2 Pedro 3 - Zoque Copainalá New Testament

Maŋba minu tʌ Ngomi Jesús

¹ Tʌwʌy, yʌ'wʌte' te' myetzo'mopʌ carta nʌ'ʌsmij njayjaytyamupʌ. Y yʌ' metzapʌ cartapit sunba'ʌs mbʌmitzi'jayu mista'm wiyuŋbʌ nʌctʌ'yoquiuy.

² Sunba'ʌsmij nyajamwʌtzʌctamu tiyʌta'm chamyaju wina masanda'mbʌ tza'maŋwa'oye'sta'm, y wa'mis njamwʌtzʌctaŋgue'tu te' aŋgui'mguy te' yajcotzojcopyapʌ tʌ Ngomi'stʌ tzi'upʌ wa'ytyʌsmij nyajmustamu mijta'm, porque tʌjte' te' ñe' quiʌ'wej.

³ Jamwʌtzʌctamʌ nimeque'ctij yʌ'wʌ: Ultimopʌ aŋsʌ'ŋojmo maŋba miñaju quiʌsijcʌyajpapʌ's te' Diojsis chame, te' ñe'ta'm yatzi su'noquiu'yojmo tu'ŋajyajpapʌ's.

⁴ Maŋba ñʌmyaju: Cristo nʌmu que maŋba inʌc mingue'tutij. Ngomʌ'pyatʌs que jaminʌwa'nde' porque muma' ca'pʌ'yaju te' ya'acta'mbʌ tʌ ndatajta'm y mumutiyʌtij te'šej ijtu, jaquiowatzʌcʌtij desde que tujcu yʌ' najsacopac tzo'tzcu'yojmo.

⁵ Maŋdzʌ'yu'c nʌmyajpa yʌ'šej, pero jyambʌ'yajpa que tzo'tzcu'yojmo Diojsis chʌjcu te' tzap y te' nas ñe' chamepittij. Y jyambʌ'yajque'tpa que te' Diojsis chʌjcu te' nas nʌ'pit y te' nʌ'is wyajtu y cho'ŋaju ijtušej hasta yʌtij.

⁶ Y Diojsis jʌsa'ca nʌ'pittijque' yajca'pʌ'yaju te' ya'acta'mbʌ pʌn yajwʌŋu'c yʌ' najsacopac nʌ'cʌ'mʌ mʌja tu'oyj.

⁷ Pero te' tzap y te' nas yʌtij ijtyajupʌ, Diojsistijte'que' chame's nʌmaj quiʌchajcu cʌme'tzoquiuy-jyamacotoya. Pijche'c jucʌtʌjcojmo maŋba yajyaju Diojsis te' tzap y te' nas, y te' ja'n ña'chapyʌ's Dios maŋba tyocopyʌ'yaju.

⁸ Pero tʌwʌy, sunba'ʌs wa'mis mustamu yʌ'šejpʌ tiyʌ: Tʌ Ngomi's muspa yajpʌ'yaju mil amešej tuma'ŋjama, y mil ame muspa yajco'nʌyu jujcha' tuma'ŋjama. Ñe'cʌ's ja'n 'ya'ŋay aŋsʌŋ.

⁹ Ijtu quiomʌ'yajpapʌ's que tʌ Ngomi jene nʌ ya'yu wa'y minu. Pero wiyuŋšej maŋbapʌte' witu'que'tu jʌ'nʌ porque te'šejtʌ tzamdzi'tamu. Y ñe'cʌ's nʌmaŋjaytyambatʌ paciencia porque ja'n šuni wa'y ya'iwʌ tyocoyu, sino que šunba wa'ytyʌ mumu'c ŋguipswitu'tamu y wa'ytyʌ ndzactamu tʌ ŋgowa.

¹⁰ Y te' jama maŋba'ca minu tʌ Ngomi, maŋba minu jujcha' nu'mbapʌ tzu'cʌsi, ja'ndʌ tiyʌ nʌ nijamdamu'c. Pijche'cpʌ aŋsʌ'ŋoyj maŋba yaju te' tzap maya'aŋbʌ aŋjʌquiʌ'ojmo y maŋba ñemu te' tzajpojmo y najsacopajcʌsi ijtyajupʌ tiyʌ. Y pijche'c maŋba pyoŋbʌ'u yʌ' nas y jujche'ŋ yojsaŋ ijtyajupʌ naswindumʌ.

¹¹ Como mumu yʌ'šejta'mbʌ tiyʌ maŋba yaju, pyʌcpa wa'ytyʌ tumʌtzocoy ŋgʌna'tzʌytyamu Dios masanbʌ iscuy ŋguengupyit.

¹² Ndumʌtzocoy jo'ctamʌ tʌ Ngomi hasta tiyʌ jama minba, y jʌnʌc nimejcʌytyamʌ mista'm nwin y ndzocoy wa'mis njo'cjaytyamu te' Diojsis jyama. Pijche'cpʌ jamo'oyj maŋba jya'pʌyu tzap wa'y jye'pyʌ'u. Y te' tzajpojmo y najsacopajcʌsi ijtyajupʌ tiyʌ nʌ ñemyaju'c maŋba yenenbʌ'yaju.

¹³ Pero tʌta'm nʌtʌ njo'ctamu wa'y tyujcu Diojsistʌ tzamdzi'upʌ tiyʌ, wa'y ijtu jomepʌ tzap y jomepʌ nas maŋbamʌytyʌ ittamu justo'ajcu'yojmo.

¹⁴ Te'cotoya, tʌwʌy, como nʌmis njo'ctamu yʌ'šejta'mbʌ tiyʌ, tzʌcme'tztamʌ oye'c wa'mij sʌ'mnayu'c ittamu Diosji'ŋ, y 'yaŋguejtamba'camij ñe' wyi'naŋdʌjqui wa'mij cowajuwʌ y cowatacapʌ ñu'ctamu.

¹⁵ Mustamʌ que tʌ Ngomi's nʌmaŋjaytyambatʌ paciencia porque šunba wa'y mumu pʌn quiotzojcu. Te'šejtijmij njyayjaytyaŋgue'tu te' sundambapʌtʌ atzi Pablo's ñe' quiarta'ojmo, y yʌ' Pablo's ñʌ'ijtu mujsoquiuy Diojsis šajpapʌ.

¹⁶ Ijtu sone niwoya Pablo's quiarta'ojmota'm chambamʌy yʌ'šejta'mbʌ tiyʌ. Pero ijtu sone niwoyata'm ja'ndʌ mawʌnʌctʌ'ipʌ. Y te' ja'yaŋmayjapʌ's Diojsis chame, te' mochita'mbʌ's itcuy, tyu'njayajpa'c atzi Pablo's quiartata'm, maŋba ñʌctʌ'yaju ñe'ta'm šu'noquiu'yis šunbašej. Ja'n maŋu ñʌctʌ'yaju oye sone niwoya te' Diojsis Tyotojaye'ojmo wa'y mye'chaju ñe'ta'm tyocoquiuy.

¹⁷ Tʌwʌy, coquendamʌ cuenta yʌ'šej nʌ tyu'ŋajyajupʌ umij ñʌmawʌtʌjtamu'ŋmʌjcʌ tocoquiu'yojmo. Nʌytya'mʌsmij ndzamjaytyamu wa'mis jana ndzactamu mista'm ndzijpana-wʌ'aŋja'moquiuy.

¹⁸ Tzʌcme'tzjojcʌtʌctamʌ wa'mis ispʌctamu oye'c te' yajcotzojcopyapʌ Ngomi Jesucristo, y tzʌcme'tztamʌ wa'y 'ya'ŋʌyu mista'm ndzoco'yojmo te' ñe' yajya'moquiuy. Mʌja'ŋgotzamda'mitʌy yʌtij tʌ Ngomi Jesucristo hasta que nu'cpa te' aŋsʌŋ ja'na yajujche'c yayepʌ. Amén.