2 Corintios 6 - Zoque Copainalá New Testament

¹ Tʌj jeque, tumʌyospatʌj Diosji'ŋ, y nwa'cjaytyambatʌsmij umis comeque mbʌjcʌchoŋdamu Diojsis yajya'moquiuy.

² Porque nʌmba Dios: Oyepʌ aŋsʌ'ŋojmo'ʌsmij ŋgʌmato'ŋʌyu. Y cotzojcuy-jyamo'yʌsmij ŋgotzoŋu. Yʌtijte' te' aŋsʌŋ wa'mis mbʌjcʌchoŋdamu. Yʌtijte' te' jama wa'mij ŋguiotzoctamu.

³ Ja'ndʌs ya'iwʌ nyajnepcʌschʌmi yajtiyʌcʌsi, uy ñʌmyaju'ŋmʌjcʌ pʌnda'm que ja'nde' 'yoye te' yoscuy nʌtʌs ndzʌjcupʌ.

⁴ Pero como Diojsistʌjyʌ' wiyuŋšejpʌ quioyosa nitza'mʌpyatʌs nwin mumutiyʌcʌsi. Nitza'mʌpyatʌs nwin aŋba'tepʌ pacienciapit, toyapʌjcu'yojmo, yacsnu'ajcu'yojmo, y tuyu'yoquiu'yojmo.

⁵ Te'šejtijque' nacšajumʌytyʌj, somyajumʌytyʌj, niso'nʌyajumʌytyʌj, yoscu'yojmota'm tzu'quengu'yojmo y yu'ca'cu'yojmo.

⁶ Nitza'mʌpyatʌs nwin tacscosujupʌ tzocopyit, mujsoquiupyit, pʌ'mgopajcu'yojmo, oye'ajcu'yojmo, Espíritu Santopit y wiyuŋbʌ su'noquiu'yojmo.

⁷ Nitza'mʌpyatʌs nwin wiyuŋbʌ tzame'ojmo, Diojsis pyʌmipit y te' jyusticiapit coquijpapʌ'stʌj tzʌ'na'ŋojmo y aŋña'ojmoc,

⁸ pʌjcʌchoŋyajpamʌytyʌj y ja'ndʌj pʌjcʌchoŋyamyʌy, yatzicotzamyajpamʌytyʌj y oyecotzamyajpamʌytyʌj. Quiomʌ'yajpa juca aŋgoma'cʌ'opyapʌtʌjyʌ', pero wiyuŋdzambatʌj,

⁹ juca ja'ndʌj ispʌquiay, pero ispʌquiajpatʌj. Quiomʌ'yajpa juca nʌtʌj ŋga'u, pero yʌytyijtʌj ijtu. Juca yajco'aŋgʌyajupʌtʌjyʌ', pero jayajca'yatʌj.

¹⁰ Quiomʌ'yajpa juca tristeta'mbʌtʌjyʌ', pero oma'omatʌj itjojcʌtʌcpa. Quiomʌ'yajpa juca pobretʌjyʌ', pero nyajrico'ajpatʌs wʌwʌ pʌn, juca ja'ndiyʌtʌs yajndiyʌ, pero mumutiyʌ tʌs nʌ'ijtu.

¹¹ Ndumʌtzocoytyʌsmij ndzamjaytyamu mumutiyʌ, Corinto-pʌnda'm, y sundambatʌsmij ndumʌtzocoy.

¹² Jašu'naŋjejtamʌtʌsmij pero mistʌjte' su'naŋjejtamu ndzoco'yojmo.

¹³ Tʌs sunbatʌsmij, y wa'mistʌj te'šej sunwʌtzʌctaŋgue'tu mista'm, sundamʌtʌj ndumʌtzocoy (uneše'ʌsmij oto'ŋʌytyamba).

Quenbapʌ Diojsistʌyʌ' tyʌcta'm

¹⁴ Uy tumʌtzʌctame ja'n wyʌ'aŋja'mopyapʌji'ŋ. ¿Porque jutza'sʌ'ŋ maŋba tyʌwʌpa'tu justicia's te' yacha'cuy? ¿O jutza'sʌ'ŋ maŋba tyʌwʌpa'tu sʌ'ŋgʌ's te' pi'tza'ŋajcʌ'?

¹⁵ ¿Jutza' muspa tyumʌquipsoyu Cristo te' Belialji'ŋ? ¿Tyiya' ijtu wʌ'aŋja'moye's te' ja'n wyʌ'aŋja'mopyʌji'ŋ?

¹⁶ ¿Tiya' ijtu Diojsis tyʌjquis te' comichʌquiji'ŋda'm? Porque tʌta'mde' te' quenbapʌ Diojsis tyʌc ijtumʌy ñe'cʌ. Yʌ'šej nʌmu Dios: Maŋba'ʌj ijtu ñe'ta'm choco'yojmo, Y maŋba'ʌj nwijtu ñe'co'mota'm, Y ʌjte' te' ñe'ta'm Dios, Y ñe'cʌta'mde' ʌs mbʌnda'm.

¹⁷ Te'wʌcotoya nʌmgue'tpa: We'ndamʌ y puttamʌ ja'n wyʌ'aŋja'moyapyo'mo, Y uy tzʌctame yatzita'mbʌ tiyʌ, nʌmba tʌ Ngomi Dios. Pijche'ca mbʌjcʌchoŋdamba'ʌsmij,

¹⁸ Y ʌj misʌjte' maŋba Ndata'ajtamu, Y mij ʌsmijte' maŋba une'ajtamu. Te'šej nʌmba tʌ Ngomi, te' Cojojmejcoya.