2 Pedro 2 - Zoque Copainalá New Testament

Sujchajpapʌ aŋma'yoye

¹ Pero ijtyajque'tu inʌc Israel-pʌ'nojmota'm sujchajpapʌ tza'maŋwa'oyeta'm. Y te'šej maŋba ijtyajque'tu mi'ojmota'm sujchajpapʌ aŋma'yoye. Maŋba ñu'mdʌjcʌyaju mi'ojmota'm wa'y ñʌtʌjcʌyaju ja'n 'yoyepʌ aŋma'yoquiuy. Y yʌ' sujchajpapʌ aŋma'yoye maŋba ñʌmyaju que ja'nde' ñe' Quiomi te' yajcotzoquiajupʌ's. Y te'cotoya ñe'cʌ'stij ñʌcje'csʌyajpa wyin, y ja'n tiyʌ nʌ quipšaju'c maŋba tyocoyaju.

² Y wʌwʌ pʌ'nis maŋba quio'ŋjayaju te' ñe'ta'm šutzi-aŋma'yoquiuy pya'tpawo'mo tyocoquiuy. Y te'cotoya eyata'mbʌ pʌ'nis maŋba yatzicocomʌ'yaju Cristo's wiyuŋbʌ 'yaŋma'yoquiuy.

³ Te'ta'mbʌ sujchajpapʌ's quipsaŋgospo'ʌyajpa jutzmij wa'y 'yaŋgoma'cʌpʌcʌtʌjtamu y ñe'cʌji'ŋamij ñdyumʌ'ittamu'c, coyowacʌsimij ñchʌcjatʌjtamba mumutiyʌ. Pero ya'ajca Diojsis quipsu wa'y yajnʌco'aŋgʌyaju yʌ'šejta'mbʌ pʌn y ja'n maŋu jyambʌ'u ñe'cʌ's quipsušej.

⁴ Porque Diojsis jayajcotocoya te' yatzi angelesta'm cowapa'tyajupʌ, sino que tyʌŋdzi'po'tyaju tzajpojmoc wa'y myaŋyaju infierno'ojmo. Y teymʌ ijtyaju presošej te' pi'tza'ŋajcu'yojmo hasta que nu'cpa te' cʌme'tzoquiuy-jyama.

⁵ Te'šejtijque' jayajcotocoya Diojsis te' ya'ajca cowapa'tyajupʌ pʌnda'm, sino que na' Noetij yajcotzojcu cu'ya'pyʌ tyʌwʌji'ŋda'm. Y yʌ' Noe'is chamgopuŋba inʌc que ijtupʌte' pyena wa'ytyʌ ittamu justo'ajcu'yojmo. Y te'ta'mbʌ jamo'oyj Diojsis yajquejcu mʌtuj wa'y šu'csca'pʌ'yaju te' ja'n ña'chapyʌ's Dios.

⁶ Te'šej ya'ajca yajnʌco'aŋgʌquie'tu quiowa Diojsis te' Sodoma y te' Gomorra-cumguytya'm. Pyoŋbʌ'yatʌju te' metzapʌ cumguy jamwitu'cše'ŋoyj. Y te'šej chʌjcu Diojsis wa'ytyʌte' que'naŋgʌschi'ʌytyamu jutzte' maŋba yajnʌco'aŋgʌyu te' jʌsa'cta'mbʌ pʌn ja'n ña'chapyʌ's Dios.

⁷ Pero yajcotzojcu jucʌtʌjcojmoc te' justopʌ Lot porque te' Diojsis quienjayu chocoy yʌ' Lojtisñe' jutz inʌc triste'ajpa y ñʌ'oquia'pa inʌc nʌ'c quienu te' chʌquiajpapʌ's yacha'cuy.

⁸ (Yʌ' justopʌ Lot, jeque, tumʌpʌ luga'royjtye' inʌc ijtu te' poŋbʌ'yajupʌji'ŋda'm. Y como tumdumʌ jama inʌc quienba y myatoŋba jutz inʌc myaŋgocʌtʌquiajpa Diojsis yajwinduquiajpapʌ tiyʌ, jene toyapʌjcu chocoy.)

⁹ Te'cotoya mustamʌ que Diojsis muspa yajcotzoquiaju nʌ'c 'yoc'išatʌju te' ñe'cʌ quiʌna'tzʌyajpapʌ's. Pero te' yatzita'mbʌ pʌn nʌmaj quiʌchaquiatʌju wa'y yajnʌco'aŋgʌyatʌju te' yatzita'mbʌ chʌqui cʌme'tzoquiuy jamo'oyj.

¹⁰ Nimeque'ctij Diojsis maŋba yajnʌco'aŋgʌyaju te' sujchajpapʌ tza'maŋwa'oye porque quio'ŋyajpa ñe' wyi'nis yatzi šu'noquiuy y jyana oye'ajcuy, y porque ja'n myato'ŋoyjayay aŋgui'moye. Yʌ'ta'mbʌ's ja'n ña'chay yajtiyʌ, y ñite'ngui'myajpa wyin. Ja'n ña'chay wa'y 'yotowewʌ'ajayaju Diojsis 'yangelesta'm.

¹¹ Y te' Diojsis 'yangelesta'm maste' pʌmi'ʌyajupʌ y más ijtyaju 'yaŋgui'mʌtʌjcuy que ja'nde' te' sujchajpapʌ tza'maŋwa'oye'sta'm. Pero yʌ' angelejsista'm ja'n ñʌtu'mbajcajyay wa'y ñicotza'mʌyaju Diojsis wyi'naŋdʌjqui.

¹² Yʌ' yʌ'šej ja'n ñʌctʌ'yoyapyʌ pʌnda'm copʌnšej ja'n ñʌctʌ'yoyay, y yatzicotzamyajpa ja'n ñʌctʌ'yapyʌ tiyʌ. Jujcha'nde' copʌ'nis ñipʌ'na'ʌpya wa'y yajca'yaju y quiʌ'šaju, te'šejta'm chamʌtʌjcuy yʌ'šejta'mbʌ pʌ'nisñe'. Te'še'ande' maŋba quia'yaju ñe'ta'm tyocoquiu'yojmo.

¹³ Ñe'ta'm yacha'cu'yis quiowindzʌmbašej maŋba tyocoyaju. Te'wʌte' te' quioyowata'm. Porque sʌ'ŋajcuy quipšajpa y chʌquiajpa tumdumʌ jama y ñʌ'ijtyajpa choco'yojmo. Yʌ'šejta'mbʌ pʌ'nista'm chʌqui yajyu'coyajpa y yajtoco'yoyajpa. Yempe miji'ŋda'm tumʌcu'tyajpa pero ja'n chaquiay te' tocoquiu'yis 'yaŋma'yoquiuy.

¹⁴ Quiengʌwijtyajpa yomota'm wa'y 'yaŋgoma'cʌyaju y ja'n chocopyaquiay wa'y chaquiaju cowapa'tcuy. Te'šej sa'sa wyejmiñajpa te' mochita'mbʌ yomo wa'y jyowya'ŋdʌjcajyaju. Y ñʌcnu'ŋʌyjayajwa'a choco'yista'm te'šejpʌ yatzi ni'aŋsu'noquiuy. Te'šejta'mbʌ jeque, maldicio'nʌyupʌ pʌnda'mande'.

¹⁵ Chacjayajuwa'nde' te' Diojsis tyuŋ y ca'ŋdocoyajuwa'nde' porque chʌquiajpa chʌcpašej inʌc te' ni'aŋsu'nopyapʌ Balaa'ŋis, Beo'ris 'yune's. Balaa'ŋis jeque chʌjcu ja'n 'yoyeta'mbʌ tiyʌ wa'ytyij chi'yaju tumin.

¹⁶ Y Diojsis yajtzamdzamnayu te' burra nʌ pyocsnʌmaŋupʌ Balaa'ŋis wa'y 'yotoŋjayu te' tza'maŋwa'opyapʌ Balaam. Te'šej yajwinducjayu te' quio'sawa-pʌ'najcuy.

¹⁷ Yʌ'šejta'mbʌ pʌn ja'n yojšay oyepʌ tiyʌcotoya. Tʌjtzupʌ nʌ'-mu'tcuyšejta'm, sawa's yʌmʌc teymʌc šujwituwituwʌyajpapʌ o'našejta'm. Y Diojsis ñimejcʌyjayajwa'nde' lugar maŋbamʌy quiojtyatʌju pi'tza'ŋajcu'yojmo mumu jamacotoya te' ja'ndimʌy sʌ'ŋgʌ'.

¹⁸ Pero ijtyaju inʌc wiyuŋše'a chaquiatʌ'upʌ's yʌ'šejpʌ tocoquiuy, yʌ' tocoyajupʌ pʌ'nis nʌ chamyajušej. Pero yʌ' tocoyajupʌ's jyowa'ŋdʌjcajyajque'tutij ñe'ta'm tzamdzocotzoconaquiupyit wa'y chʌquiaju tiyʌtij šuña.

¹⁹ Yʌ' sujchajpapʌ pʌ'nista'm chamdzi'oquiu'yajyajpa libre'ajcuy, nʌmyajpa uytyʌ ya'iwʌ's aŋgui'mdamu. Pero ni ñe'cʌ ja'n lyibreta'm, porque aŋgui'mbapʌ pʌnšej te'šej myato'ŋoyjayajpa ñe'ta'm quiowa. Mozošejta'mde' wa'y myato'ŋoyjayaju ñe' wyi'nis yatzi šu'noquiuy. Porque wiyuŋšej juca te' cowatʌ ŋgomišej mato'ŋoyjapya, te'wʌ'sandʌte' ñe' myozo porque te' cowatʌ ŋgo'ŋjojcʌtʌcpa.

²⁰ Pero juca iwʌ's pyʌjcʌchoŋba y quio'ŋba te' yajcotzojcopyapʌ Ngomi Jesucristo y ñe'cʌpit chacpa te' cowa y tocoquiuy najsacopajcʌsi, ja'n 'yoye jʌsa'ca wa'y tyocowyʌtzʌjque'tu ni wa'y myato'ŋoyjayu ñe' wyi'nis yatzi šu'noquiuy. Juca jʌsa'ca chacpa tʌ Ngomi Jesucristo, más jʌ'mʌpya tyocoquiuy que ja'nde' wina inʌc nʌ quiowapa'tušej.

²¹ Yʌ'šejta'mbʌ pʌn más inʌc oye juca inʌc yajujche'c ja'ispʌcjaya te' Diojsis wiyuŋbʌ tyuŋ wa'y jʌsa'ca minu chacjayaju uy myato'ŋoyjayaju te' Diojsis masanbʌ 'yaŋgui'mguy pyʌjcʌchoŋyajtʌ'upʌ.

²² Juca iwʌ tocowyʌtzʌcpa yatzita'mbʌ tiyo'mo, maŋba quiʌtʌcjayu chambašej te' wiyuŋbʌ comparacio'ŋis: Te' tuwi's quiatwʌtzʌjque'tpatij te' 'yʌ'tzipʌ'upʌ tiya'a, y te' sa'sa tacschiŋupʌ yoyajmama's nimeque maŋu chiŋwʌtzʌjque'tutij motyo'mo wa'y yu'cpʌ'wʌtzʌjcu.