2 Corintios 5 - Zoque Copainalá New Testament

¹ Mustambatʌ que juca yajpa yʌ' najsacopajcʌsipʌ tʌ ndʌc, tʌsyʌ' ŋgüerpo, ittamutʌ oyepʌ ndʌc Diojsistʌ tzi'tamupʌ. Yʌ'wʌ ja'nyʌ' yayepʌ te' tzajpojmo, ja'n cʌ'pit tujcupʌ.

² Wiyuŋšej toyapʌctambatʌ yʌ' najsacopajcʌsipʌ tʌ ŋgüerpo'ojmo porque ŋgʌñʌñdyambatʌ wa'ytyʌ maŋu mbʌjcʌchoŋdamu te' tzajpojmopʌ tʌ ŋgüerpo.

³ Porque mustambatʌ que mbʌjcʌchoŋdamba'candʌ te' tzajpojmopʌ tʌ ŋgüerpo, ja'ndʌ maŋu ittamu cuerpotaca.

⁴ Porque te' yʌtijpʌ cuerpo'ojmomajtʌ ittamupʌ, jo'ctambatʌ ndoyapʌjcu'yojmo. Ja'nde' juca sunjo'ytyambatʌ ndzajcu yʌ' cuerpo, sino que wa'ytyʌ maŋu mbʌjcʌchoŋdamu jomepʌ. Te'šej maŋba jyʌcʌ'u tʌ ca'papʌ ŋgüerpo te' jomepʌ quengu'yis.

⁵ Yʌ'wʌcotoyatʌte' nimejcʌyu Diojsis, y ñe'cʌ'stʌ prendatzacjayu te' Espíritu Santo.

⁶ Te'cotoya paquipʌcjojcʌtʌctambatʌ ndzoco'yojmo. Y mustambatʌ que ŋgüerpo'ojmomajtʌ ittamu'c, ya'amya' tʌ ŋguendamba tʌ Ngomi.

⁷ Porque wʌ'aŋjamgupyit tʌ tu'ŋajtamba y ja'ndʌ ŋguendame ñe'cʌ.

⁸ Paquipʌctambatʌ jeque ndzoco'yojmo y sunjo'pyatʌ ndzajcu tʌyʌ' ŋgüerpo wa'ytyʌ ijtu tʌ Ngomi's wyi'na'ŋoyj.

⁹ Te'cotoya juca teymʌ o yʌytyʌ ittamba, ndzʌcme'tztambatʌ wa'ytyʌ nyajtzocopyactamu Dios.

¹⁰ Porque ijtupʌ te' pyena wa'ytyʌ muma'ŋgʌ'y aŋguejtamu Cristo's wyi'naŋdʌjqui cʌme'tzopyamʌy. Pijche'c maŋba quioyojyatʌju tumduma'ŋbʌn tiyʌta'm chʌquiaju cuerpo'ojmomaj ijtyaju'c, juca oyepʌ tiyʌ o ja'n 'yoyepʌ.

Diojsis chʌjcu wa'ytyʌ našunʌtʌju ñe'cʌji'ŋ Cristopit

¹¹ Y como na'tzpa'ndʌs jeque ndzoco'yojmo te' Comi, ndzʌcme'tzpatʌs wa'ytyʌs nyajwʌ'aŋjamyaju pʌnda'm que wiyuŋšejta'mdʌjyʌ'. Diojsistʌj ispʌcpa y myuspa tiyʌtʌs ndzʌcpa. Y njo'cpatʌs que yajti mista'm ndzoco'yojmo mistʌj ispʌctamba.

¹² Ja'nandʌs jeque nitza'mʌwyʌtzʌqui nwin mijcʌsita'm, sino que ndzi'tambatʌsmij lugar wa'mistʌj mʌja'ŋgotzamdamu. Te'šej muspamis aŋdzoŋyaju myʌja'ŋgotzamyajpapʌ's wyin quene quenepʌ tiyʌcʌsi y ja'n choco'yojmopʌ tiyʌcʌsi.

¹³ Juca co'sawatʌj, jujcha' nʌmyajpa, Dioscotoyate'. Y juca nʌctʌ'yopyatʌj, mijcotoyata'mde'.

¹⁴ Cristo's šu'noquiu'yistʌj tzʌcjʌ'mʌpya porque muspatʌs que tumʌ pʌn ca'u mumu pʌngotoya. Mumu jeque ca'ʌnʌmu.

¹⁵ Mumu pʌngotoya jeque ca'u Cristo wa'y ijtyaju ñe'cʌcotoya y ja'n ñe' wyingotoyata'm, jujche'ŋ ijtyaju quenguy te' tzi'papʌtʌ ñe'cʌ's. Maŋba ijtyaju Cristocotoya porque ñe'cʌ ca'u y winsa'u ñe'cʌcotoyata'm.

¹⁶ Te'cotoya desde yʌtijše'ŋoyj ja'nandʌs nique'nʌy pʌn jujcha' eyata'mbʌ's ñique'nʌyajpa. Wina tʌs nique'nʌyu te' Cristo eyata'mbʌ pʌ'nis ñique'nʌyajpašej, pero yʌtij ja'ndʌs ndzʌqui te'šej.

¹⁷ Te'cotoya jeque, iwʌ ijtu Cristo'ojmo jomecotzʌjcupa'nde'. Te' pecata'mbʌ tiyʌ chacwa'a, y yʌtij muma' jomecotzʌjcu.

¹⁸ Mumu te'šejta'mbʌ tiyʌ chʌjcu Diojsis. Y Cristopit chʌjcu wa'ytyʌ našunʌtʌju ñe'cʌji'ŋ. Copiŋutʌj wa'ytyʌs ndzamgopuŋu wa'y ñašunwʌtzʌquiaju pʌn Diosji'ŋ.

¹⁹ Yʌ'šejte': Cristopit nʌ inʌc yajnašunwʌtzʌquiaju Diojsis ñe'cʌji'ŋ te' najsacopajcʌsita'mbʌ pʌn, y jamyayajaya pʌ'nista'm quiowa. Cojtutʌj wa'ytyʌs ndzamgopuŋu wa'y ñašunwʌtzʌquiaju pʌn Diosji'ŋ.

²⁰ Te'cotoya Diojsistʌj cʌ'weju Cristo's ñʌquiʌsi, como que ñe'cʌ'smijte' nʌ nwya'cjaytyamu tʌjpit. Nwa'cjaytyambatʌsmij Cristo's ñʌquiʌsi: Našunwʌtzʌctamʌ Diosji'ŋ.

²¹ Cristo, te' jaquiowapa'tʌpʌ, chʌmidzi'pʌ'u cowa Diojsis tʌcotoyata'm wa'ytyʌ justococojtu Diojsis ñe' jyusticia'ojmo Cristopit.