3 Juan 1 - Zoque Copainalá New Testament

Wyʌcotzamyajpa te' atzi Gayo

¹ Ʌjte' te' anciano-cowi'na. Nʌ'ʌsmij njayjayu mij atzi Gayo. Wiyuŋšej sunba'ʌsmij, atzi, porque nʌtu'ŋajpamis wiyuŋbʌ aŋma'yoquiuy.

² Tʌwʌy, sunba'ʌsmij. Y nwa'cpa'ʌs Dioscʌsi wa'mij ñe'cʌ's ñicomasa'nʌyu mumutiyʌcʌsi jujcha' mis ndzocoy ñicomasa'nʌyjawya'a, y wa'y itjojcʌtʌjcu mis sa'sa'ajcuy.

³ Wiyuŋšej jene nʌ'omu'ʌs miñaju'c te' atzita'm y tzamjayaju'ʌj que tumʌtzocoy mis nwʌ'aŋjamba te' wiyuŋbʌ tiyʌ. Y nʌwa'mis nʌtu'ŋaju wiyuŋšejpʌ wʌ'aŋja'moquiuy.

⁴ Wʌntzʌ'ʌj oma's pʌjcu jujche'ŋ naca'ʌs muspa que te' ʌs uneše'ʌs suñajpapʌ's quio'ŋyajpa wiyuŋbʌ tiyʌ.

⁵ Tʌwʌy, sunba'ʌsmij. Ngotzoŋyajpa'cmis atzita'm cʌtʌquiajpapʌ tey, ñempemis ja'n ispʌquiapyʌ, wʌpʌ tiyʌmis te' ndzʌcpa.

⁶ Te' witu'yajupʌ's chamyaju tʌta'm ndu'mʌquiu'yojmo jutzmis jene suñaju. Wʌpʌ tiyʌmis ndzʌcpa ŋgotzoŋyajpa'cmis tiyʌ'iwʌpit wa'y tyuŋgʌpʌquiaju, porque Dioste' yosjayajpa.

⁷ Porque ñe'cʌta'm tzu'cumyaju porque sunba yosjayaju Dios. Y sunu'c quiotzo'ŋoyajtʌ'ʌ te' jana wʌ'aŋja'moyeta'm, japyʌjcʌchoŋya yajtiyʌ yʌ' atzi'sta'm.

⁸ Pyʌcpa jeque wa'ytyʌ ŋgotzoŋyaju te'šej nʌ yojšajupʌ, y te'šejtʌ wa'y tumʌ'ajcu'yoyj yajcopuŋdamu te' wiyuŋbʌ tiyʌ.

Diotrefejsis ñi'undza'mʌyajpa atzita'm

⁹ Njayjawya'mʌsmij mij y jujche'ŋmij tey ñdyu'mʌytyambapʌ Diojsis ñʌquiʌsi. Pero Diotrefejsis ja'ndʌj pʌjcʌchowe, porque ñe'cʌtij sunba quiowi'nacotzʌjcu wyin mi'ojmota'm.

¹⁰ Te'cotoya juca minba'ʌj tey, maŋba'ʌsmij nyajamwʌtzʌctamu tu'mʌquiu'yis wyi'naŋdʌjqui jutztʌj ñe'cʌ's ni'undza'mʌpya y nisujtzʌpya. Y ja'n chocopyaque yʌ'šejta'mbʌ tiyʌpit, sino ja'n pyʌjcʌchowe te' cʌtʌquiajpapʌ atzita'm, y 'yotoŋwinducpa te' sunbapʌ's pyʌjcʌchoŋyaju, y myacpujtyaju tu'mʌquiu'yojmoc.

¹¹ Tʌwʌy, uy tzʌqui chʌquiajpašej yatzita'mbʌ's, sino que tzʌcʌ oyeta'mbʌ pʌ'nis chʌquiajpašej. Te' chʌcpapʌ's oyeta'mbʌ tiyʌ Diojsiste'ñe', pero te' chʌcpapʌ's yatzita'mbʌ tiyʌ ja'n ispʌqui Dios.

Mumupʌ's wyʌcotzamyajpa Demetrio

¹² Mumu wʌ'aŋja'moye's wyʌcotzamyajpa Demetrio, y hasta te' wiyuŋbʌ tiyʌ's wyʌcocotpa. Y te'šejtijque' tʌs nwʌcotzambatʌs, y mustambamis que tʌj ja'ndʌj sutzi.

Nguipspa'ʌs wa'yʌj minu ndzamdzamnayu miji'ŋ

¹³ Wʌwʌ ijtu tiyʌ'ʌsmij wa'y ndzamjayu pero ja'ʌs maŋu nja'yʌyu tintapit yʌ' totocʌsi.

¹⁴ Pero maŋba'ʌs ŋguenu juca minba'ʌj ne'cʌ wa'yʌsmij nwinʌjque'nʌyu y wa'ytyʌ ndzamdzamnaytyamu.

¹⁵ Sunba'ʌs wa'y sʌ'mnayu'c ijtu mis ndzocoy. Ñdyujchi'yajpamij te' yʌmyij šuñajpapʌ's. Dyujchi'jayajque'ta teymʌ mis tumduma'ŋbʌn te' suñajpapʌ'stʌj.