1 Timoteo 6 - Zoque Copainalá New Testament

¹ Mumu jujche'ŋ yojšajpapʌ coyowataca quiomicʌ'mʌ, oye wa'y myato'ŋoyjayaju quiomi pyʌcpašej uy 'yotowewʌ'ajayaju'ŋmʌjcʌ Diojsis ñʌy y tʌta'm aŋma'yoquiuy.

² Iwʌ's ijtyaju quiomi wʌ'aŋja'mopyapʌ, uy myenoschʌquiaju quipsoquiu'yojmo porque atzita'mde', sino que wa'y yosjayaju oye'c, porque te' ñʌwʌ'ajyajpapʌ's te' yospapʌ's yojsaŋ, šuñatʌjpapʌ wʌ'aŋja'moyeta'mde'. Aŋmaya y tzamgopuŋjaya wa'y chʌquiaju yʌ'šejta'mbʌ tiyʌ.

Sʌ'mnayu'c yajnʌ'ijtya chocoy wʌ'aŋja'moye'sta'm

³ Juca iwʌ aŋma'yopya eyapʌ aŋma'yoquiu'yojmo y ja'n šunjay tʌ Ngomi Jesucristo's oyepʌ chame ni te' aŋma'yoquiuy pyʌcpašej te' Dios-cʌna'tzʌ'oquiu'yis,

⁴ te'wʌ's nʌte' myʌja'ŋgomʌ'yu wyin, ja'n myusi yajtiyʌ, maŋdzʌ'yu'c quio'sawa coquijpapʌ's tiyʌ'iwʌ tzame comeque'ctij. Yʌ'šejta'mbʌ tiyo'mo putpa ni'aŋsu'noquiuy, quipcuy, ni'undza'mʌ'oquiuy y yatzi quipsoquiuy tyʌwʌcotoya.

⁵ Putque'tpa yajqui'šca'opyapʌ tiyʌ entre pʌ'nojmota'm, te' tocoyajupʌ'sa quipsoquiuy y ja'n pyʌjcʌchoŋyapyʌ's wiyuŋbʌ tiyʌ. Yʌ'ta'mbʌ's quiomʌ'yajpa que te' Dios-cʌna'tzʌ'oquiupyit maŋba pya'tyaju itʌpa'tcuy. Tzaquia te'šejta'mbʌ.

⁶ Wiyuŋ-šej te' Dios-cʌna'tzʌ'oquiuy, itʌpa'tcuytye' juca tzocoyšʌ'mnayu'ctʌ jamacʌtʌcpa.

⁷ Porque yajtiyʌtʌ jañʌmindamʌ najsacopajcʌsi y te'šejtʌ ja'n yajtiyʌ nʌmaŋdame.

⁸ Te'cotoya juca itpa tʌ ŋgu'tcuy y tiyʌpittʌ ninu'sʌpya nwin, sʌ'mnayu'ctʌ itta'mi.

⁹ Pero te' sunba itʌpa'tyajupʌ, 'yoc'išajpa Satanajsis wa'y 'yaŋsuñaju ja'n 'yoyeta'mbʌ tiyʌ, tzʌctoco'yoyajpapʌ. Yʌ'šejta'mbʌ tiyʌpit tocoyajpa Diojsis wyi'naŋdʌjqui mumutiyo'mo.

¹⁰ Porque tumin-su'noquiuquiʌsi po'pajnapya mumu yacha'cuy. Y yʌ'šejpʌ su'noquiupyit ijtu chaquiajupʌ's te' wʌ'aŋja'moquiuy, y te'cotoya ñe'cʌ'stij chʌcjayaju toya ñe' wyin.

Ngoquipta'mitʌy oye'c te' wiyuŋšejpʌ wʌ'aŋja'moquiuy

¹¹ Pero mij, Diojsis mijyʌ'ñe', uy cote ndzocoy yʌ'šejta'mbʌ tiyʌcʌsi. Co'ŋa oyepʌ-pʌ'najcuy, wʌ'aŋja'moquiuy, su'noquiuy y paciencia. Cʌna'tzʌ Dios y nʌ'itʌ yumijpʌ tzocoy.

¹² Y coquipʌ oye'c te' wiyuŋšejpʌ wʌ'aŋja'moquiuy. Ndumʌtzocoy nite'tzʌ te' ja'n yayepʌ quenguy. Diojsis te'wʌcotoyamijte' nwyeju cuando quejuqueju'c mij ñʌmu'c que nwyʌ'aŋja'mopyamij sonepʌ testigujsis wyi'naŋdʌjqui.

¹³ Aŋgui'mba'ʌsmij Diojsis ñʌquiʌsi, te' chi'papʌ's quenguy mumutiyʌ, y te' Jesucristo's ñʌquiʌsi, te' quiotestigosajupʌ's wʌ'aŋja'moquiuy Poncio Pilato's wyi'naŋdʌjqui.

¹⁴ Aŋgui'mba'ʌsmij jeque wa'mis mato'ŋoyjayu mumutiyʌcʌsita'm mij 'yaŋgui'myajpa, umij yajtiyʌcʌsi ŋguionoquiaju hasta que minba tʌ Ngomi Jesucristo.

¹⁵ Y yʌ'wʌ maŋba yajqueju Diojsis nu'cpa'ca 'yaŋsʌŋ. Ñe'cʌte' te' masanbʌ Dios tumʌpʌ, muspapʌ's chʌjcu mumutiyʌ, te' Rey re'yista'mñe', y Quiomi comi'sta'mñe'.

¹⁶ Yʌ'wʌte' te' ja'n yajujche'c quia'epʌ, na'chaŋbʌ sʌ'ŋgʌ'ojmo itpapʌ, ja'n ya'iwʌ's musi tyo'mʌyupʌ. Y yʌ'wʌ, ya'iwʌpʌ pʌ'nismaj jaquiendʌ'ʌ ni ja'n musi quienu. Ñe'cʌte' te' aŋgui'mʌtʌjcu'yista'm Quiomi y ñe'cʌtʌ ma'ndʌ ŋgʌna'tzʌytyamu mumu jamacotoya. Amén.

¹⁷ Aŋgui'mya yʌ' najsacopajcʌsita'mbʌ rico uy myʌja'ŋdzʌquiaju wyin, uy quiojtyaju chocoy rico'ajcuquiʌsi, porque cʌtʌcpapʌ tiyʌte'. Yajcojtya chocoy te' quenbapʌ Dioscʌsi, te' tzi'tambapʌ'stʌ mumutiyʌ jana yaye wa'ytyʌ nʌ'omdamu.

¹⁸ Yajtzʌquia oyeta'mbʌ tiyʌ, y wa'y pajcupajcu'c quiotzo'ŋoyaju, wa'y wye'nbʌ'yaju y šajyaju tyiyʌta'm ijtyaju.

¹⁹ Yʌ'šejta'mbʌ tzʌquipit nʌte' ñipcʌwʌ'ñaju rico'ajcuy tzajpojmocotoya, y tumʌtzocoy nʌ ñite'tzʌyaju te' ja'n yayepʌ quenguy.

Ñitza'mʌchacjayajupʌ tiyʌ te' Timoteo

²⁰ Yʌtij Timoteo, ndzoco'yojmo nʌ'itʌ tiyʌta'm mij Diojsis ñitza'mʌyjayu. Uy cʌmato'ŋʌy ja'n 'yoyeta'mbʌ tzamdzamnaquiuy yajtiyʌcotoya ja'n yojšapyʌ, ni te' otoŋguipcuy comeque'ctij ñʌjayajpapʌ mujsoquiuy.

²¹ Te' te'šej aŋma'yoyajpapʌ's chaquiajuwa'nde' te' wiyuŋšejpʌ wʌ'aŋja'moquiuy. Pero mij, Diojsismij nyajnicoque'nʌ. Amén.