1 Juan 5 - Zoque Copainalá New Testament

Nwʌ'aŋjamgupyit ndzacpatʌ najsacopajcʌsipʌ yacha'cuy

¹ Mumu iwʌ's wyʌ'aŋjamba que Jesuste' te' Cristo te' Diojsis quiopiwi, te'wʌ Diojsis te' 'yuneta'm. Y iwʌ's šunba te' Tataj šunjaquie'tpa te' ñe' 'yuneta'm.

² Juca sundambatʌ Dios, y ŋgojamjapyatʌ ñe' 'yaŋgui'mguy, te'šejtʌ muspa que suñajpatʌ Diojsis 'yuneta'm.

³ Porque juca sundambatʌ Dios, ŋgojamjapyatʌ te' ñe' 'yaŋgui'mguy. Y te' 'yaŋgui'mgu'yis ja'ndʌ yajtoyapʌqui.

⁴ Porque jujche'ŋdʌ Diojsis 'yuneta'm ndzactambatʌ mumu yacha'cuy ijtupʌ najsacopajʌcʌsi. Y tʌte' nwʌ'aŋjamgupyit ndʌŋgʌspa'tpatʌ wa'ytyʌ nwʌyu najsacopajcʌsita'mbʌ yacha'cuy.

⁵ ¿Iwʌ'sasʌ'ŋde' tyʌŋgʌspa'tpa wa'y wyʌyu najsacopajcʌsipʌ yacha'cuy? Wyʌyajpa jujche'ŋ wyʌ'aŋjamyajpapʌ's que Jesuste' te' Diojsis 'Yune.

Te' quiotestigosajyajpapʌ's te' Diojsis 'Yune

⁶ Yʌ'wʌte' te' Jesucristo te' minupʌ najsacopajcʌsi, y tiju ñʌ'yʌyu. Y yajca'yaju'c cruzcʌsi 'yumbʌ'jayaju ñʌ'pin. Ja'n na' tiju ñʌ'yʌyu, sino que 'yumbʌ'jayaju ñʌ'pin. Y te' Espíritu Santo's quiotestigosajpa, y te' Espíritu wiyuŋdzambapʌte'.

⁷ Porque tuca'y ijtu tzajpojmo quiotestigosajyajpapʌ's te' Jesús: Tʌ Ndata Diojsis, te' Tzame's y te' Espíritu Santo's. Y yʌ' tuca'ytya'mbʌ tumo'oyjtya'm quipšajpa.

⁸ Y tuca'y ijtu najsacopajcʌsi quiotestigosajyajpapʌ's te' Jesús: Te' Espíritu Santo's y te' nʌ'yʌyu'c y 'yumbʌ'u'c ñʌ'pin. Y yʌ' tuca'ytya'mbʌ's tumʌpʌ tiyʌ chamyajpa.

⁹ Juca nwʌ'aŋjamdambatʌ quiotestigosajyajpašej pʌ'nis, más pyʌcpa wa'ytyʌ nwʌ'aŋjamdamu Diojsis quiotestigosajušej. Ñe'cʌ's quiotestigosaju que wiyuŋšej ñe'te' 'Yune.

¹⁰ Iwʌ's wyʌ'aŋjamba Jesús, te' Diojsis 'Yune, myuspa choco'yojmo que wiyuŋšej quiotestigosaju Diojsis. Iwʌ's ja'n wyʌ'aŋjame Dios, nʌ quiomʌ'yu sutzpapʌte', porque ja'n wyʌ'aŋjame te' Diojsis quiotestigosajušej te' 'Yune.

¹¹ Y yʌ'šejte' chamu Diojsis: Que ñe'cʌ'stʌte' tzi'tamu ja'n yayepʌ quenguy. Y te'šejpʌ quenguy tzi'patʌ 'Yunepit.

¹² Juca nʌ'ijtutʌ ndzoco'yojmo te' Diojsis 'Yune, nʌ'itwa'ndʌ yʌ' ja'n yayepʌ quenguy. Juca ja'ndiyʌmaj tʌ ndzoco'yojmo te' Diojsis 'Yune, jañʌ'itʌmajtʌ te' ja'n yayepʌ quenguy.

Ultimota'mbʌ aŋnʌctza'mʌ'oquiuy

¹³ Yʌ'šejta'mbʌ tiya'mʌsmij njayjaytyamu porque nwʌ'aŋjamdambamis te' Diojsis 'Yune, y wa'mis mustamu que nʌ'ittamumis ja'n yayepʌ quenguy, y wa'mis tumʌtzocoy nwʌ'aŋjamdamu te' Diojsis 'Yune.

¹⁴ Y nite'tzʌytyambatʌ Dios, y te'cotoya muspatʌ que ñe'cʌ'stʌ cʌmato'ŋʌpya nwa'ctamba'ctʌ tiyʌ'iwʌ ñe'cʌ's šunbašej.

¹⁵ Y juca mustambatʌ que cʌmato'ŋʌpyatʌ ñe'cʌ's tiyʌta'mdʌ nwa'cpa ñe'cʌcʌsi, mustambatʌ que tiyʌta'mdʌ nwa'cu maŋbapʌtʌte' mbʌjcʌchoŋu.

¹⁶ Juca iwʌ's mi'ojmota'mbʌ's quienba que nʌ quiowapa'tu te' 'yatzi, pero ja'nde' wa'y tyocoyo'ctujcu, pyʌcpa wa'y wya'coyjayu Dioscʌsi, ñe'cʌ's wa'y yajtzajcu te' quiowa wa'y yajcotzojcoctujcu. Yʌ'še'ʌs nʌ ndzamu pero juca jaquiowapa'tʌmaj hasta wa'y tyocoyo'ctujcu. Ijtu cowa yajtocoyo'ctujcopyapʌ. Juca te'šej nʌ quiowapa'tu, coquendamʌ cuenta iwʌmis maŋba nwa'coyjaytyamu.

¹⁷ Mumu iwʌ's chʌcpa ja'n jyustota'mbʌ tiyʌ cowapa'tpa. Pero ijtu cowa ja'ndʌ yajtocoyo'ctuquipʌ's.

¹⁸ Muspatʌ que mumu jujche'ŋdʌ Diojsis 'yuneta'm ja'ndʌ ŋgowapa'tjojcʌtʌctame, porque te' Diojsis 'Yune'stʌ coquendamba y te' yatziwʌ's ja'ndʌ musi wʌyu.

¹⁹ Mustambatʌ que Diojsistʌyʌ' 'yuneta'm, pero mumu ja'n wyʌ'aŋja'moyapyʌ 'yaŋgui'mba yatziwʌ's.

²⁰ Mustambatʌ que te' Diojsis 'Yune minu najsacopajcʌsi y tzi'tamutʌ nʌctʌ'yoquiuy wa'ytyʌ ispʌctamu te' wiyuŋšejpʌ Dios. Y yʌtij wiyuŋšejpʌ Diojsisandʌ nʌ'ittamu ñe' choco'yojmo, te'wʌte' te' Jesucristo. Yʌ'wʌte' te' wiyuŋšejpʌ Dios, y ñe'cʌ'stʌ tzi'pa ja'n yayepʌ quenguy.

²¹ Tʌwʌy, coquendamʌ nwin umis ŋgʌna'tzʌytyamu chʌquichʌquita'mbʌ comi. Amén.