2 Corintios 8 - Zoque Copainalá New Testament

Ndumʌtzocoy cotzoŋdamʌ ndʌwʌ

¹ Nyajmustambatʌsmij atzita'm que chi'yatʌju Diojsis yajya'moquiuy Macedonia'ojmota'mbʌ tu'mʌquiuy.

² Ñempe chʌjquišatʌju toyapʌjcu'yojmo wʌwa'yaju tyo'ya'ŋʌ'oquiuy wa'y šajyaju tiyʌ'iwʌ. Yʌ'šej chʌquiaju wʌwʌpʌ 'yomapit ñempe jene pobreta'm inʌc.

³ Ngotestigosajpa'ʌs que omapit quiojtyaju quiʌpa'tyajuše'ŋ, y hasta quiotniqui'ma'ŋʌyaju.

⁴ Y wa'cjayajutʌj tyumʌtzocoy wa'ytyʌs ndzi'yaju lugar wa'y quiojtyaju ñe' yajya'moquiuy masanbʌngotoyata'm.

⁵ Y chʌquiaju ja'ndʌs inʌc ŋguipsišej. Wina chi'oquiu'yajyaju ñe' wyin tʌ Ngomicʌsi Diojsis šu'noquiupyit, y te'šejtijque' tʌjcʌsi.

⁶ Te'cotoya aŋnʌtza'mʌyutʌs Tito que ñitzʌjcušej wina wa'y yajtu'mʌyu te' yajya'moquiuy, te'šej wa'y yajcopujtu mi'ojmota'm.

⁷ Mumu tiyʌ'ojmomij ŋguiota'ndamba mista'm nwʌ'aŋjamgu'yojmo, ndzame'ojmo, nʌctʌ'yoquiu'yojmo, y mumupʌ cʌñʌñgu'yojmo, y su'noquiu'yojmo tʌjcotoya. Te'cotoya te'šejtij cota'ndaŋgue'ta yʌ' yajya'moquiu'yojmo.

⁸ Ndzamjaytyamba'ʌsmij yʌ'šej ja'n wa'yʌsmij aŋgui'mdamu sino que wa'yʌsmijte' ndzʌjquistamu te' Macedonia-pʌ'nista'm chiŋi'ajcupyit, juca wiyuŋšejmijte' šu'noytyamba.

⁹ Porque musjaytyamba'mis Ngomi Jesucristo's yajya'moquiuy, y jutzmij šundamba. Ñempe mʌja'ŋbʌte' yacsnu'ajcu'yojmopʌšej chʌjcu wyin mijcotoyata'm, wa'mij yajmʌja'ŋajtamu ñe' yacsnu'ajcupyit.

¹⁰ Yʌ'še'ʌsmij aŋnʌctza'mʌytyaŋgue'tpa: Yʌtij pyʌcpa wa'mis ndzi'ta'ndamu tiyʌmis inʌc sunba ndzi'tamu, y tiyʌmis ndzi'nitzʌctamu ame'a.

¹¹ Yʌtij jeque tzi'ta'ndamʌ wa'y quieju que wiyuŋšej sunumis ndzi'tamu. Tzi'ta'ndamʌ jeque nʌ'ittamuše'ŋ.

¹² Porque juca po'pa tʌ ndzoco'yojmo wa'ytyʌ ŋgojtu ŋgʌpa'tpaše'ŋdʌ, pyʌjcʌchoŋba Diojsis ŋgotpaše'ŋdʌ, juca wʌwʌ o juca uša'ŋ.

¹³ Ja'ʌs ndzame yʌ'šej wa'y eyata'mbʌ ñewe'ijtyaju, y mij wa'y ñdyoyapʌctamu,

¹⁴ sino que yʌtijta'mbʌ aŋsʌ'ŋojmo wa'y pyajtzaŋdajšaju ñe'cʌta'm mista'm ndzi'oquiupyit, y te'šej wa'y tyu'mbajcajyaju miji'ŋda'm. Jʌsa'ca ñe'cʌ'samij muspa ñchi'yajque'tu wa'mij mbyajtzaŋdajšajque'tu, y te'šej wa'mij ñdyu'mbajcajtamu.

¹⁵ Ja'yʌyušej: Iwʌ's yajtu'mʌyu wʌwʌ, jaquiʌchʌ'yʌ, y iwʌ's yajtu'mʌyu uša'ŋ, sa'sa ta'nu.

Tito y te' maŋyajupʌ ñe'cʌji'ŋ

¹⁶ Pero yʌscotoya chʌcpa Diojsis que quiojtu Tito's choco'yojmo te'šejpʌ su'noquiuy mijcotoyata'm.

¹⁷ Porque wiyuŋšej pyʌjcʌchoŋu oye aŋnʌctza'mʌyuše'ʌs. Ñe'cʌ's nʌtya'nde' quiʌñʌñgue'tu wa'y myaŋu, y ñe' šu'noquiupyit maŋba chu'cumu wa'y myaŋu mi'aŋʌta'm.

¹⁸ Y nʌtʌs ŋgʌ'weju Titoji'ŋ te' atzi, te' yospapʌ evangeliocotoya, te'cotoya jene wyʌcotzamyajpa mumu tu'mʌquiu'yojmota'm.

¹⁹ Ja'n na' te'šej, sino que quiopiŋyaju te' tu'mʌquiu'yista'm wa'ytyʌs nduŋdʌwʌ'aju wa'ytyʌs nʌmaŋu yʌ' yajya'moquiuy tʌs nʌ nyajtu'mʌyupʌ. Yʌ'šejtʌs nʌ nyajtu'mʌyu wa'y myʌja'ŋwʌcotzamyaju tʌ Ngomi, y wa'y quieju mis oyepʌ su'noquiuy.

²⁰ Ja'ndʌs suni wa'ytyʌj minu nicotza'mʌyu ya'iwʌ's yʌ' aŋba'tepʌ tzi'oquiuquiʌsi nʌtʌs nʌmaŋupʌ.

²¹ Ndzʌcme'tzpatʌs wa'ytyʌs ndzʌjcu mumutiyʌ wʌpʌ pʌ'najcupyit, ja'n solo tʌ Ngomi's wyi'naŋdʌjqui, te'šejtijque' pʌ'nista'm wyi'naŋdʌjqui.

²² Nʌtʌs ŋgʌ'weju ñe'cʌji'ŋda'm eyapʌ tʌs atzi. Ndzʌjquiswa'ndʌs yʌ'wʌ sone naca y soneta'mbʌ tiyʌcʌsi, y ŋgoquenutʌs cuenta que yʌtij masa' quiotziŋya'pa porque jene ñijamdambamij.

²³ Juca quiʌ'aŋwa'quiajpa Tito, ñe'cʌ ʌste' ndʌwʌ y yospapʌji'ŋʌj mis oye'ajcuquiotoya. Juca quiʌ'aŋwa'quiajpa te' eyata'mbʌ tʌta'm atzi, tu'mʌquiu'yista'mde' quiʌ'wej y yajquejayajpa Cristo's myʌja'ŋajcuy.

²⁴ Yajquenjaytyamʌ jeque te'ta'mbʌ atzi mis ndzʌquipit que wiyuŋšej mis suñajpa. Yajquendaŋgue'ta tiyʌcotoya tʌsmij mʌja'ŋgotzamdamu. Yʌ'šej mis maŋba nyajquejtamu que sundambamis te' tu'mʌquiuytya'm.