2 Timoteo 4 - Zoque Copainalá New Testament

¹ Aŋgui'mba'ʌsmij Diojsis wyi'naŋdʌjqui y tʌ Ngomi Jesucristo's wyi'naŋdʌqui, te' maŋba minupʌ 'yaŋgui'mʌtʌjcu'yojmo wa'y quiʌme'chaju queñajpapʌ y ca'yajupʌ.

² Aŋgui'mba'ʌsmij jeque: Tzamgopuŋjaya te' Diojsis chame, juca sunba myatoŋyaju o ja'n suni myatoŋyaju, pero mis nʌtzamya. Pacienciapit y oyepʌ aŋma'yoquiupyit otoŋwinduquia, tzamnʌctʌ'ya y paquitzi'jaya chocoy.

³ Porque maŋba minu aŋsʌŋ ja'na maŋu sunu myatoŋyaju te' sa'sapʌ aŋma'yoquiuy, sino que maŋba sunu myatoŋyaju te' yajtzocopyacjayajpapʌ's ñe' šu'noquiuy y te'cotoya maŋba miñaju sone aŋma'yoyajpapʌ ñe'cʌ's šuñajpašej.

⁴ Y ja'n suni myatoŋyaju te' wiyuŋbʌ tiyʌ, sino que más quiʌmato'ŋʌyajpa undzame.

⁵ Pero mis, coquena cuenta mumutiyʌcʌsi, pʌ'mgopajcʌ jujche'ŋ toya, uy tzaque te' evangelio-tzamgopuŋguy, te'šejmis wa'y ndzʌcta'njayu te' Diojsis yoscuy.

⁶ Ʌsyʌ' ne' su'noquiupyit nʌ'ʌs ndzi'oquia'u nwin tʌ Ngomicʌsi. Yʌtij nʌ tyo'mʌyu te' hora wa'yʌj ŋga'u.

⁷ Ʌs ŋgoquipjawya'mʌs te' Diojsis oyepʌ yoscuy, yʌtij poñu'cwa'mʌj maŋbamʌ'yʌj inʌc nu'cu, y ʌs ndzoco'yojmo'ʌs ŋgoquenjojcʌtʌjcu te' wʌ'aŋjamguy.

⁸ Más que yʌtij njo'cpa'ʌs maŋba'ʌj tzi'yajupʌ corona ʌ'ta'mbʌ jamo'oyj te' justopʌ cʌme'tzoye's, tʌ Ngomi's, como ñe'cʌ'sʌj justococojtu. Y ja'n na' ʌj maŋu tzi'u, sino que te'šejtij maŋba chi'yajque'tu te' tumʌtzocoy nʌ jyo'cjayajupʌ's tʌ Ngomi's minguy.

Pablo's chamjayu Timoteo tiyʌta'm wa'y chʌjcu

⁹ Tzʌcme'tza wa'mij minu jʌ'nba'oyj wa'misʌj minu ndu'nisu.

¹⁰ Atzi Demajsis tzacwa'mʌj porque más šunba yʌ' najsacopajcʌsita'mbʌ tiyʌ y maŋwa'a Tesalonica-cumgu'yojmo. Crescente maŋu Galacia'ojmo y Tito maŋu Dalmacia'ojmo.

¹¹ Lucastya' ijtu yʌy ʌji'ŋ. Pʌcnicʌtʌcʌ te' Marcos y yajminʌ miji'ŋ, porque te'wʌ's jene muspa'ʌj cotzoŋu.

¹² Y ŋgʌ'weju'ʌs atzi Tiquico te' Efeso-cumgu'yojmo.

¹³ Jujche'cmij minba, nʌminja ʌs nu'soquiuy ndzajcupʌ'ʌs Troas-cumgu'yojmo Carpo's tyʌjcaŋʌ. Nʌmiña te' librota'm y masʌs nitza'mʌpyapʌ te' nacacʌsi ja'yʌyajupʌ tiyʌ.

¹⁴ Te' caldera-tzʌcpapʌ Alejandro's jene tzʌcjawya'mʌj toya. Tʌ Ngomi's maŋba chi'u te' quioyowa pyʌcpašej te' chʌqui's.

¹⁵ Y mis, coquena cuenta te' Alejandro, porque maya'an chamwinducjapya tʌta'm aŋma'yoquiuy.

¹⁶ Winbʌ'ʌs ŋgoquijpu'c nwin, ya'iwʌ'sʌj jaquiotzowa, mumupʌ'sʌj tzaquiaju. Uy cowašej myayjayaju te'wʌ Diojsis.

¹⁷ Pero tʌ Ngomi ʌs inʌc ndze'ŋa'oyj ijtu. Ñe'cʌ'sʌj pʌmitzi'u wa'yʌs ndzamgota'nbʌ'u te' evangelio wa'y mumu genti'lis myatoŋyaju. Y comajcu-cotu'su'ʌj u'yʌj cʌ'su tzapas ca'ŋis.

¹⁸ Y tʌ Ngomi's maŋba'ʌj coquenu u'yʌj yajtiyʌ toya tzʌcjayaju, y maŋba'ʌj conu'su-copʌ'cu hasta que tʌjcʌpya'ʌj aŋgui'mbamʌy ñe'cʌ tzajpojmo. Yajmʌja'ŋwʌcotzamya ñe'cʌ te' minbapʌ y maŋbapʌ aŋsʌ'ŋojmo. Amén.

Ultimota'mbʌ dyujchi'oquiuy y nicomasa'nʌquiuy

¹⁹ Dyujchi'ja te' Prisca y te' Aquila, y mumu te' Onesiforo's tyʌjcojmota'mbʌ.

²⁰ Erasto tzʌ'yu Corinto-cumgu'yojmo, y te' Trófimo ca'ewʌ'ʌs ndzajcu Mileto-cumgu'yojmo.

²¹ Tzʌcme'tza wa'mij minu jacho'tza'cmaj pacac aŋsʌŋ. Eubulo's ñdyujchi'pamij, y te'šejtijque' Pudente's y Lino's y Claudia's y mumu atzi'sta'm ñdyujchi'yajpamij.

²² Tʌ Ngomi's yajpaquitzi'ja mis ndzocoy. Diojsismij yajtzi'ʌ yajya'moquiuy y mumu miji'ŋ ijtyajupʌ. Amén.