1 Pedro 2 - Zoque Copainalá New Testament

¹ Tzactamʌ jeque mumu yatzita'mbʌ tiyʌ, pitte' te' qui'nisoquiuy, aŋgoma'cʌ'oquiuy, sutzcuy, ni'aŋsu'noquiuy y nisujtzʌ'oquiuy.

² Jujcha' yawa-une's ñʌmu'ctu'pya te' lyeche wa'y šinanu, te'šej pyʌcpa wa'mis ŋgʌñʌñjaytyamu Diojsis chame wa'mij te'wʌpit mbyʌnbuttamu nʌctʌ'yoquiu'yojmo hasta tiyʌ jamamij ŋguiotzojcoctuctamba.

³ Y te'šej tzʌctamʌ porque ŋguendamwa'mis jutzmij nyajyamdamba tʌ Ngomi's.

Quengu'yʌyupʌ Tza'

⁴ Jujcha' tʌctzʌcpapʌ's quiopiŋba tza', te'šej Diojsis quiopiŋu sa'sa aŋguinʌ jejcupʌ Tza' quenbapʌ. Wiyuŋšej pʌ'nista'm jašunʌ pyʌjcʌchoŋya. Yʌ'wʌte' te' Cristo wʌwʌ coyowapʌ tza'. Yajto'mʌytyamʌ mista'm ndzocoy ñe' wyi'naŋdʌjqui.

⁵ Te'šejmij Diojsis muspa nyajyostamu mijta'm jujcha' queñajpapʌ tza' wa'y yajtu'ŋaju ñe' tyʌc itpamʌy ñe' 'Yespiritu Santo. Yʌtij mijta'mde' te' masanda'mbʌ sacerdote wa'mis tumʌtzocoy ndzi'oquia'tamu mis ŋgʌna'tzʌ'oquiuy Jesucristo's ñʌquiʌsi Diojsis wyi'naŋdʌjqui.

⁶ Ijtu ja'yʌquie'tumʌy yʌ'šejta'mbʌ tiyʌ Totojaye'ojmo, nʌmbamʌy yʌ'šej: Ʌj Dios, jujcha' tʌctzʌquiajpapʌ's, ŋgotpa'ʌs Sio'ŋojmo tumʌ tza'cowi'na, copiŋupʌ, wʌwʌ coyowapʌ wa'y yojsu aŋguinʌ tzo'tzcuquiotoya. Iwʌ's wyʌ'aŋjamba ñe'cʌ, maŋba paquic ijtu ñe'cʌji'ŋ.

⁷ Y mista'm, porque nwʌ'aŋjamdambamis yʌ' Cristo, maŋbamij nwyʌcocottamu Diojsis. Pero te' ja'n wyʌ'aŋja'moyapyʌcotoya, nʌmbašej emʌ: Yʌ'wʌte' te' tza' japyʌjcʌchoŋyapʌ tʌctzʌquiajpapʌ's, Y yʌ'wʌ minu yojsu aŋguinʌ tzo'tzcuquiotoya.

⁸ Chamgue'tu emʌ te' Totojaye's te' japyʌjcʌchoŋyapʌ tza'cowi'na: Te'wʌcʌsi maŋba ñepcʌschʌmyaju y tyocoyaju Diojsis wyi'naŋdʌjqui porque ja'n ñʌctʌ'yay iwʌte' te' tza'cowi'na. Maŋba jyopi'tyaju choco'yojmo porque ja'n pyʌjcʌchoŋjay te' Diojsis chame wa'y myato'ŋoyjayaju. Ijtyaju te'še'a Diojsis ñima'yʌyatʌjupʌ.

Diojsis pyʌnda'm

⁹ Pero mijta'm ja'nmij tye'šejta'm porque Diojsismij ŋguiopiŋdamu. Yʌtij mumu wʌ'aŋja'moye, sacerdotete', masanbʌnda'mde' jujche'ŋ Diojsisa ñe'ajyajupʌ pyʌnda'm. Y Diojsismij ñe'ajtamu wa'mis ndzamgopuŋjaytyamu ñe' yajya'moquiuy, porque ñe'cʌte' te' 'yaŋbʌctamupʌ'smij wa'mis ndzactamu te' pi'tza'ŋajcu'yojmopʌ itcuy y wa'mij mindamu ñe' maya'aŋbʌ sʌ'ŋgʌ'ojmo.

¹⁰ Mijta'm, cʌtʌquiajupʌ aŋsʌ'ŋojmo yempejutzpʌ mbyʌnda'm mijyʌ' inʌc, pero yʌtij Diojsisamijyʌ' pyʌnda'm. Y te' cʌtʌquiajupʌ aŋsʌ'ŋojmo ja'nmis inʌc mustame que ñdyo'ya'ŋʌytyamba inʌc Diojsis, pero yʌtij mustamwa'mis que Diojsis wiyuŋšej ñdyo'ya'ŋʌytyamba.

Cʌna'tzʌyjojcʌtʌctamʌ Dios

¹¹ Como nʌtijmijyʌ' ŋguenwingʌtʌctamu witišej najsacopajcʌsi, ndumʌtzoco'yʌsmij nwa'cjaytyamba wa'mis jana ndzi'tamu lugar mista'm nwi'nis yatzipʌ šu'noquiuy, porque te' tʌta'm nwi'nis šu'noquiu'yis ñʌquipjapya tʌta'm ŋguenguy. Aŋgui'mdamba'ʌsmij porque jene sundamba'ʌsmij.

¹² Nʌ'ittamʌ oyepʌ tzocoy y oyepʌ itcuy te' yatzita'mbʌ genti'lista'm wyi'naŋdʌjqui. Y ñempemij nyatzicotzamʌtʌjtamba yʌtij que miste' nʌ ndzʌctamu mal, jʌsa'ca, te' cʌme'tzoquiuy jamo'oyj, maŋba wyʌcotzamyaju Dios ñʌctʌ'yaju'ca mista'm oyeta'mbʌ ndzʌqui.

¹³ Mato'ŋoyjaytyamʌ pʌ'nista'm 'yaŋgui'mʌtʌjcuy, porque te'šej šunba tʌ Ngomi's. Mato'ŋoyjaytyamʌ jeque, juca mʌja'ŋbʌ re'yisñe'

¹⁴ o juca gobernado'rista'mñe'. Te'ta'mbʌ quiojtyajpa re'yis wa'y yajnʌco'aŋgʌyaju chʌquiajpapʌ's yacha'cuy y wa'y wyʌcotzamyatʌju chʌquiajpapʌ's oyeta'mbʌ tiyʌ.

¹⁵ Yʌ'šej jeque šunba Diojsis wa'mis ndzʌctamu oyeta'mbʌ tiyʌ y te'šejmis maŋba nyajnumumgʌñe'ctamu te' jowita'mbʌ ja'n ñʌctʌ'yoyapyʌ.

¹⁶ Diojsismij nyajlibre'ajtamu pero ja'n wa'mis ndza'maŋjamdamu mista'm libre'ajcuy wa'mis ndzʌctamu yacha'cuy. Pero Diojsismij nyajlibre'ajtamu wa'mis nyosjaytyamu tʌ Ngomi.

¹⁷ Mʌja'ŋgomʌ'ytyamʌ mumu'iwʌ. Sundamʌ tumʌtzocoy te' atzita'm. Cʌna'tzʌytyamʌ Dios. Mʌja'ŋgomʌ'ytyamʌ mista'm ŋgobierno.

Quengʌspʌctamʌ jutz toyapʌjcu Cristo

¹⁸ Coyosata'm, mato'ŋoyjaytyamʌ mumutiyʌcʌsi mista'm ŋgomi, ja'n na' te' šundambapʌ'smij y te' yo'ca tzocopyʌ, hasta te' yatzi tzocoytya'mbʌ, porque nʌmis ŋgʌna'tzʌytyamu tʌ Ngomi.

¹⁹ Juca iwʌ'stʌ tzʌcjapya mal y ja'ndiyʌ tʌ ŋgowa, pyʌcpa wa'ytyʌ mbʌ'mgopajcʌytyamu ndzoco'yojmo. Juca te'šej tʌ ndzʌctamba wa'ytyijtʌ ŋgo'ŋdamu ne' oyepʌ ŋguipsoquiuy Diojsis wyi'naŋdʌjqui, maŋbatʌ nyajtzocopyactamu Dios.

²⁰ Pero ja'nmis yajtiyʌ nʌwʌ'ajtame Diojsis wyi'naŋdʌjqui juca ittamu mis ŋgowa y mbʌ'mgopajcʌytyambamis te' yacsnutzʌjcuy. Pero juca nyacsnutzʌcʌtʌjtambamij oyepʌ tiyʌcotoya y mbʌ'mgopajcʌytyambamis, wiyuŋšej maŋbamis nyajtzocopyactamu Dios.

²¹ Y Cristo's jeque quiengue'tu toya tʌcotoyata'm wa'ytyʌ que'naŋgʌschi'ʌyu wa'y ñe'cʌ's pyʌ'mgopajcʌyušej te' yajtoyapʌquiaju'c, te'šejmis wa'y mbʌ'mgopajcʌytyaŋgue'tu mista'm. Te'wʌcotoya jeque mijte' nwyejtamu Diojsis wa'mis ŋguendaŋgue'tu toya.

²² Y Cristo jaquiowapa'tʌ, ni jachamʌ nijutzpʌ aŋgoma'cʌ'oquiuy.

²³ Y wyinʌcnʌ'mnʌ'mwʌyajpa'c inʌc, ja'n inʌc 'yaŋdzowewʌ'ay. Tiyʌ'iwʌ inʌc chʌcjayajpa'c, ja'n inʌc chamna'chay ya'iwʌ sino que Diojsis inʌc quiʌ'ojmo quiotpʌ'pa, porque te' Dios wiyuŋgʌme'tzopya.

²⁴ Yʌ' Cristo'ste' chi'oquia'u wyin tʌcotoyata'm y ñʌmaŋjayu tʌta'm ŋgowa ñe' cuerpocʌsi ca'u'c cruzcʌsi. Te'cotoya pyʌcpa wa'ytyʌ ca'uwʌšej ndzʌctamu nwin cowa's wyi'naŋdʌjqui u'yandʌ ŋgowapa'ttamu. Y pyʌjque'tpa wa'ytyʌ ndzʌcjojcʌtʌctamu justota'mbʌ tiyʌ. Porque te' ñe' tyoyapʌjcu'yis yajʌcʌ'jawya'a tʌta'm ŋgowa.

²⁵ Wina tuŋdocoyajupʌ ñchowambešejta'm mij inʌc Diojsis wyi'naŋdʌjqui, pero yʌtij ŋgʌwitu'ʌytyamumis Cristo te' co'aŋgui'moye, ŋguioquendambapʌ'smij Diojsis wyi'naŋdʌjqui.