2 Timoteo 2 - Zoque Copainalá New Testament

Cristo's cosujyajupʌ quioyosata'm

¹ Mij jeque, tʌwʌy, te' Diojsis yajya'moquiuy nʌ'itjaytyamupʌtʌ Cristo Jesuspit, te'wʌ'smij yajpʌmitzi'ʌ.

² Y te' nyajmatoŋupʌ'ʌsmij sonepʌ testigujsis wyi'naŋdʌjqui, nitza'mʌ te' nijamyajpapʌ pʌngʌsitʌ, te' muspapʌ's 'yaŋmayaju eyata'mbʌ.

³ Mis jeque, quena toya jujcha' oyepʌ soldado Jesucristo'sñe'.

⁴ Tʌjcʌpyapʌ soldado'ajcu'yojmo ja'na maŋu quioyojsu emʌ wa'y mye'tzu jamacʌtʌjcuy, porque sunba myato'ŋoyjayu te' quiojtupʌ's soldado'ajcu'yojmo.

⁵ Te'šejtijque' iwʌ sunba pyoquiʌsquipsu, y myaŋgocʌtʌcpa poquiʌsquipscu'yis 'yaŋgui'mguy, ja'n ñʌwʌ'ay yajtiyʌ.

⁶ Te' nijpa-peñajpapʌ pʌ'nista'm, ñe'cʌ'sta'mde' wyinatuctu'mʌyajpa te' tʌm.

⁷ Quipsʌ tiyʌ'ʌste' yʌ'šej ndzamba, y tʌ Ngomi's maŋbamij ñchi'u nʌctʌ'yoquiuy mumutiyʌcʌsi.

⁸ Jamwʌtzʌcʌ te' Jesucristo, te' Davijtis quiʌwo'ma, te' winsa'upʌ ca'yajuwʌ'ojmoc chambašej ʌs ndzamgopuŋbapʌ evangelio's.

⁹ Yʌ' evangeliocotoya nʌ'ʌs ŋguenu toya, hasta somyajwa'mʌj jujcha' yatzipʌ pʌn, pero te' Diojsis chame, ja'n musi šomjayaju.

¹⁰ Te'cotoya mumutiyʌ'ʌs sʌ'mnayu'c mbʌ'mgopajcʌpya te' copiwicotoyata'm, wa'y Cristo Jesuspit copiwi'sta'm pya'tyaju mʌja'ŋbʌ cotzojcuy ja'n yayepʌ.

¹¹ Wiyuŋšejpʌ tzameyʌ' yʌ'wʌ: Juca tumʌtzʌctamwa'ndʌ Cristo's quia'a'ŋojmo, Maŋbatʌ ittaŋgue'tu ñe'cʌji'ŋ.

¹² Juca sʌ'mnayu'ctʌ mbʌ'mgopajcʌpya toya, Te'šejtijtʌ maŋba aŋgui'mdaŋgue'tu ñe'cʌji'ŋ. Juca nʌmbatʌ que ja'ndʌ ŋgo'ispʌqui Cristo, Te'šejtijque' ñe'cʌ maŋba ñʌmu que ja'ndʌ co'ispʌqui.

¹³ Diojsis ja'ndʌ musi nijamdamu tʌ, pero tʌta'm, nijamdambatʌ ñe'cʌ. Porque ñe'cʌ ja'n šutzi, ja'n maŋu ñʌmu que ja'nʌjyʌ'pit.

Te' nija'maŋda'mbʌ coyosa

¹⁴ Yajamwʌtzʌquia yʌ'šej y aŋgui'mya tʌ Ngomi's wyi'naŋdʌjqui uy quioquipyaju ja'n yajtiyʌcotoya yojšapyʌ tzame. Te'šejta'mbʌ tiyʌ's chʌcjopi'tyajpa te' cʌmato'ŋʌ'oyeta'm.

¹⁵ Tzʌcme'tza oye'c jutz wa'mis ndzi'oquia'u nwin Dioscʌsi cosujupʌ coyospapʌšej, ja'n yajtiyʌcʌsi cha'ajcuy chʌquipʌ, te' cha'maŋwajpapʌ's oye te' wiyuŋšejpʌ tzame.

¹⁶ Uy tzʌcjay cuenta ja'n 'yoyeta'mbʌ tzamdzamnaquiuy, yajtiyʌcotoya ja'n yojšapyʌ, porque te' te'šej aŋma'yoyajpapʌ, más wʌŋyajpa tocoquiu'yojmo.

¹⁷ Y te' ñe'ta'm chame maŋba tyu'ŋaju jujcha' tu'ŋajpa te' yatziputzi. Te'šejta'mbʌ pʌn pitte' Himeneo y Fileto.

¹⁸ Te'ta'mbʌ's chaquiaju te' wiyuŋšejpʌ Tuŋ, y nʌmyajpa que te' winsa'cuy cʌtʌjcuwa'nde', y chʌcjopi'tjayajpa wyʌ'aŋjamguy iwʌjutiwʌ'sta'mñe'.

¹⁹ Pero Diojsis ñʌcʌtzo'tzupʌ tiyʌ ja'n yaye. Yʌ'šejta'mbʌ tzame's yajwiyuŋše'ajpa: Tʌ Ngomi's ispʌcpa jutita'mbʌ te' ñe'. Y nʌmgue'tpa: Yajtzaquia yacha'cuy jujche'ŋ wyejwindzoŋjayajpapʌ's tʌ Ngomi's ñʌy.

²⁰ Pero tumʌpʌ mʌja tʌjcojmo, ja'n solo oropʌ y platapʌ vasotij ijtyaju, sino ijtyajque'tu cupyʌ y naspʌ. Y wene yojšajpa oyeta'mbʌ tiyʌcotoya, y eyata'mbʌ, tiyʌjanatiyʌcotoya.

²¹ Iwʌ's chacpa te' ja'n yajtiyʌcotoya yojšapyʌ tiyʌ, yajcowajpa y yajmasa'najpa wyin, yʌ'wʌte' te' pʌn yajyospapʌ Diojsis oyeta'mbʌ tiyʌcotoya.

²² Mis, uy cote ndzoco'yojmo te' unepʌ'nista'm quiʌñʌñajpapʌ tiyʌ, sino que co'ŋa oyepʌ-pʌ'najcuy, wʌ'aŋja'moquiuy, su'noquiuy y sʌ'mnaquiuy. Co'ŋa yʌ'šejta'mbʌ tiyʌ eyata'mbʌ pʌnji'ŋ, te' wyejwindzoŋjayajpapʌ's tʌ Ngomi cowajupʌ tzocopyit.

²³ Uy cʌmato'ŋʌy jowi tzamdzamnaquiuy ñʌcʌpo'papʌ's quipotoŋguy.

²⁴ Te' yosjapyapʌ's tʌ Ngomi, ja'n 'yoye wa'y quipotoŋu, pyʌcpa wa'y ñʌ'ijtu yo'capʌ tzocoy mumu pʌnji'ŋ. Ya'aŋma'yoya oye'c, y pacienciapit

²⁵ y yumijpʌ tzocopyit wa'y yajwinduquiaju te' nuyuta'mbʌ, jowi'cšej Diojsis pyi'quisjayajpa chocoy wa'y quipswitu'yaju wa'y myujšaju te' wiyuŋbʌ tiyʌ.

²⁶ Jowi'cšej Diojsis pyi'quisjayajpa chocoy wa'y ñʌctʌ'yaju, y te'šej wa'y yajcotzi'tyaju wyin diablo's quiʌ'ojmo, porque te'wʌ'ste' ñuctzʌ'yaju wa'y chʌcjayaju ñe' šu'noquiuy.