1 Pedro 5 - Zoque Copainalá New Testament

'Yaŋnʌctza'mʌyaju Pedro's te' wʌ'aŋja'moyeta'm

¹ Yʌtij ijtu tiyʌ wa'yʌs ndzamjayu jujche'ŋ ancianota'm wʌ'aŋja'moyajpo'mo, porque ʌj, ancianoti'ʌjyʌ'que' ñe'cʌji'ŋda'm y ŋguenu'ʌs ne' nwitʌmbit jutz ca'u Cristo cruzcʌsi y maŋba ijtu ʌs mbarte ñe' myʌja'ŋajcu'yojmo mingue'tpa'ca ñe'cʌ.

² Mijta'm ancianota'm, nwa'cjaytyamba'ʌsmij wa'mis ŋgoquenjaytyamu oye'c te' Diojsis tyu'mʌquiuy. Sa'sa'c yajtu'ŋajtamʌ porque ñchowambešejta'm Diojsis wyi'naŋdʌjqui. Umij ya'iwʌ's ñchi'tamu pena yʌ'šejpʌ yoscu'yojmo sino que ndumʌtzocoy ne'ta'm su'noquiupyit wa'mis ndzʌctamu, y ja'n wa'mij jyepecoyowatʌjtamu'ŋmʌjcʌ sino que mista'm ndzoco'yis wya'cpašej wa'mis ndzʌctamu.

³ Y uy nʌte'ngui'mdame mista'm aŋgui'mʌtʌjcuy te' tu'mʌyajpapʌ's wyi'naŋdʌjqui sino que tu'ŋajtamʌ oye'c wa'y quiengʌspʌcjayaju mista'm itcuy wʌ'aŋja'moye'sta'm.

⁴ Y minba'ca Cristo te' Coque'noye-cowi'na, ñe'cʌ'smij maŋba ñchi'tamu jujcha' ja'n yayepʌ corona, mista'm mbarte ñe' chi'muŋgʌ'ojmo y myʌja'ŋajcu'yojmo.

⁵ Y jujche'ŋ soca's y papiñomo's yajmato'ŋoyjaya ancianota'm. Y jujche'ŋ tu'mʌyajpapʌ, mumu yajmato'ŋoya ñe'co'mota'm yumijpʌ tzocopyit porque yʌ'šej chamba te' Totojaye's: 'Yotoŋwinduquiajpa Diojsis te' myʌja'ŋdzʌquiajpapʌ's wyin, Y yajyamba te' yumijta'mbʌ.

⁶ Yajyumi'ajtamʌ nwin porque pʌmi'ʌyupʌ Diojsistʌyʌ' 'yaŋgui'mʌtʌjcuquiʌ'mʌta'mbʌ y ñe'cʌ'smij maŋba nyajmʌja'ŋajtamu nu'cpa'ca aŋsʌŋ.

⁷ Uy pʌcjaytyame maya'cuy ja'n nʌ pyocspajcu'c mista'm ŋguipsoquiuy porque Diojsismij nʌ ŋguioquendamu.

⁸ Coquendamʌ nwin y coquendamʌ cuenta mumutiyʌcʌsi porque te' yatziwʌ, te' diablo, cʌ'soytyo'yupʌ caŋšej ji'aju'c witpa yʌmʌc teymʌc wa'y pya'tu iwʌ wa'y yajtocoyaju.

⁹ Pero mista'm nʌjaytyamʌ te' diablo: Jʌcʌ'ʌ tey ʌs nwi'naŋdʌjqui, u'yʌj oc'isi. Y maŋdzʌ'yu'c tu'ŋajtamʌ mista'm nwʌ'aŋjamgu'yojmo porque mustambamis que naswindumʌ mumu mis atzi'sta'm nʌ quiʌtʌquiajque'tu toya mis nʌ ŋguendamušej wa'y tyujcu Diojsis chamušej.

¹⁰ Y ŋguenba'camis toya uša'ŋ aŋsʌŋ, Diojsismij maŋba nyajpaquipʌctamu, mbyʌmitzi'tamu y nyajcota'ndamu ndzoco'yojmo. Porque ñe'cʌte' te' yajya'mopyapʌ y ñe'cʌ'smijte' nwyejtamu wa'mis ittamu mbarte te' ja'n yayepʌ ñe' myʌja'ŋajcu'yojmo.

¹¹ Mʌja'ŋgotzamda'mitʌy jeque Dios, porque ñe'cʌte' aŋgui'mjojcʌtʌcpa mumu jamacotoya. Amén.

Ultimota'mbʌ dyujchi'oquiuy

¹² Y yʌ' Silvano ʌs jicapyʌ atziše'ʌs nʌ'ijtu. Y ñe'cʌ ʌs nʌ nyaja'yʌyu yajtya' metza tuca'y ʌs ndzame yʌ' carta'ojmo, y ñe'cʌ's maŋba ñʌminu mij ittamumʌy. Sunba'ʌsmij mbaquitzi'tamu ndzoco'yojmo yʌ' cartapit wa'yʌsmij ndzamjaytyamu Diojsis wiyuŋšejpʌ yajya'moquiuy. Te'cotoya maŋdzʌ'yu'c nʌmdamʌ: Ja'ndiyʌ eyapʌ Dios yajyambapʌ'stʌ.

¹³ Yʌ' Babiloniašej yatzipʌ cumgu'yojmo ijtupʌ Diojsis tyu'mʌquiu'yis ñdyujchi'tambamij. Yʌ' tu'mʌquiuy Diojsisyʌ' copiŋu jujcha' mij ne'cʌ ŋgopiŋdaŋgue'tu. Y ŋguiʌ'wejaytyambamij dius ʌs uneše'ʌs nʌ'ijtupʌ Marcojsis.

¹⁴ Nadyujchi'ʌtʌjtamʌ ne'co'mo su'coquiupyit wa'mis nyajquejtamu que ñašunʌtʌjtambamij ne'co'mota'm. Sunba'ʌs wa'mij Diojsis ñchi'tamu sʌ'mnaquiuy, mumu mijta'm jujche'ŋ Cristo'ste'ñe'. Amén.