2 Corintios 13 - Zoque Copainalá New Testament

Ultimota'mbʌ dyujchi'oquiuy y tiyʌta'm wa'y myujšajutya'a

¹ Yʌtij tuca'y ñaco'ma'mʌjyʌ' maŋba minu mi'aŋʌta'm. Wiyuŋše'ajpa mumu wa'coquiuy metza tuca'pyʌ testigujsis chamepit.

² Ndzamnʌctʌ'yajwa'mʌs ʌ' cowapa'tyajupʌ y mumu te' eyata'mbʌ. Como yʌmya'ʌj ijtu ndzaminjayajpa'ʌs quipsoquiuy ndzʌjcuše'ʌs myetza naco'mo ʌj tiju'c tey.

³ Como sunbamis ŋguendamu seña juca wiyuŋšej Cristoji'ŋʌj tzamba, juca mingue'tpa'ʌj, ja'ʌs maŋu ndo'ya'ŋʌyaju. Ñe'cʌ tumdzambatij miji'ŋda'm, y pʌmi'ʌyupʌte' mista'm ndzoco'yojmo.

⁴ Ñempe tumnaca mya'myaju cruzcʌsi mochipʌšej, yʌtij quenba Diojsis pyʌmipit. Pues te'šejtijque' tʌj mochipʌtʌjyʌ' ñe'cʌšej, pero jujcha' ñe'cʌ's ijtu quenguy Diojsis pyʌmipit, te'šejtijque' tʌj. Y tʌsmij maŋba nyajquenjaytyamu yʌ'šejpʌ quenguy y pʌmi.

⁵ Tacscʌme'tztamʌ mista'm ne' nwin wa'mis ŋguendamu juca wiyuŋšejmij nwyʌ'aŋja'moytyamba. Tzʌjquistamʌ ne' nwin. ¿Ja'nja mustame ne'cʌ que te' Jesucristo ijtu mi'ojmota'm? Juca ja'ne, jambyuttamʌmij oye ñchʌjquisʌtʌjtamu'cmij.

⁶ Pero njo'cpatʌs que mustambamis que pujtutʌj oye tzʌjquišaju'ctʌj.

⁷ Nwa'cpatʌs Dioscʌsi umis ndzʌctamu yatzita'mbʌ tiyʌ. Yʌ'šejtʌs nwa'cpa ja'n wa'mistʌj ŋguendamu jujcha' oye pujtupʌ, sino que wa'mis ndzʌctamu te' oyeta'mbʌ tiyʌ, ñempe mistʌj ŋgomʌ'ytyamʌ jujcha' chʌjquišajupʌ y japyutʌpʌ oye.

⁸ Tʌs ndzoco'yis ja'ndʌj tzaque wa'ytyʌs nʌquijpu wiyuŋbʌ tiyʌ sino que ŋgoquijpatʌs wiyuŋbʌ tiyʌ.

⁹ Te'cotoya nʌ'ombatʌs wa'mij mij paquic ittamu ñempe mistʌj ŋgomʌ'ytyamʌ jujcha' japyutʌpʌ oye. Y wa'copyatʌj Dioscʌsi wa'mij ŋguiota'nbʌ'tamu Cristo's wyi'naŋdʌjqui.

¹⁰ Te'cotoya'ʌsmij njayjaytyamba yʌ'šej desde yʌytyij uytya'mʌsmij otoŋjaytyamu te'yamʌj ijtu'c. Porque tʌ Ngomi'sʌj tzi'u aŋgui'mʌtʌjcuy wa'yʌs mbʌmitzi'yaju pʌnda'm y ja'n wa'yʌs nyajtocoyaju.

¹¹ Te'cotoya, atzita'm, nʌ'omdamʌ, cota'nbʌ'tamʌ mumu tiyʌcʌsi. Tzocopyactamʌ, tumʌquipsoytyamʌ y sʌ'mnayu'c ittamʌ. Te'šej maŋba ijtu mista'm ndzoco'yojmo Dios, chʌcpapʌ's sʌ'mnaquiuy y našunʌtʌjcuy.

¹² Masanbʌ su'coquiupyit nadyujchi'ʌtʌjtamʌ ne'co'mo.

¹³ Mumu masanbʌ'nismij ñdyujchi'tamba.

¹⁴ Sunba'ʌs wa'y ijtu mi'ojmota'm tʌ Ngomi Jesucristo's yajya'moquiuy, y wa'mij šundamu Diojsis, y wa'mij ŋguiotzoŋdamu Espíritu Santo's, te' ijtupʌ mis ndzoco'yojmo. Amén.