2 Corintios 4 - Zoque Copainalá New Testament

¹ Te'wʌcotoya, como nʌtʌj nyojsu te' evangeliocotoya, y como to'ya'ŋʌyutʌj Diojsis, ja'ndʌj mochcʌtʌwi ndzoco'yojmo.

² Y ja'ndʌs nyajyose cʌwʌ'ñajupʌ ni tza'ajcuytya'mbʌ tiyʌ, ni ja'ndʌs nʌtu'ŋay maña'cuy, ni ja'ndʌs ŋgacpʌ'i sutzipit Diojsis chame. Ndzambatʌs wiyuŋbʌ tiyʌ y te'šej ne'cʌtijtʌs nitza'mʌpya nwin mumu pʌngʌsi Diojsis wyi'naŋdʌjqui.

³ Juca iwʌ'sta'mis ja'nmaj ñʌctʌ'yay choco'yojmo te' evangelio ndzamgopuŋbapʌtʌs, te' nʌ tyocoyajupʌ'ste' ja'n ñʌctʌ'yay.

⁴ Como ja'n wyʌ'aŋjamyay, yajopi'tjayaju te' yʌpyʌ diojsis ñe'ta'm ñʌctʌ'yoquiuy. Yʌ'šej chʌjcu wa'y jana ñʌctʌ'yaju te' evangelio, te' tzi'papʌ'stʌ sʌ'ŋgʌ' y chambapʌ's te' Cristo's myʌja'ŋajcuy. Yʌ' Cristo's ñʌ'itjayu Diojsis chocoy y itcuy.

⁵ Porque ja'ndʌs ndzamgopuwi tʌs oyepʌ pʌ'najcuy sino que te' Jesucristo jujcha' Comi, y tʌj jujcha' mista'm ŋgoyospapʌ Jesuspit.

⁶ Aŋgui'mu Dios wa'y šʌ'ŋjojpajcu sʌ'ŋgʌ' pi'tza'ŋajcʌ'ojmo. Yʌ' Dios sʌ'ŋjojpajcu tʌ ndzoco'yojmo wa'ytyʌ tzi'u nʌctʌ'yoquiuy. Yʌ'šej chʌjcu wa'ytyʌ musjayu Diojsis myʌja'ŋajcuy. Yʌ' mʌja'ŋajcuy tʌ ŋguendamba Jesucristo's wyinnacacʌsi.

Nʌtu'ŋajojcʌtʌcta'mitʌy wʌ'aŋjamguy

⁷ Tʌj, mochipʌ y naspʌ pʌndijyʌ'que'. Pero Diojsis sʌ'ŋjojpajcu tʌs ndzoco'yojmo wa'ytyʌs nʌctʌ'yu ñe' myʌja'ŋajcuy. Yʌ'šej chʌjcu wa'y quieju que te' maya'aŋbʌ mʌja'ŋajcuy Diojsiste'ñe' y ja'nde' tʌsne'.

⁸ Jutʌtijtʌj mawʌ, yacsnutzʌquiajpatʌj pero ijtu jutʌtʌj putpa. Toyapʌcpatʌj, pero ja'ndʌs mbʌcjay maya'cuy.

⁹ Macnʌwijtyajpatʌj, pero tʌ Ngomi's ja'ndʌj tzaque. Tʌŋguñajpatʌj, pero ja'ndʌj yajca'yay.

¹⁰ Y jutʌtijtʌj mawʌ, sunbatʌj yajca'yaju jujcha' yajca'yaju Jesús, y te'šej quejpa tʌs ŋgüerpo'ojmo te' quenguy tzi'papʌtʌj Jesujsis.

¹¹ Porque quenba'cše'ŋoyjtyʌj, jojcʌtʌqui jamatʌj tzi'oquiu'yajyajpa wa'ytyʌj ŋga'u Jesujsis ñʌquiotoya. Te'šej quejpa tʌs ca'papʌ ŋgüerpo'ojmo te' quenguy tzi'papʌtʌj Jesujsis.

¹² Yʌ'šej jeque tʌj maŋba ŋga'u, pero mij maŋbamis mba'ttamu quenguy.

¹³ Pero nʌ'ijtutʌs tumo'pyʌ wʌ'aŋja'moquiuy ñʌ'ijtušej te' jya'yʌyupʌ's que wyʌ'aŋjamu y te'cotoya chamu. Te'šejtijque' tʌj, wʌ'aŋja'mopyatʌj y te'cotoya ndzamgue'tpatʌs.

¹⁴ Porque muspatʌs que yajwinsa'u Diojsis tʌ Ngomi Jesús, y te'wʌ'stʌj maŋba yajwinsa'que'tu tʌj porque yajwinsa'u Jesús. Y ñe'cʌ'stʌj maŋba nʌtʌjcʌyu miji'ŋda'm ñe' wyi'naŋdʌjqui.

¹⁵ Y mumu yʌ'šejta'mbʌ toya tʌs ŋguenba mijcotoyata'm wa'y wyʌwa'u te' yajya'moquiuy wʌwʌ pʌngotoya. Te'cotoya más wʌwʌ pʌn maŋba ñʌmyaju yʌscotoya y maŋba myʌja'ŋwʌcotzamyaju Dios.

¹⁶ Te'cotoya ja'ndʌj mochcʌtʌwi ndzoco'yojmo. Ñempe yajpa uša'ŋ uša'ŋ tʌsyʌ' ŋgüerpo, tumdumʌ jama jome'ajpa tʌs espíritu.

¹⁷ Porque yʌtijtʌs nʌ ŋguenupʌ toya chʌlʌy horacotoya. Te'wʌ's nʌtʌj nimejcʌyjayu maya'aŋbʌ y ja'n yayepʌ mʌja'ŋajcuy.

¹⁸ Ja'ndʌs nique'nʌy te' quejyajpapʌ tiyʌ, sino que te' ja'n quiejyapyʌ. Porque te' quejyajpapʌ tiyʌ, uša'ŋ horacotoyatijte', pero te' ja'n quiejyapyʌ tiyʌ ja'nde' yajyapyʌ.