2 Corintios 11 - Zoque Copainalá New Testament

Pablo y te' sujchajpapʌ cʌ'wej

¹ Sunjo'pya'ʌs wa'mis mbʌ'mgopajcʌyjaytyamu ušʌc ʌs ŋgo'sawa-tzame. Pʌ'mgopajcʌytyamʌ jeque'ʌj,

² porque ŋgʌjoŋdamba'ʌsmij Diojsisʌj tzi'upʌ cʌjoŋgupyit. Porque mbrendatzʌctamu'ʌsmij tumʌpʌ jayaji'ŋ, y te'wʌ te' Cristo, wa'yʌsmij ndzi'oquia'tamu ñe'cʌcʌsi jujcha' tumʌ saŋmu'šapʌ yomo.

³ Pero na'tzpa'ʌj uytya'mis ndzactamu mis oyepʌ wʌ'aŋja'moquiuy Cristocʌsi, y umij maŋu 'yaŋgoma'cʌyu mijta'm ya'iwʌ's jujcha' 'yaŋgoma'cʌyu Eva te' serpiente's te' myañapit.

⁴ Juca iwʌjutiwʌ minba y chamgopuŋba eyapʌ Jesús y ja'nde' te' tʌsmij ndzamgopuŋjaytyamupʌ, mbʌ'mgopajcʌytyambamis. Y te'šejtijque' juca mbʌjcʌchoŋdambamis eyapʌ espíritu ja'nde' te' mbʌjcʌchoŋdamupʌmis wina, o eyaco evangelio y ja'n te' wina mis mbʌjcʌchoŋdamupʌ, mbʌ'mgopajcʌytyambamis.

⁵ Ngomʌ'pya'ʌs que juca mʌja'ŋda'm te' mi'ojmota'm ijtyajupʌ cʌ'wej, te'šejtijque' ʌj mʌja'ŋ.

⁶ Ñempe'ʌs ndzamba ja'n šuñita'mbʌ ndzamepit, nʌctʌ'pya'ʌs oye mumu wiyuŋda'mbʌ tiyʌ. Nyajquendamutʌsmij yʌ'šej mumutiyʌcʌsi mumu mi'ojmota'm.

⁷ ¿Cowapa'tusʌ'ŋʌj porque nyumijcotzʌjcu'ʌs nwin wa'mij myʌja'ŋajtamu? ¿O cowapa'tusʌ'ŋʌj porque ʌsmij ndzamgopuŋjaytyamu Diojsis 'yevangelio coyowataca?

⁸ Ndzʌmitzi'yaju'ʌs eyata'mbʌ tu'mʌquiuy y mbʌjcʌchoŋu'ʌs coyowa ñe'cʌcʌsita'm wa'yʌs nyajyojsu mijcotoyata'm.

⁹ Te'yʌj ijtu'c miji'ŋda'm y ŋguenu'cʌs toya ya'iwʌ'ʌs jañchʌmitzi'ʌ. Te' atzita'm miñajupʌ Macedonia-najsojmoc, te'wʌ'sʌj pajtzaŋdajšaju. Ngoquenu'ʌs cuenta u'yʌsmij yajtiyʌcʌsi ndzʌmitzi'tamu, y te'šej ʌs maŋba ŋgoquenjojcʌtʌjcu cuenta.

¹⁰ Cristo's wiyuŋbʌ tyiyʌ ijtu ʌs ndzoco'yojmo. Te'cotoya ya'iwʌ'sʌj ja'n maŋu yajwindujcu Acaya-najsojmo wa'yʌs mʌja'ŋgotzamu que ndzamgopuŋba'ʌs te' evangelio coyowataca.

¹¹ ¿Tiyʌcotoya ja'ʌs ndzaque wa'misʌj ŋgoyoju? ¿Porque ja'ʌsmij sundame? Diojsis myuspa que sundamba'ʌsmij.

¹² Y juca mʌja'ŋgotzamba'ʌs que ndzamgopuŋba'ʌs coyowataca, maŋba'ʌs ndzʌcjojcʌtʌjcu wa'yʌs nyajwindujcu te' nʌ chamyajupʌ tiyʌ. Ijtu nʌ ñʌmyajupʌ que mʌja'ŋbʌte' ñe'ta'm yoscuy, jujcha' tʌsne' mʌja'ŋbʌte', y sunba tyu'mbajcajyaju tʌji'ŋ tʌs nyoscu'yojmo.

¹³ Yʌ'ta'mbʌ sujchajpapʌ cʌ'wejta'myʌ', aŋgoma'cʌ'oyajpapʌ coyosata'm, chʌquiajpapʌ's wyin Cristo's quiʌ'wejšej.

¹⁴ Uy nʌmaya'tame, porque yajtya' Satanajsis chʌcpa wyin tzi'muŋbapʌ angelesšej.

¹⁵ Te'cotoya ja'nde' maya'aŋbʌ tiyʌ juca te' Satanajsis quioyosa'sta'm chʌquiajpa wyin jujcha' yojšajpapʌ justiciacotoya. Pero te' yojsaŋšej te'šej maŋba quiopujtyaju.

Yojsu'c cʌ'wejšej Pablo, jene quienu toya

¹⁶ Ndzamgue'tpa'ʌs: Uy quiomʌ'yu ya'iwʌ's juca njowipʌ'ʌjyʌ'. Y ñempe jowipʌšej misʌj ŋgomʌ'ytyamʌ, pʌjcʌchoŋdamʌ'ʌj jujcha' jowipʌ, wa'yʌs mʌja'ŋgotzamgue'tu nwin ušʌc, jujcha'nde' eyata'mbʌ's.

¹⁷ Te' ʌs nʌ ndzamupʌ tiyʌ, ja'nʌs nʌ ndzamu tʌ Ngomi's šunbašej, sino que njowipʌšej nʌ'ʌs ndzamu wa'yʌs mʌja'ŋgotzamu nwin.

¹⁸ Como jene ijtyaju mʌja'ŋgotza'moyajpapʌ najsacopajcʌsita'mbʌ tiyʌcʌsi, te'šejtijque' ʌj mʌja'ŋgotza'mopya'ʌj.

¹⁹ Porque oyepʌ tzocopyit mbʌ'mgopajcʌytyambamis jowita'mbʌ, porque mijta'm, jʌ'ʌ myujsoyeta'm.

²⁰ Mbʌ'mgopajcʌytyambamis juca iwʌ'smij mozocotzʌctamba, ñicu'tpʌ'tamba o ñijuptamba. Y mbʌ'mgopajcʌytyambamis mujsoyešej chʌcpapʌ's wyin, y te' chaŋjayajpapʌ's mista'm nwinnaca.

²¹ Tza'ajpa'ʌj porque nyajquejutʌs mocha'cʌ' y jañchʌcʌtʌs yʌ'šejta'mbʌ tiyʌ mi'ojmota'm. Pero iwʌ's ja'n ña'tze wa'y myʌja'ŋgotzamu wyin, te'šejtijque' ni ʌs ja'ʌs na'tze wa'yʌs ndzʌjque'tu (jowipʌše'ʌs ndzamba).

²² ¿Hebreojate' te'ta'm? Ʌj pitti'ʌjyʌ'que'. ¿Israel-pʌnjate' te'ta'm? Ʌj pitti'ʌjyʌ'que'. ¿Abraha'ŋisjate' wyinboya te'ta'm? Yajti'ʌj.

²³ ¿Cristo'sjate' yojšajpapʌ? Ʌj, masʌjyʌ' oyepʌ, porque masʌj pʌmiyospa. Co'sawapʌše'ʌs ndzamba. Jana tza'ma'ŋʌj nacšaju. Masʌj somyaju que ja'n eyata'mbʌ. Y sone naca'ʌj yajca'yajtʌ'u.

²⁴ Mosa'y ñaca'ʌj tapšaju judio'sta'm, y tumdumʌ niwoya tapšajumʌ'yʌj ips-co-yʌt-co-macšcu'y ñaca'ʌj tapšaju.

²⁵ Tuca'y ñaca'ʌj nacšaju namacupyit. Tumnaca tʌŋyaju'ʌj tza'pit. Tuca'y ñaca'ʌj maŋu barco'ojmo, y jʌ'tpʌ'u te' barco ma'rojmo, y maŋba inʌjcʌj sucsca'u. Tuma'ŋdzu' y tuma'ŋjama'ʌj pʌ'nwijtu ma'rojmo.

²⁶ Sone naca'ʌj ijtu'c tu'ŋojmota'm jʌ'tpʌ'pa inʌjcʌj nʌ'ojmo, sunba inʌjcʌj ninu'myaju, yajtoyapʌquiajpa inʌjcʌj nacioŋ-dʌwʌ's y te'šejtijque' genti'lista'm. Toyapʌcpa inʌjcʌj cumgu'yojmo y ja'itʌnʌmʌmʌy, y ma'rojmo. Yajtoyapʌquiajpa inʌjcʌj sujchajpapʌ atzi'sta'm.

²⁷ Te'šejtijque' je'ecaju-co'ŋaju ʌj inʌc yospa, tzu'quenba inʌjcʌj, yu'pa y yoctʌtzpa inʌjcʌj, ayunatzʌcpa inʌjcʌj sone naca, y ŋguenba'ʌs inʌc pama-ja'ndiya'cuy pacajcojmo.

²⁸ Nguengue'tpa'ʌs eyata'mbʌ toya, y te'šejtijque' tumdumʌ jama ŋgoje'cšajpa'ʌs ndzoco'yojmo mumu te' tu'mʌquiuytya'm.

²⁹ Juca ijtu mochipʌ, toyapʌcpa'ʌj ñe'cʌji'ŋ. Juca ijtu tuŋdocopyapʌ, toyapʌcpa'ʌj ndzoco'yojmo.

³⁰ Juca ijtupʌ te' pyena wa'yʌs mʌja'ŋgotzamu nwin, mʌja'ŋgotzamba'ʌs jutzta'mbʌ tiyʌ's yajquejapya ʌs mocha'cʌ'.

³¹ Te' Dios, tʌ Ngomi Jesucristo's Tyata's myuspa que ja'nʌj sutzi. Y te'wʌ's myerecetzʌcpa wa'ytyʌ nwʌcotzamdamu mumu jamacotoya.

³² Te' rey Aretajsis quio'aŋgui'moye ijtu inʌc te' Damasco-cumgu'yojmo wa'y 'yaŋgui'moyu te' najsoyj. Yʌ'wʌ's quiojtu pʌnda'm wa'y quioqueñaju te' Damasco-cumguy wa'yʌj nuquiaju.

³³ Pero ventana'ojmojcʌj jʌ'mbujtyaju atzi'sta'm mʌja waco'mo, y te'še'ʌj jañuquia.