2 Timoteo 3 - Zoque Copainalá New Testament

Yacha'cuy te' ultimota'mbʌ jamo'oyj

¹ Sunba'ʌs wa'mis mujsu yʌ'šejta'mbʌ tiyʌ que ʌ'ta'mbʌ jamo'oyj maŋba minu aŋsʌŋ jene maŋba'ctʌ ŋguenu toya.

² Maŋba ijtu pʌnda'm ñe' wyin šuñajpapʌ's, quiʌñʌñajpapʌ's wa'y rico'ajyaju, myʌja'ŋgomʌ'yajpapʌ's y ñʌte'ngui'myajpapʌ's wyin. Yʌ'ta'mbʌ's 'yotowewʌ'ajayajpa Dios, ja'n myato'ŋoyjayay tyatajta'm, ya'iwʌ ja'n ñʌjayay yʌscotoya, ni ja'n quiʌna'tzʌyay Dios.

³ Maŋba ijtu ja'n šuñapyʌ's tyʌwʌ, y ya'iwʌ's ja'n musi chamsujcʌyatʌjupʌ, undzamyajpapʌ, ja'n jyʌ'ctzʌ'yapyʌ's wyin, yatzitzocoytya'mbʌ, qui'nišajpapʌ's oyepʌ tiyʌ.

⁴ Maŋba itque'tu cʌtza'mʌ'oyajpapʌ, ja'n ñʌcna'tzʌyapyʌ's wyin, mʌjamʌjanayajpapʌ, sʌ'ŋajcuy mye'chajpapʌ's y ja'n Dios.

⁵ Yʌ'šejta'mbʌ pʌ'nis chʌquiajpa wyin como que jene quiʌna'tzʌyajpa Dios, pero choco'yojmota'm jañʌ'itjaya Diojsis pyʌmi. Tzaquia yʌ'šej chʌquiajpapʌ's.

⁶ Porque yʌ'šejta'mbʌ's ijtu tʌjcʌyajpapʌ eya tʌjcojmota'm wa'y mye'chaju myawʌ'aŋgoma'cʌyajpapʌ yomota'm, aŋba'te ijtyajupʌ's quiowa. Yʌ' yomota'm, ñe'ta'm šu'noquiu'yis ñʌmaŋyajpa tocoquiu'yojmo.

⁷ Y te'ta'mbʌ's mumu jutzpʌ aŋma'yoquiuy quiʌmato'ŋʌyajpa, pero nijujche'c ja'n ñʌctʌ'yay te' wiyuŋbʌ tiyʌ.

⁸ Jujcha'nde' pʌnda'm Janejsis y Jambrejsis japyʌjcʌchoŋya Moisés, te'šejtijque' ʌ'ta'mbʌ pʌ'nista'm ja'n pyʌjcʌchoŋyay te' wiyuŋbʌ tiyʌ. Ñʌ'ijtyaju yatzi quipsoquiuy y chʌquichʌquipʌ wʌ'aŋja'moquiuy.

⁹ Pero ja'n maŋu ñʌwʌ'ajyaju yajtiyʌ, porque mumu pʌ'nis maŋba ñʌctʌ'yu que jowita'mbʌte', tuquiajušej te' metzata'mbʌ pʌn japyʌjcʌchoŋyapʌ's Moisés.

Ñitza'mʌchacjayupʌ tiyʌ Pablo's te' Timoteo

¹⁰ Pero mis nʌctʌ'yjawya'mis ʌs aŋma'yoquiuy, ŋgue'naŋgʌschi'ʌyuše'ʌsmij, jutzʌj tiju ijtu, jutzʌj wʌ'aŋja'moyu, jutzʌs nʌmaŋu paciencia, jutzʌj su'noyu y jutzʌs mumutiyʌ mbʌ'mgopajcʌyu.

¹¹ Muspamis jutzʌj yacsnutzʌquiaju, jutzʌj toyapʌjcu tiyʌ'ʌj cʌtʌcjayu Antioquia'ojmo, Iconio'ojmo, Listra'ojmo, y jujche'ŋamʌs ŋguenu toya. Pero mumu te'wo'moc coquijpu'ʌj tʌ Ngomi's.

¹² Wiyuŋšej jujche'ŋ wʌ'aŋja'moye sunbapʌ's chijpana-co'ŋu Cristo Jesús, maŋba yacsnutzʌquiatʌju.

¹³ Pero te' yatzita'mbʌ pʌn y te' aŋgoma'cʌ'oyajpapʌ, maŋba chʌcjojcʌtʌquiaju yacha'cuy wa'y 'ya'ŋʌyaju yatzipʌ tiyʌ, aŋgoma'cʌ'oyajpa y te'šejtij 'yaŋgoma'cʌyatʌjque'tpa.

¹⁴ Pero mis, uy tzaque tiyʌ mis aŋmawya'a y nwʌ'aŋjamwa'a. Y muspamis iwʌcʌsimijte' 'yaŋmayu.

¹⁵ Y musque'tpamis que desde mis une'ajcu'yojmo aŋmayumis te' Masanbʌ Totojaye ñcha'maŋwajapyapʌ'smij jutzte' te' cotzojcuy nʌ'ijtupʌmis porque nwʌ'aŋjambamis Cristo Jesús.

¹⁶ Mumu te' Totojaye, Diojsiste' quipsoquiuy y jene oye wa'ytyʌ te'wʌpit aŋma'yoyu, nyajwindujcoyu, ndzamnʌctʌ'yoyu y wa'ytyʌ aŋmayu justicia.

¹⁷ Y jujche'ŋbʌn Diojsisñe' wa'y quiota'nbʌ'u y ñimejcʌyu wyin oyeta'mbʌ tzʌquicʌsi.