1 Pedro 4 - Zoque Copainalá New Testament

Como Diojsistʌ tzi'tamu pʌmi, nyosjaytya'mitʌy tumʌtzocoy

¹ Te'cotoya como quienu toya Cristo's tʌcotoyata'm ñe' cuerpopit, te'šej pyʌcpa wa'mis nʌ'itjaytyamu ñe' quipsoquiuy wa'mis ŋguendaŋgue'tu toya mista'm. Porque te' pʌn wiyuŋše'a quiʌtʌjcupʌ's maya'aŋbʌ toya, ja'na suni quiowapa'tu.

² Yʌy najsacopajcʌsimaj nʌ wyijtuca'ŋu'c, te'wʌ's ja'n suni quio'ŋjayaju pʌ'nista'm yatzi šu'noquiuy sino que te' Diojsis šu'noquiuy.

³ Te' cʌtʌquiajupʌ jamo'oyjtya'm ŋgo'ŋdambamis inʌc te' yatzita'mbʌ genti'lista'm chʌqui, te' mba'tpamʌytyʌ jenejenepʌ tocoquiuy, te' tiyʌta'mdʌ jene ŋgueneminbamʌy. Ño'taŋgʌtʌctambamij inʌc y cu'tcuy-šʌ'ŋajcu'yojmo njyucucu'ttambamij inʌc wa'ytyijmis ŋgo'ŋdamu mumu tocoquiuy. Y ja'nmis inʌc ndzactame comichʌqui-wʌ'aŋjamguy qui'nispapʌ Diojsis.

⁴ Y te' yatzita'mbʌ genti'lista'm maŋba ñʌmaya'yaju porque ja'namij nwyittame ñe'cʌji'ŋda'm te'šejpʌ ca'ŋdocoquiu'yojmo, y maŋbamij nyatzicotzamʌtʌjtamu.

⁵ Uy pʌcjaytyame maya'cuy. Porque minba'cande' te' Diojsis ñimejcʌyupʌ, maŋbapʌ's quiʌme'chaju queñajpapʌ y ca'yajupʌ, yʌ' genti'lista'm maŋba quiowʌ'aŋjamyaju ñe'ta'm quiowa.

⁶ Ijtu ca'yajupa'a wyʌ'aŋjamyajupʌ's te' Diojsis 'yevangelio queñajpa'cmaj najsacopajcʌsi. Yʌ'ta'mbʌ Diojsis maŋba quiʌme'chaju tiyʌta'm chʌquiaju yʌy najsacopajcʌsi y maŋba chi'yaju iscuy-quenguy ja'n yayepʌ ñe'cʌ's ñʌ'ijtušej.

⁷ Tomya' wa'y yaju mumutiyʌ. Jʌ'ctzʌ'ytyamʌ nwin, tzʌctamʌ oyepʌ tiyʌ, y oto'ŋʌyjojcʌtʌctamʌ Dios y uy mochcʌtʌŋdame ndzoco'yojmo.

⁸ Y nimeque'ctij tumʌtzocoy našunʌtʌjtamʌ ne'co'mo y te'šejmis maŋba matzcomʌ'ndamu aŋba'tepʌ cowa.

⁹ Oma'oma tzi'oquiu'yajtamʌ jejcuy ne'co'mota'm uy pojpojnayu'c.

¹⁰ Diojsismij nwye'nbʌ'jaytyamušej tumduma'ŋbʌn te' tzi'ʌtʌjcuy, te'wʌ nʌyostamʌ wa'mis naquiotzowatʌjtamu ne'co'mo. Te'šejmis maŋba ndzʌcjaytyamu bien mis atzita'm te' Diojsis wi'ni eyata'mbʌ yajya'moquiupyit.

¹¹ Iwʌ aŋma'yopya, ya'aŋma'yoya Diojsis chambašej. Iwʌ yospa Dioscotoya, yajyosa Diojsis šajpapʌ pʌmipit. Te'šejmis maŋba mʌja'ŋwʌcotzamdamu Dios mumutiyʌcʌsi Jesucristopit. Cristo's pyʌjcʌchoŋwa'a 'yaŋgui'mʌtʌjcuy mumu jamacotoya y pyʌcpa wa'ytyʌ nwʌcotzamdamu ñe'cʌ. Amén.

Cristiano'ajcu'yojmo ŋguenbatʌ toya

¹² Tʌwʌy, uy ñʌcna'tzʌytyame nwin ñchʌjquisʌtʌjtamba'cmij jujcha' jucʌtʌjcojmo, porque te'šej pyʌcpa wa'mij ñchʌjquisʌtʌjtamu toyapʌjcu'yojmo pero cʌtʌquiajpapʌ tiyʌtijte'.

¹³ Juca Cristošejmij nyacsnutzʌcʌtʌjtamba, nʌ'omdamʌ porque nʌmis ŋguenjaytyamu Cristo's tyoya quienušej ñe'cʌ's. Pero minba'ca y yajquejpa'ca ñe' wyin chi'muŋgʌ'ojmo, maŋbamis maya'aŋ oma'oma mbʌjcʌchoŋdamu.

¹⁴ Dichosota'm mij juca 'yotoŋjatʌjtambamij ŋgo'ŋdamba'ŋmʌjcʌmis Cristo. Te'šej maŋba quieju que te' Diojsis 'Yespiritu miji'ŋda'm ijtu y Diosji'ŋmij nʌ nwyittamu y Diojsismijte' ñe'ta'm.

¹⁵ Ʌs ja'ʌs suni nijutiwʌ mi'ojmota'mbʌ's wa'y quienu toya porque nyajca'oyu o porque nu'mu o porque yatzi tzocoy o porque tyʌ'ŋʌpya wyin ja'n ñe'cʌ's quiowindzʌmipʌ tiyo'mo.

¹⁶ Pero juca iwʌjutiwʌ mi'ojmota'mbʌ's Cristo's ñʌquiʌsi quienba toya, uy yajtza'ay, sino que yajmʌja'ŋwʌcotzamʌ Dios porque Cristo'ste'ñe' quiʌ'aŋmaye.

¹⁷ Pyʌcpapʌte' wa'y Diojsis ñʌcʌtzo'tzu quiʌme'tzoquiuy ñe' 'yune'ojmota'm. Y juca winatʌ cʌme'tztamba tʌta'm porque ñe'tʌyʌ' 'yune, ¿jutzpʌ toyapitpʌ co'aŋgʌquiu'yasʌ'ŋ maŋba quiʌtʌquiaju te' ja'n myato'ŋoyjayapyʌ's Diojsis 'yevangelio?

¹⁸ Chambašej te' Totojaye's: Juca te' justota'mbʌ pʌn penapit cotzoquiajpa, ¿Jutzasʌ'ŋ maŋba quiotzoquiaju te' ja'n wyʌ'aŋja'moyapyʌ y te' cowapa'tjojcʌtʌquiajpapʌ?

¹⁹ Te'cotoya te' quieñajpapʌ's toya Diojsis šunbašej, pyʌcpa wa'y chʌcjojcʌtʌquiaju oyepʌ tiyʌ y wa'y ñitza'mʌyaju quienguy te' jicapyʌ Cojojmejcoyacʌsi.