1 Timoteo 5 - Zoque Copainalá New Testament

Jutz pyʌcpa wa'ytyʌ ndu'ŋaju wʌ'aŋja'moquiu'yojmo

¹ Uy otoŋjayay tzamyajupʌ pʌnda'm, sino que sa'sa'c aŋnʌctza'mʌya jujcha' mis ndataj, y te' más unepʌnda'mbʌ jujcha' mis atzita'm.

² Y nanašej yo'cayo'ca'c oto'ŋʌya te' tzamyajupʌ yomota'm, y ŋgosešej oto'ŋʌya cowajupʌ mis ndzocopyit te' uneyomota'm.

³ Cotzoŋya te' wiyuŋšej se'aŋda'mbʌ yomo.

⁴ Pero juca iwʌjutiwʌ se'aŋ-yomo's ijtyaju 'yune o 'yoco'une, yʌ'ta'mbʌ's ya'aŋmaya winac wa'y quiotzoŋyaju ñe' fyamilia wa'y te'šej pyʌ'nʌyaju quioyajpʌ'na. Yʌ'šejte' oye porque yajtzocopyacpa Dios.

⁵ Te' wiyuŋšej se'aŋbʌ y ñaytyumʌpʌ yomo's ñite'tzʌpya Dios y 'yoto'ŋʌpya tzu'ji'ŋ jamaji'ŋ.

⁶ Pero te' chʌcpapʌ's ñe' wyi'nis šu'noquiuy, ñempe quenbawʌtij, ca'uwʌšejte' ijtu.

⁷ Aŋgui'mya yʌ'šejta'mbʌ tiyʌcʌsi uy yajtiyʌcʌsi quionoquiatʌju.

⁸ Y juca iwʌ's ja'n quiote jamacʌtʌjcuy fyamiliacotoya, y nimequete' te' tyʌjcaŋʌ ijtyajupʌcotoya, yʌ'šejwʌ's chajcuwa'nde' te' wʌ'aŋja'moquiuy y masa'nde' yatzi que ja'nde' te' ja'n wyʌ'aŋja'mopyʌ.

⁹ Tuqui's amepʌ se'aŋde' oye wa'y jya'yʌyjayaju ñʌy tu'mʌquiu'yojmo, tumnacatij co'tʌjcajupʌ.

¹⁰ Y te' oyeta'mbʌ chʌquipit pyʌcpa wa'y wyʌcotzamyaju pʌ'nista'm juca yajtzojcu une, juca chi'oquia'u jejcuy, juca che'jayu masanbʌ'nista'm ñe'ŋbac, juca quiotzoŋu nʌ quienupʌ's toya, y juca chʌcjojcʌtʌcpa oyeta'mbʌ tiyʌ.

¹¹ Pero uy japyʌcjayay ñʌy te' uneyomota'mbʌ se'a'ŋisñe' porque cuando sunba chʌquiaju ñe' wyi'nis šu'noquiuy, jyambʌ'yajpa te' Cristo y sunba quio'tʌjcajyajque'tu.

¹² Y te'šej minba te' co'aŋgʌquiuy ñe'cʌcʌsita'm porque chaquiaju te' winapʌ wyʌ'aŋja'moquiuy.

¹³ Y te'šejtij nu'ŋʌyajpa wa'y jana yajtiyʌ chʌquiaju y maŋyajpa tʌcnamaye, y ja'n solo jaraganda'm, sino que undzamyajpa y tyʌ'ŋʌyajpa wyin ja'n ñe'cʌ's quiowindzʌmipʌ tiyo'mo wa'ytyij jowi-tzamyajpa.

¹⁴ Sunba'ʌs jeque wa'y quio'tʌjcajyaju te' uneyomota'mbʌ se'aŋ, wa'y ijtyaju 'yune y wa'y 'yaŋgui'myaju tyʌjcojmota'mbʌ uy chi'yaju lugar te' qui'nispapʌ'stʌ wa'ytyʌ yatzicotzamu.

¹⁵ Porque ijtyaju se'aŋ-yomo pyʌquiajupʌ'sa eyapʌ tuŋ wa'y quio'ŋyaju Satanás.

¹⁶ Juca wʌ'aŋja'mopyapʌ pʌ'nis o yomo's ijtu chʌñdyʌwʌ se'aŋda'mbʌ, yajnʌwe'ña jyamacʌtʌjcuy uy chʌmitzi'u te' Diojsis tyu'mʌquiuy. Te'šej muspa quiotzoŋu tu'mʌquiu'yis te' wiyuŋšejta'mbʌ se'aŋ-yomo.

¹⁷ Pyʌcpa wa'ytyʌ tzijpatzijpa'c ŋgotzoŋyaju te' oye aŋgui'moyajpapʌ anciano, y nimeque te' tzamgopu'ŋoyajpapʌ y aŋma'yoyajpapʌ ancianota'm.

¹⁸ Porque te' Totojayecʌsi nʌmba: Uy quinʌcosi'ni te' cabrestu nʌ yojsupʌ. Y nʌmgue'tpa: Jujche'ŋ yospapʌ ijtu pyena wa'y quioyojyaju.

¹⁹ Uy cʌma'to'ŋʌyay minbapʌ's ñicotza'mʌyaju te' ancianota'm, juca ja'n chamyay metza o tuca'pyʌ testigujsis.

²⁰ Te' anciano nuyu'ajcu'yojmo nʌ quiowapa'tyajupʌ, otoŋjaya mumu'iwʌ's wyi'naŋdʌjqui wa'y ña'chajque'tu te' eyata'mbʌ.

²¹ Aŋgui'mba'ʌsmij Diojsis y Cristo Jesujsis wyi'naŋdʌjqui, y copiŋyajupʌ angelejsis wyi'naŋdʌjqui wa'mis ŋgojamu yʌ'šejta'mbʌ tiyʌ y umis windij ŋgʌme'tzu ya'iwʌ, uy quiomʌ'yaju que tumʌ mis sunba y eyapʌ ja'ne.

²² Uy jecse-cote ŋgʌ' yempe'iwʌpʌ ancianocʌsi wa'mis jana nʌpʌjcu quiowa eyapʌ'sñe'. Ne'cʌ, cowajupʌ coquena nwin.

²³ Como jenemij ŋguia'epa'tpa, uy saŋnʌ' to'ŋe, to'ŋgue'ta ušʌc vino wa'mij co'sa'sa'c ijtu.

²⁴ Wene pʌ'nista'm quiowa nʌwa' yajquejyaju wa'ytyʌ ŋgʌme'chaju, pero eyata'mbʌ'sñe' maŋba quieju jʌsa'ca.

²⁵ Te'šejtijque' te' oyeta'mbʌ tzʌqui claro quejyajpa, y te' ja'n quiejyapyʌ yʌtij, ja'n musi nu'mdij itjojcʌtʌquiaju.