2 Corintios 7 - Zoque Copainalá New Testament

¹ Te'šej jeque tʌwʌy, tzamdzi'ʌtʌjtamutʌ yʌ'šejta'mbʌ tiyʌ. Te'cotoya yajcowajta'mitʌy tʌ ŋgüerpo y tʌ espíritu, porque cowapa'ttamutʌ. Y como na'tztambatʌ Dios, yajʌcʌ'ta'mitʌy ndzoco'yojmo mumutiyʌ jašunʌpʌ ñe'cʌ's.

Quipswitu'yaju Corinto-pʌnda'm

² Pʌjcʌchoŋdamʌtʌj ndzoco'yojmo. Ya'iwʌtʌs jañchʌcja mal. Ya'iwʌtʌs janyajca'ŋdocoya. Ya'iwʌtʌs ja'yaŋgoma'cʌ.

³ Ja'ʌs ndzame te'šej wa'yʌsmij nicotza'mʌytyamu que ñʌmumij que te'šej tʌs ndzʌjcu. Nʌmwa'mʌj wina que sundambatʌsmij ndzoco'yojmo, y juca ca'patʌ o itpatʌ sunjojcʌtʌctambatʌsmij.

⁴ Jana na'chcu'yʌsmij ndzamjaytyamba. Mʌja'ŋgotzamdamba'ʌsmij. Jene nyajtzocopyactamumisʌj. Maya'a'ŋʌj omdzocopyacpa mumu tʌs ndoyapʌjcu'yojmo.

⁵ Wiyuŋšej jeque, nu'cu'candʌj Macedonia-najsojmo jašʌ'mgʌne'ca tʌs ŋgüerpo. Jutʌta'mdʌj tiju toyapʌjcutʌj. Yacsnutzʌquiajutʌj pʌ'nista'm. Na'tzutʌj ndzoco'yojmo mijcotoyata'm.

⁶ Yajtzocopyacpa Diojsis te' mochcʌtʌŋyajupʌ, y ñe'cʌ'stʌj yajtzocopyajcu tʌj nu'cu'c Tito.

⁷ Nʌ'omutʌs jeque, y yajtzocopyajcutʌj jujcha' mis nyajtzocopyactamu ñe'cʌ. Tzamjayutʌj jutz misʌj jene sunba ŋguendamu, y jutzmij njyʌytyamba porque nyajtoyapʌctamumisʌj, y jutz misʌj ŋgoquiptamba. Te'cotoya'ʌs más nʌ'omu.

⁸ Porque ñempe'ʌsmij nyajtuyu'yoytyamu ŋgartapit, yʌtij ja'ʌs mbʌcjay maya'cuy, ñempe ʌsmij jʌsa'ca ndoya'ŋʌytyamu. Muspa'ʌs que te' carta'smij nyajtuyu'yoytyamu ñempe uša'ŋ tiempocotoya.

⁹ Yʌtij nʌ'omba'ʌs porque ñdyuyu'yoytyamumij wa'mij ŋguipswitu'tamu, y ja'n na' wa'mij ñdyuyu'yoytyamu. Ñdyuyu'yoytyamumij Diojsis šunbašej, umis mba'ttamu nijutzpʌ tocoquiuy tʌsmij ndzʌcjaytyamupʌ tiyʌpit.

¹⁰ Porque te' tuyu'yoquiuy šunbašej Diojsis, te'wʌ'stʌ yajquipswitu'tamba wa'ytyʌ ŋgotzoctamu. Y ja'n 'yoye wa'ytyʌ ndriste'aju porque quipswitu'utʌ. Pero te' najsacopajcʌsipʌ tuyu'yoquiuy yospa wa'y quia'yaju pʌnda'm.

¹¹ Quipstamʌ jeque jutz yojsu mijcotoyata'm yʌ' tuyu'yoquiuy šunbašej Diojsis. Yojsu mista'm ndzoco'yojmo wa'mis ŋgoquiptamu nwin, y wa'mis nʌqui'šca'tamu te' cowa. Yojsu wa'mij ña'tzu tiyʌte' maŋba ŋguiʌtʌcjaytyamu. Sundambamis inʌc wa'yʌsmij nyajcotocoyu. Yojsu wa'mis ndumʌtzocoy ŋgʌme'tztamu te' cowacʌsi y wa'mis nyajco'aŋgʌytyamu te' chʌjcupʌ's. Yʌ'šej mis nyajquejtamba que ja'ndiya' mista'm ŋgowa.

¹² Te'cotoya'ʌsmij njayjaytyamu, ja'n solo te' yajtoyapʌjcoyupʌcotoya, ni te' toyapʌjcupʌcotoya, sino wa'y quieju mijcotoyata'm Diojsis wyi'naŋdʌjqui jutz mistʌj sundamba.

¹³ Te'cotoya tzocopyajcutʌj. Ja'n na' te'wʌ, sino que aŋba'tepʌ omatʌs mba'tu Titoji'ŋ porque tzocopyajcu ñe'cʌ mumu mijpitta'm.

¹⁴ Y juca Titocʌsi mʌja'ŋgotzamdamu'ʌsmij ja'nʌj ndza'ay porque mumutiyʌ ʌsmij ndzamjaytyamupʌ, wiyuŋbʌ tiyʌte'. Te'šejtijque' mʌja'ŋgotzamuše'ʌsmij Tito's wyi'naŋdʌjqui, wiyuŋbʌ tiyʌte'.

¹⁵ Y yʌtij masmij tumʌtzocoy šundamba ñe'cʌ's, jyamwʌtzʌcpa'c jutzmij myato'ŋoytyamba mumu mijta'm, y jutzmis na'tzina'tzi y sʌtʌjtu'c mbʌjcʌchoŋdamu.

¹⁶ Nʌ'omba'ʌs porque mumutiyʌcʌsi'ʌsmij nijamdamba.