1 Timoteo 3 - Zoque Copainalá New Testament

Jutz pyʌcpa wa'y tyu'ŋajyaju co'aŋgui'moyeta'm

¹ Wiyuŋšejpʌ tzameyʌ' yʌ'wʌ: Juca iwʌ sunba quio'aŋgui'moyu Diojsis wyʌ'aŋja'moye'ojmota'm, oyepʌ yoscuy quiʌñʌñba.

² Pyʌcpa jeque wa'y tyu'ŋaju oye'c te' Diojsis quio'aŋgui'moye uy yajtiyʌcʌsi quionoquiatʌju. Y juca ijtu yomo, tumʌtij yajcojamʌ. Pyʌcpa wa'y 'yaŋgui'mu wyin, wa'y ijtu oyepʌ quipsoquiuy, wa'y quioquenu cuenta mumutiyʌcʌsi, wa'y pyʌjcʌchoŋu oye cojejyajpapʌ, y wa'y mujsu 'yaŋma'yoyu.

³ Y te' Diojsis quio'aŋgui'moye uy ño'tu, uy myawʌqui'šca'u sino que yumijpʌ, uy quipotoŋu ni uy quiʌñʌñu itʌpa'tcuy.

⁴ Y te' Diojsis quio'aŋgui'moye's ya'aŋgui'mʌ oye'c te' tyʌjcojmota'mbʌ, y te' 'yuneta'm wa'y myato'ŋoyaju y wyʌcocojtyaju tyatajta'm.

⁵ Porque juca iwʌ's ja'n 'yaŋgui'mi oye fyamilia, ¿jutza maŋba quio'aŋgui'moyu Diojsis wyʌ'aŋja'moye'ojmota'm?

⁶ Ja'n pyʌqui wa'y quio'aŋgui'moyu te' nʌmaj wyʌ'aŋja'moquiʌ'yupʌ, uy maŋu myʌja'ŋgomʌ'yu wyin, diablo's myʌja'ŋgomʌ'yušej wyin y yajnʌco'aŋgʌyaju.

⁷ Te'šejtij pyʌjque'tpa wa'y 'yoyecotzamyaju te' Diojsis quio'aŋgui'moye te' ja'n wyʌ'aŋja'moyapyʌ's, uy ya'iwʌ's ñicotza'mʌyu, y uy quiunu'ŋmʌjcʌ diablo's quiʌ'ojmo.

Jutz pyʌcpa wa'y tyu'ŋajyaju diaconota'm

⁸ Te'šejtijque' diaconota'm, pyʌcpa wa'y tyu'ŋajyaju wʌpʌ pʌnšej, ja'n mejtza'ŋ-winbʌ, ja'n ño'tepʌ, ni ja'n aŋgoma'cʌ'oquiupyit sunba itʌpa'tupʌ.

⁹ Pyʌcpa wa'y myuspʌ'yaju oye'c te' wiyuŋšejpʌ tʌta'm nwʌ'aŋja'moquiuy, y yajnʌ'ijtya cowajupʌ choco'yo'c quipsoquiuy.

¹⁰ Y yʌ'ta'mbʌ pyʌcpa wa'y chʌjquišatʌju winac, y juca ja'na yajtiyʌcʌsi quionoquiatʌy, pijche'ca yajyostʌjcʌya jujcha' diácono.

¹¹ Te'šejtijque' ñe' yomota'm, pyʌcpa wa'y tyu'ŋajyaju wʌpʌ yomošej, uy ñi'undza'mʌ'oyaju, sino que wa'y 'yaŋgui'myaju wyin, y wa'y quiota'ñaju mumutiyʌcʌsi.

¹² Te' diacono's juca ijtu yomo, tumʌtij yajcojamʌ. Ya'aŋgui'mʌ oye'c 'yuneta'm y tyʌjcojmota'mbʌ.

¹³ Porque wyʌcotzamyatʌjpa iwʌta'm yojšajpa oye jujcha' diácono, y wyʌ'aŋjamgupyit aŋmayaju wa'y jana na'chcuy ñite'tzʌyaju Cristo Jesús.

Tʌta'm nwʌ'aŋja'moquiuy

¹⁴ Njo'cpa'ʌs que yʌ'ta'mbʌ jamo'oyj minba'ʌj mi'aŋʌ, pero nʌ'ʌsmij njayjayu yʌ'šejta'mbʌ tiyʌ yʌtij.

¹⁵ Y juca ja'nʌj mini yʌ'ta'mbʌ jamo'oyj, nʌ'ʌsmij njayjayu wa'miste' mujsu jutz oye wa'y tyu'ŋajyaju te' Diojsis wyʌ'aŋja'moyeta'm, porque te'ta'mbʌte' te' quenbapʌ Diojsis tyu'mʌquiuy. Yʌ'ta'mbʌ'ste' pyaquitzi'yajpa y quioquipyajpa te' wiyuŋbʌ tiyʌ.

¹⁶ Tiene que wa'ytyʌ ndzamu que mʌja'ŋbʌte' te' nʌtʌ nwʌ'aŋjamdamupʌ, te' Diojsis jayajqueyapʌ cʌtʌquiajupʌ aŋsʌ'ŋojmo. Yʌ'šejte' tujcu: Minu yajqueju Diojsis te' Cristo pʌnšej, Y chamu que justopʌte' Espíritu Santopit. Y quieñaju ñe'cʌ angelejsista'm. Chamgopuŋyajwa'a pʌ'nista'm te' nacio'ŋojmota'm. Wyʌ'aŋjamyajwa'a najsacopajcʌsita'mbʌ's. Y yajmʌja'ŋajwa'a Diojsis tzajpojmo.