1 Timoteo 4 - Zoque Copainalá New Testament

Te' chaquiajpapʌ's wyʌ'aŋja'moquiuy

¹ Pero te' Espíritu Santo's quejuqueju'c chamba que te' minbapʌ aŋsʌ'ŋojmo maŋba ijtu maŋba chaquiajupʌ's te' wʌ'aŋja'moquiuy. Y maŋba quiʌmato'ŋʌyaju aŋgoma'cʌ'oyajpapʌ espirituta'm y yatzi-espiritu'sta'm 'yaŋma'yoquiuy.

² Te' aŋma'yoyajpapʌ yʌ'šejta'mbʌ tiyʌcʌsi cʌ'oto'ŋʌ'oyajpa y sujchajpa porque nuyu'ajyaju te' choco'yis quipsoquiuy.

³ Te'ta'mbʌ's maŋba yajwinduquiaju co'tʌjcajcuy, y maŋba quiojtyaju aŋgui'mguy uy quiu'tyaju wi'ni eyata'mbʌ cu'tcuy. Pero Diojsis chʌjcu yʌ'šejta'mbʌ cu'tcuy wa'y quiu'tyaju wʌ'aŋja'moye's, myujšajpapʌ's te' wiyuŋbʌ tiyʌ, y wa'y ñʌjayaju Dios yʌscotoya.

⁴ Tiyʌta'm chʌjcu Diojsis, oyepʌte' y ja'n 'yoye wa'ytyʌ menoschʌjcu yajtiyʌ, sino que oye wa'ytyʌ nʌjayu Dios yʌscotoya jujche'ŋ nacatʌ ŋgu'ttamba.

⁵ Porque te' cu'tcu'ytya'mbʌ tiyʌ chʌjcupʌ Diojsis, masa'najpa te' Diojsis chamepit y te' Dios-oto'ŋʌquiupyit.

Jesucristo's wʌta'mbʌ quioyosa

⁶ Juca yʌ'šejmis aŋmayajpa te' atzita'm, oyepʌ ŋguioyosamijte' Jesucristo'sñe', porque nʌmij mbyaquipʌjcu te' Diojsis chamepit, chambapʌ's te' wʌ'aŋja'moquiuy y te' oyepʌ aŋma'yoquiuy, nʌmis ŋgo'ŋupʌ.

⁷ Te'cotoya uy cʌmato'ŋʌy jowita'mbʌ undzame y sutzita'm yajtiyʌcotoya ja'n yojšapyʌ. Aŋmayʌ wa'mis ŋgʌna'tzʌyjojcʌtʌjcu Dios.

⁸ Juca nyajnu'ŋʌpyatʌ ne' ŋgüerpo tiyʌ'iwʌcʌsi, nʌwʌ'ajpatʌ uša'ŋ, pero juca nu'ŋʌpyatʌ wa'ytyʌ ŋgʌna'tzʌyu Dios, nʌwʌ'ajpatʌ mumutiyʌcʌsi yʌpyʌ quenguquiotoya y te' minbapʌ quengu'yojmo.

⁹ Wiyuŋšejpʌ tzamete' te'šej, y pyʌcpa wa'ytyʌ muma'ŋgʌ'y nwʌ'aŋjamdamu.

¹⁰ Te'cotoyatʌte' te'wo'mo yostamba y istambatʌ toya porque njo'ctambatʌ te' quenbapʌ Dios. Te'wʌ'ste' yajcotzocpa mumu pʌn, pero nimeque te' wyʌ'aŋjamyajpapʌ's ñe'cʌ.

¹¹ Aŋma'yoya y aŋgui'moya yʌ'šejta'mbʌ tiyʌcʌsi.

¹² Ñempemij 'yunepʌn, umij ya'iwʌ's myenoschʌjcu. Pero que'naŋgʌschi'ʌya te' wʌ'aŋja'moyeta'm mis ndzamepit y ndzʌquipit. Su'noya, wʌ'aŋja'moya y nʌ'itʌ cowajupʌ tzocoy wa'mis ŋgue'naŋgʌschi'ʌyaju te' wʌ'aŋja'moyeta'm.

¹³ Mientrasʌj minba, tu'njojcʌtʌcʌ te' Totojaye tu'mʌquiu'yojmo wa'y pyʌmitzi'yaju y 'yaŋmayaju atzita'm.

¹⁴ Coquena cuenta yʌ' tzi'ʌtʌjcuy mi'ojmo ijtupʌ, ñchi'upʌmij Diojsis, quiojtyaju'c quiʌ' mijcʌsi anciano'sta'm, mij ñchamyaju'c Diojsis ñʌquiʌsi.

¹⁵ Coquenjojcʌtʌcʌ cuenta yʌ'šejta'mbʌ tiyʌcʌsi, y tzʌcjojcʌtʌcʌ wa'y quieñaju mumu pʌ'nis jutz mis nʌwi'najpa nwʌ'aŋjamguy.

¹⁶ Coquena cuenta ne' nwin y te' aŋma'yoquiuy, y uy ca'ŋdzaque te'šejta'mbʌ tiyʌ. Juca yʌ'šej mis ndzʌcpa, nyajcotzocpamis ne' nwin y iwʌ'sta'mismij ŋguiʌmato'ŋʌyajpa.