2 Pedro 1 - Zoque Copainalá New Testament

Jyayjayušej Pedro's te' wʌ'aŋja'moyeta'm

¹ Ʌjte' te' cʌ'wej Simón Pedro, Jesucristo's quioyosa. Atzita'm, nʌ'ʌsmij njayjaytyamu mijta'm, mumu jujche'ŋ wyʌ'aŋjamyajpapʌ's tʌta'm nyajcotzojcopyapʌ Dios, te' Ngomi Jesucristo. Y mijta'm tʌjšejmij sa'sa nwyʌ'aŋja'moytyamba porque tʌ Ngomi justopʌte' wa'ytyʌ tzi'tamu tumduma'ŋbʌn yʌ' sa'sapʌ nwʌ'aŋja'moquiuy.

² Sunba'ʌs wa'mij Diojsis aŋba'te'c nyajyamdamu y wa'mij ñchi'tamu sʌ'mnaquiuy wa'y 'ya'ŋʌyjojcʌtʌjcu mista'm nʌctʌ'yoquiuy wa'mis ispʌctamu oye'c te' Dios y Ngomi Jesús.

Cristo-wʌ'aŋja'moye'sta'm wyʌpʌpʌ'najcuy

³ Y Cristo'stʌ pʌmitzi'tamba mumutiyʌcʌsi wa'ytyʌ itjojcʌtʌctamu te' masa'najcu'yojmo. Y ñe'cʌ'stʌ cotzoŋdamba wa'ytyʌ ispʌctamu oye'c te' Dios, te' wejtamupʌ'stʌ wa'y ittamu tʌta'm mbarte ñe' myʌja'ŋajcu'yojmo y chi'muŋgʌ'ojmo.

⁴ Y yʌ' Diojsistʌ tzi'tamu oyeta'mbʌ y mʌja'ŋda'mbʌ yajya'moquiuy, te' chamdzi'oquia'ušej tʌcotoyata'm. Yajcotzoctamutʌ jeque uytyʌ ŋgo'ŋdamu ni ŋgʌñʌñdamu nijutzpʌ tocoquiuy yʌy najsacopajcʌsi ijtyajupʌ, sino que wa'ytyʌ nʌ'ittamu masanbʌ itcuy y tzocoy Diojsis ñʌ'ijtupʌšej.

⁵ Te'cotoya mumu yʌ'šejta'mbʌ tiyʌcʌsi pyʌcpa wa'mis ŋgoquendamu cuenta. Yajquejtamʌ mis nwʌ'aŋjamgupyit que mijta'm wʌta'mbʌ mbyʌnda'm mijte'que'. Y ja'n na' te'še'ŋdij, sino que wa'mis a'ŋʌyjojcʌtʌctamu mista'm Diosji'ŋbʌ nʌctʌ'yoquiuy.

⁶ Y yajquejtaŋgue'ta que nʌmis njʌ'ctzʌ'ytyamu nwin y te'šejmis maŋba mujsu mbʌ'mgopajcʌytyamu mumu jutzpʌ toya. Y nʌ'cmis ŋguendamu toya, pyʌcpa wa'mis nyajquejtamu que ndumʌtzocoy mis sundamba Dios.

⁷ Y ja'n na' te'še'ŋdij, sino que atzišej nayajyamʌtʌjtamʌ ne'co'mo, y nʌ'ittamʌ wiyuŋšejpʌ našunʌtʌjcuy atzi'ojmota'm.

⁸ Porque juca ndzʌcjojcʌtʌctambamis yʌ'šejta'mbʌ tiyʌ, maŋba pyaquipʌjcu mista'm ndzocoy. Y wa'mij jana comeque ittamu yʌy najsacopajcʌsi, pyʌcpa wa'mis a'ŋʌyjojcʌtʌctamu mista'm nʌctʌ'yoquiuy wa'mis ispʌctamu oye'c tʌ Ngomi Jesucristo.

⁹ Pero iwʌ mi'ojmota'mbʌ's ja'n chʌcjojcʌtʌqui yʌ'šejta'mbʌ tiyʌ, tzʌctamʌ cuenta que te'wʌ's ja'n ñʌctʌ'i choco'yojmo tiyʌte' te' Diojsis šu'noquiuy. Yʌ'wʌ's jyambʌ'wa'a que Diojsis yajcotzocwa'a, y yajcowajawya'a te' quiowa wina inʌc nʌ chʌjcupʌ.

¹⁰ Te'cotoya, atzita'm, coquendamʌ cuenta wa'mis nyajquejtamu mista'm nwʌ'aŋja'moquiu'yojmo que wiyuŋšej ja'nmij myochcʌtʌŋdame porque Diojsismijyʌ' nwyejtamu y ŋguiopiŋdamu. Y juca yʌ'šejmis ndzʌctamba, ja'nmij ñdyocoytyame Diojsis wyi'naŋdʌjqui.

¹¹ Y te'šej jʌsa'ca Diojsismij maŋba ñchi'tamu pe'tzipʌ y woŋgonayupʌ tuŋ wa'mij nwyiyuŋnu'ctamu te' aŋgui'mbamʌy te' nyajcotzojcopyapʌ Ngomi Jesucristo mumu jamacotoya.

¹² Te'cotoya sunba'ʌsmij nyajamwʌtzʌcjojcʌtʌctamu yʌ'šejta'mbʌ tiyʌ, ñempe mis mustamba'a y ñempe paquipʌcwa'a mista'm ndzocoy te' wiyuŋbʌ tiyo'mo aŋmaytyamušejmis.

¹³ Como yʌmya'ʌj nʌ ŋgueñgueñayu'ŋmʌjcʌ, ŋgomʌ'pya'ʌs que jene oye wa'yʌsmij nyajamwʌtzʌctaŋgue'tu te' wina mis aŋmaytyamupʌ tiyʌ.

¹⁴ Porque muspa'ʌs que jʌ'nʌ'a maŋba'ʌj ŋga'u Ngomi Jesucristo'sʌj tza'maŋwajayušej.

¹⁵ Te'cotoya'ʌsmij nʌ ndzijpana-yajmustamu yʌ'šejta'mbʌ tiyʌ umis maŋu njambʌ'tamu'ŋmʌjcʌ ñempe ca'u'ca'mʌj.

Te' quienjayajupʌ's te' Cristo's chi'muŋgʌ'

¹⁶ Tʌs nʌtʌsmij nyajmusjaytyamu tʌ Ngomi Jesucristo's myujsoquiuy y minguy. Yʌ' nʌtʌsmij ndzamjaytyamupʌ tiyʌ ja'nyʌ' undzame pʌ'nis ñʌcʌpo'yajupʌ, porque tʌste' ne' nwitʌmbit ŋguenjayu te' Cristo's myʌja'ŋajcʌ'.

¹⁷ Tʌ Ndata Diojsis chi'muŋgʌ'ojmo yajmʌja'ŋaju te' Cristo y te' tzi'muŋbapʌ tzajpojmoc wanajcu Diojsis 'yotowe yʌ'šej ñʌjayupʌ's: Mijte' te' ʌs sunbapʌ Une. Mijpi'tʌj tzocopyacpa.

¹⁸ Y tʌste' matoŋjaquie'tu te' Diojsis 'yotowe wanajcupʌ tzajpojmoc masanbʌ pu'mnacʌsitʌjte' tumʌ'ijtu'c Cristoji'ŋ.

¹⁹ Y ŋguenwa'ndʌs jeque que tucwa'a tʌs nwi'naŋdʌjqui te' chamyajušej tza'maŋwa'oye'sta'm y muspatʌs que te' cha'maŋwajyajušej wiyuŋbʌ tiyʌte', y šʌ'ŋjayajpa pi'tza'ŋajcu'yojmo ijtyajupʌ. Pyʌcpa jeque wa'mis ŋgoquendamu cuenta te' tza'maŋwa'oye'sta'm chame hasta que taŋbʌ'nʌmba ʌ' jamo'oyj y hasta que yajsʌ'ŋjayajpa mista'm ndzocoy te' namdzuctya'a tzotpapʌ matza's.

²⁰ Nʌctʌ'ytya'mitʌy nimeque'ctij yʌ'šej: Ya'iwʌ's ja'n pyʌqui wa'y cha'maŋwaju ñe' quipsoquiupyit tiyʌta'm jya'yʌyaju te' tza'maŋwa'oye'sta'm Diojsis Tyotojaye'ojmo.

²¹ Porque te' Diojsis masanda'mbʌ cha'maŋwa'oye'sta'm jachamya yajtiyʌ ñe'ta'm quipsoquiupyit sino que te' Espíritu Santo'ste' chi'yajupʌ quipsoquiupyit, porque te' Espíritu Santo's yajmujšaju tiyʌta'm oye wa'y chamyaju.