1 Timoteo 2 - Zoque Copainalá New Testament

Pyʌcpa wa'ytyʌ nwa'coyjaytyamu Dios pʌngotoyata'm

¹ Winbʌ tiyʌ'ʌsmij ndzamjapyapʌ: Pyʌcpa wa'y mumu wʌ'aŋja'moye's 'yoto'ŋʌyaju Dios, wa'y wya'coyaju y wa'y ñʌjayaju yʌscotoya Dios mumu pʌngotoyata'm.

² Tzʌctamʌ yʌ'šej reyquiotoyata'm y mumu aŋgui'myajpapʌcotoya wa'ytyʌ mʌ'chiquic ittamu sʌ'mnayu'c, y wa'ytyʌ nwittamu cʌna'tzʌ'oquiu'yojmo y wʌpʌ-pʌ'najcu'yojmo.

³ Porque oye wa'ytyʌ ndzʌjcu yʌ'šejta'mbʌ tiyʌ y nyajtzocopyacpatʌ Dios, tʌta'm nyajcotzojco'yoye.

⁴ Te'wʌ's šunba wa'y quiotzojcu mumu pʌn y wa'y pyʌjcʌchoŋyaju te' wiyuŋbʌ tiyʌ.

⁵ Porque tumʌtij ijtu Dios y tumʌ tzamdʌjcʌ'opyapʌ Diosji'ŋ y pʌnji'ŋda'm y te'wʌte' te' pʌn Jesucristo.

⁶ Ñe'cʌ's chi'oquia'u wyin wa'ytyʌ jupyutpʌ'tamu, y yʌ'šej tujcu nu'cu'cande' aŋsʌŋ Diojsis chamušej.

⁷ Te'cotoya copiŋu'ʌj y cʌ'weju'ʌj Diojsis wa'yʌs ndzamgopuŋu y wa'yʌs aŋmayaju te' gentilta'm wa'y wyʌ'aŋja'moyaju y wa'y pyʌjcʌchoŋyaju te' wiyuŋbʌ tiyʌ. Ʌj, wiyuŋdzamba'ʌj, ja'nʌj sutzi.

⁸ Sunba'ʌs jeque wa'y 'yoto'ŋʌyaju Dios te' pʌ'nista'm mumu Diojsis tyu'mʌquiu'yojmo. Cowajupʌ tzocopyit yajpacsqui'mya quiʌ' Diojsis wyi'naŋdʌjqui. Uy quipšaju quipcuy ni qui'šca'cuy.

⁹ Te'šejti'ʌs sungue'tpa uy yamyaju tza'ajcuytya'mbʌ pama yomo'sta'm, ni uy jene ñimeque'ʌyaju wyay, ni uy jene yamyaju oro y perlas y wʌwʌ coyowapʌ pama,

¹⁰ sino que wa'y chʌquiaju oyeta'mbʌ tiyʌ pyʌcpašej cʌna'tzʌ'oyajpapʌ yomo'sta'm.

¹¹ Pyʌcpa sa'sa'c y yumi'ajcupyit wa'y 'yaŋmayaju yomota'm.

¹² Ja'nʌs ndzi'yay lugar yomota'm wa'y 'yaŋma'yoyu ni ñe'cʌ'sta'm wa'y 'yaŋgui'myaju pʌn, sino que wa'y ñumumñayaju.

¹³ Porque Diojsis wyinatzʌjcu Adán y jʌsa'ca Eva.

¹⁴ Y ja'yaŋgoma'cʌya te' Adán, pero te' yomo jʌ'ʌ cowapa'tu, porque 'yaŋgoma'cʌyaju.

¹⁵ Pero juca te' yomota'm wʌ'aŋja'moyjojcʌtʌquiajpa, y su'noyajpa y masa'najyajpa sa'sa'pʌ itcu'yojmo, Diojsis maŋba yajcotzoquiaju ya'ijtyajpa'c 'yune.