Cristo, ñe'cʌ's wa'y yajsʌ'mjaytyamu mista'm ndzocoy, porque te'šej šunba ñe'cʌ's wa'mij ñdyumʌtzʌctamu y wa'mij ittamu sʌ'mnaquiu'yojmo. Y nʌmdamʌ: Yʌscotoya chʌcpa Diojsis.

¹⁶ Ya'itjojcʌtʌcʌ Cristo's chame mista'm ndzoco'yojmo. Y te'šej muspamis na'yaŋmayʌtʌjtamu y nachamjatʌjtamu te' tzajpojmopʌ mujsoquiuy. Y wandamʌ salmo y himno y eyata'mbʌ wane Espíritu Santo'smij 'yaŋmayajpapʌ, te'šej wa'y quieju que mis ndzoco'yojmo nʌmij ñʌmdamu: Yʌscotoya chʌcpa Diojsis.

¹⁷ Tiyʌta'm mis ndzamdamba y tiyʌta'm mis ndzʌctamba, tzʌctamʌ mumu tʌ Ngomi Jesujsis ñʌquiʌsi. Y nʌ'cmis ndzʌctamu, nʌjaytyamʌ tʌ Ndata Dios: Tatay, yʌscotoya mis ndzʌjcu, ŋgʌ'wejumis te' Cristo.

Jutz pyʌcpa wa'y tyu'ŋajyaju tyʌwʌ'ojmo Cristo-wʌ'aŋja'moye

¹⁸ Co'tʌc-yomota'm, mato'ŋoyjaytyamʌ mista'm njayaj šunbašej tʌ Ngomi's

¹⁹ Jayajta'm, yajyamdamʌ mista'm nyomo, y uy yempetiyʌ quipcuy-chʌquia'tame.

²⁰ Uneta'm, mato'ŋoyjaytyamʌ mista'm ndataj y mista'm nanaj mumutiyʌcʌsi, porque yʌ'šej tzocopyacpa tʌ Ngomi.

²¹ Tatajta'm, uy comeque'ctij tzʌjqui'šca'tame mis uneta'm, wa'y jana myochcʌtʌŋyaju chocoy.

²² Coyosata'm, mato'ŋoyjaytyamʌ mumutiyʌcʌsi mis najsacopajcʌsipʌ ŋgomita'm. Pumñayu'c yostamʌ ja'n na' nʌmij ŋguieñaju'c wyitʌmbit, chʌquiajpašej te' yajtzocopyaquiajpapʌ's pyʌndʌwʌ, sino que wa'mij nyostamu ndumʌtzocoy porque nʌmis ŋgʌna'tzʌytyamu tʌ Ngomi.

²³ Y tiyʌta'm mis ndzʌctamba ndumʌtzocoy, tzʌctamʌ jujcha'ndʌ Ngomicotoya y ja'n na' pʌngotoyata'm.

²⁴ Porque mustambamis que tʌ Ngomi'smij maŋba ñchi'tamu mbarte jujcha' coyowa porque tʌ Ngomi Cristo mis nyosjaytyamba.

²⁵ Pero iwʌ's chʌcjapya mal tyʌwʌ, maŋba quio'aŋgʌyu pyʌcpašej ñe' yatzipʌ chʌqui'is, porque te' Diojsis maŋba yajnʌco'aŋgʌyu mumu pʌn chʌcjapyapʌ's mal tyʌwʌ.