2 Juan 1 - Zoque Copainalá New Testament

Te' našunʌtʌjcuy y te' wiyuŋbʌ tiyʌ

¹ Ʌjte' te' anciano-cowi'na. Yomoy, Diojsismij ŋguiopiŋu. Nʌ'ʌsmij njayjayu mij y mis uneta'm. Jene sunba'ʌsmij porque mbʌjcʌchoŋumis te' wiyuŋšejpʌ wʌ'aŋja'moquiuy. Y ja'nʌsmijte' ʌstij suni, te'šejtijmij šuñajque'tpa mumu jujche'ŋ nʌ wyʌ'aŋjamyajupʌ's wiyuŋbʌ tiyʌ.

² Sundambatʌsmij porque mustamba'ndʌ que ijtu te' wiyuŋbʌ tiyʌ tʌta'm ndzoco'yojmo, y teymʌ maŋba itjojcʌtʌjcu.

³ Tʌ Ndata Diojsis y te' 'Yune Jesucristo's nyajyamdambamij y ñdyo'ya'ŋʌytyambamij, y ñchi'tambamij sʌ'mnaquiuy. Y wiyuŋšej mustambamis te' wiyuŋbʌ tiyʌ y sundambamis ndʌwʌta'm.

⁴ Jene nʌ'omu'ʌs mujsu'cʌs que ijtyaju mis uneta'm nʌ ñʌtu'ŋajyajupʌ's wiyuŋbʌ tiyʌ. Te'šejtʌ aŋgui'mdamu tʌ Ndata Diojsis wa'ytyʌ ndzʌctamu.

⁵ Y yʌtij yomoy, nwa'cjapya'ʌsmij wa'ytyʌ našunʌtʌjtamu ne'co'mo. Yʌ'wʌpit ja'ʌsmij nʌ njayjayu jomepʌ aŋgui'mguy, sino que te' aŋgui'mguy tʌs nʌ'ijtupʌ desde cho'tzcu'yojmo.

⁶ Y našunʌtʌjtamba'ctʌ nʌtʌ nwijtu aŋgui'mdambašejtʌ Diojsis. Ñe'cʌ'stʌ aŋgui'mdamu wa'ytyʌ našunjojcʌtʌctamu, mustambaše'amis desde cho'tzcu'yojmo.

Te' aŋgoma'cʌ'oyajpapʌ

⁷ Porque jene ijtyajwa'a aŋgoma'cʌ'oyajpapʌ najsacopajcʌsi. Yʌ'ta'mbʌ nʌmyajpa que jaminʌ pyʌ'na jujcha' pʌn te' Jesucristo, te'šej aŋgoma'cʌ'opyapʌte' y qui'nispapʌ's te' Cristo.

⁸ Coquendamʌ cuenta umij ya'iwʌ's 'yaŋgoma'cʌytyamu wa'mis jana nyajtocoytyamu Diojsisamij nyajnʌwʌ'ajtamupʌ tiyʌ ndzoco'yojmo, porque ñe'cʌmis nwʌ'aŋjamdamu, sino que wa'mis mbʌjcʌchoŋdamu mumu te' coyowa.

⁹ Iwʌ's myaŋdochʌcpa y ja'n wyitjojcʌtʌqui te' aŋma'yoyušej Cristo, ja'ndiyʌmaj Diojsis 'Yespiritu ñe' choco'yojmo. Iwʌ witjojcʌtʌcpa aŋma'yoyušej Cristo ñʌc'ijtʌwya'a choco'yojmo tʌ Ndata Diojsis y te' 'Yune's.

¹⁰ Juca iwʌjutiwʌ'smij ŋguiʌ'mindamba y ja'n chame aŋma'yoyušej Cristo, uy pʌjcʌchoŋdame ndʌjcaŋʌ, ni wa'mis nʌjayu: Diosji'ŋbʌ mijyʌ'.

¹¹ Porque iwʌ's pyʌjcʌchoŋba te'šejpʌ nʌte' ñʌtu'mbajcajayu yatzita'mbʌ chʌqui.

Nguipspa'ʌs wa'yʌj minu ndzamdzamnayu miji'ŋ

¹² Wʌwʌ ijtu tiyʌ'ʌsmij wa'y ndzamjaytyamu pero ja'ʌs maŋu nja'yʌyu yʌ' totocʌsi tintapit. Maŋba'ʌs ŋguenu juca minba'ʌj ne'cʌ wa'yʌsmij winʌjque'nʌytyamu, y wa'ytyʌ ndzamdzamnaytyamu y te'šejtʌ wa'y omdzocopyactamu.

¹³ Quiopiŋjayu Diojsis mis ŋgose, y ñe' 'yune'sta'm ñdyujchi'yajpamij. Amén.