1 Pedro 1 - Zoque Copainalá New Testament

Pedro's jyayjayaju puŋditnayajupʌ wʌ'aŋja'moye

¹ Ʌjte' te' Pedro, Jesucristo's quiʌ'wej. Atzita'm, nʌ'ʌsmij njayjaytyamu mijta'm te' myacpujtyatʌjupʌ tʌta'm najsojmoc, y yʌtij puŋditnayajupʌ Ponto'ojmo, Galacia'ojmo, Capadocia'ojmo, Asia'ojmo y Bitinia-najsojmota'mbʌ.

² Tʌ Ndata Diojsis quipsu ya'ajca wa'mij ŋguiopiŋdamu mijta'm. Te'cotoya mumu mijta'm ŋguiopiwi-pʌnda'mdijmijte'que'. Y te' Espíritu Santo'smij nyajmasa'najtamu wa'mis mato'ŋoyjaytyamu Jesucristo y ñe' ñʌ'pinbit wa'mij ŋguiowajtamu mis ŋgowapit. Sunba'ʌs wa'mij Diojsis aŋba'te'c nyajyamdamu y wa'mij ñchi'tamu sʌ'mnaquiuy.

Sʌ'mnayu'ctʌ njo'cta'mi tʌ mbarte

³ Wʌcotzamda'mitʌy Dios, tʌ Ngomi Jesucristo's Tyataj, porque aŋba'tetʌ toya'ŋʌytyamu. Te'cotoya jomecotzʌctamutʌ ndzoco'yojmo wa'ytyʌ jana na'chcuy njo'ctamu ja'n yayepʌ quenguy, porque winsa'u Jesucristo ca'yajupʌ'ojmoc.

⁴ Njyomecotzʌctamumij jeque wa'mis mbʌjcʌchoŋdamu pijche'c mista'm mbarte tzajpojmo, te' nʌ quioquenupʌ Diojsis mijcotoyata'm. Y yʌ' mista'm mbarte tzajpojmo ja'na yaye, masanbʌte' y nunca ja'n quiʌtʌquipʌ.

⁵ Nʌmis nwʌ'aŋjamdamu'ŋmʌjcʌ Dios, ñe'cʌ'smij nʌ ŋguiopʌ'ctamu y ŋguiotu'stamu hasta ŋguiotzojcoctuctamu te' ultimota'mbʌ jamo'oyj. Jʌ'ʌ, pijche'cpʌ jamo'oyj, quipsušej Diojsis, maŋba yajqueju jutzte' mʌja'ŋbʌ tiyʌ tʌta'm ŋgotzojcuy.

⁶ Te'cotoya ñchi'ŋbʌ'tambamij ndzoco'yojmo yempemis ŋgʌtʌctamba toya yʌy najsacopajcʌsi, juca ijtupʌte' pyena ñchʌjquisʌtʌjtamba'camij uša'ŋ aŋsʌŋ wi'ni eyapʌ toyapʌjcu'yojmo.

⁷ Ñchʌjquisʌtʌjtamba'cmij yʌ'šej, maŋba quieju que mista'm nwʌ'aŋja'moquiuy wiyuŋbʌ tiyʌte' y Diojsis wyi'naŋdʌjqui te'wʌ más valetzʌcpa que ja'nde' oro jucʌtʌjcojmo chʌjquišajupʌ, porque te' oro yajpapʌ tiyʌte'. Pero mista'm nwʌ'aŋja'moquiupyit tʌ Ngomi Jesucristo'smij maŋba nwyʌcotzamdamu y nyajmʌja'ŋajtamu ñe' chi'muŋgʌ'ojmo maŋba'candʌ ŋguendamu ñe'cʌ.

⁸ Pero yʌtij jene sundambamis ñe'cʌ te' jaquiendamʌpʌmajmis y nʌmis nwʌ'aŋjamjojcʌtʌctamu ñempemis yʌtij jana ŋguendamʌ. Te'cotoya nʌmij ñdyu'ŋajtamu aŋba'tepʌ oma'ojmo ijtyajupʌšej tzajpojmo.

⁹ Y juca nwʌ'aŋjamjojcʌtʌctambamis Cristo, maŋbamis nʌ'omdamu maŋba'camij ŋguiotzojcoctuctamu.

¹⁰ Yʌ'šejpʌ cotzojcuy chijpana-me'chajpa inʌc tza'maŋwa'oye'sta'm wa'y quiʌpa'tyaju y wa'y ñʌctʌ'yaju. Jaquiʌpa'tya pero cha'maŋwajyajpa inʌc te' Diojsis yajya'moquiuy te' yʌtijmis mbʌjcʌchoŋdamupʌ.

¹¹ Te' Cristo's 'Yespiritu te' ijtupʌ inʌc tza'maŋwa'oye'sta'm choco'yojmo, te'wʌ's cha'maŋwajpa inʌc jutz inʌc maŋba tyoyapʌjcu te' Cristo, y jutz Diojsis maŋba inʌc yajmʌja'ŋaju Cristo toyapʌjcu'ca. Y te' tza'maŋwa'oye'sta'm chʌcme'chaju wa'y ñʌctʌ'yaju iwʌte' chamba te' Cristo's 'Yespiritu's y tiyʌ jama maŋba inʌc tyujcu te'šejta'mbʌ tiyʌ.

¹² Pero jʌsa'ca yʌ' tza'maŋwa'oyeta'm yajmujšatʌju que ja'nde' ñe'ta'm jyamo'oyj inʌc maŋba tyujcu te'šejta'mbʌ tiyʌ sino que tʌta'mde' jamo'oyjtya'm. Y yʌtij Diojsis nʌ quiʌ'wejyaju pʌnda'm wa'mij ñchamjaytyamu te'šejpʌ oyeta'mbʌ tiyʌ. Y minumij ñchamgopuŋjatʌjtamu te' evangelio Espíritu Santopit quiʌ'wejupʌ Diojsis tzajpojmoc. Y hasta te' tzajpojmopʌ angelejsista'm sunba myujšaju y ñʌctʌ'yaju te'šejta'mbʌ tiyʌ.

Diojsis wejtambatʌ wa'ytyʌ masanittamu

¹³ Te'cotoya paquic ittamʌ nʌctʌ'yoquiu'yojmo y aŋgui'mdamʌ ne' nwin, y tumʌtzocoy nite'tzʌytyamʌ Dios te' maŋbapʌ'smij ñchi'tamu ñe' yajya'moquiuy maŋba'camis ŋguendamu Jesucristo.

¹⁴ Como mato'ŋoyjaytyambamis yʌtij te' Dios, uy tzʌctame ne' yatzipʌ su'noquiuy ndzʌctambašejmis inʌc ja'nmajmis inʌc ispʌctame'c Dios.

¹⁵ Porque masanbʌte' te' Dios nwyejtamupʌ'smij wa'mij ñe' 'yune'ajtamu. Te'šejtij pyʌjque'tpa wa'mij myasa'najtamu ndzoco'yojmo, y wa'y myasa'naju mista'm itcuy.

¹⁶ Porque te'šej ja'yʌyu Totojaye'ojmo: Masa'najtamʌ, porque ʌj Dios masanbʌ'ʌjyʌ'.

¹⁷ Te' cʌme'tzopyapʌ Diojsis wyi'naŋdʌjqui tu'mbactij mumu pʌn maŋba'ca quiʌme'chaju tiyʌta'm chʌquiaju yʌy najsacopajcʌsi. Y como nʌjaytyambamis yʌ' Dios: Tʌsmijte' Ndataj, pyʌcpa wa'mij na'tzina'tzic ñdyu'ŋajtamu ñe' wyi'naŋdʌjqui yʌy najsacopajcʌsi.

^18-19 Porque mustambamis que njyupyujtʌtʌjtamumij ja'nde' yajpapʌ tiyʌpit jujcha' oro o plata, sino que te' Cristo's ñʌ'pinbit te' aŋba'tepʌ coyowapʌ tiyʌ Diojsis wyi'naŋdʌjqui. Y jujcha' Diojsis jayu'cʌpʌ Ñchowambe, te' ja'ndiyʌpʌ's quiowa, Cristo's 'yumbʌ'u ñʌ'pin mijcotoyata'm. Njyupyujtʌtʌjtamumij jeque wa'mis jana ŋgo'ŋdamu mista'm ndata's quiostumbre porque jojtacapʌ tiyʌte'.

²⁰ Diojsis quiopiŋu jeque te' Cristo antesquemaj tucpa najsacopac wa'y 'yumbʌ'u ñʌ'pin mijcotoyata'm. Pero jaminʌ Cristo hasta yʌ' ultimopʌ aŋsʌ'ŋojmo.

²¹ Y yʌtij ñe'cʌpit nite'tzʌytyambamis Dios y njo'ctambamis ndumʌtzocoy te' chamdzi'oquia'upʌ tiyʌ, porque mustambamis que Diojsis yajwinsa'u yʌ' Cristo ca'yajupo'moc y pijche'c yajmʌja'ŋaju ñe' wyi'naŋdʌjqui.

²² Y te' Espíritu Santo's yajcowajayu mista'm ndzocoy wa'mis mato'ŋoyjaytyamu Diojsis wiyuŋbʌ chame. Te'cotoya tumʌtzocoy našunʌtʌjtamʌ ne'co'mo y tzʌcjaytyamʌ bien mista'm atzi wiyuŋšejpʌ y yo'capʌ ndzocopyit.

²³ Porque yʌtij njyomecotzʌctamwa'mij ndzoco'yojmo te' Diojsis chame's. Y te' Diojsis chame ja'nde' jujcha' yajpapʌ tiyʌ sino que itjojcʌtʌcpapʌ tiyʌte' y nunca ja'n yaye.

²⁴ Wiyuŋšej chamba te' Totojaye's: Jujcha' tʌjchajpa te' ta'nʌ, Te'šej maŋba yaju pʌ'nista'm yʌpyʌ quienguy. Y jujcha' yajpa te' ta'nʌ's jyʌyʌ, Te'šej maŋba yaju tʌta'm najsacopajcʌsipʌ mʌja'ŋajcuy.

²⁵ Pero tʌ Ngomi's chame itjojcʌtʌcpa mumu jamacotoya. Y yʌ'wʌte' te' evangelio ñchamgopuŋjatʌjtamupʌmij.