1 Corintios 8 - Zoque Copainalá New Testament

Comichʌqui's wyi'naŋdʌjqui ñʌ'aŋguejyajupʌ cu'tcuy

¹ Y yʌtij ndzamba'ʌs te' yajca'yajpapʌ tiyʌ comichʌqui's ñʌquiʌsi. Muspatʌ que mumu tʌ nʌ'ijtu mujsoquiuy yʌ'šejta'mbʌ tiyʌcʌsi. Na' mujsoquiu'yis yajte'ngui'mbatʌ, pero našunʌtʌjcu'yis pyaquitzi'japya tʌ ndzocoy.

² Juca iwʌjutiwʌ's quiomʌ'pya que myuspa tiyʌ'iwʌ, ja'nmaj myusi pyʌcpaše'ŋ wa'y myujsoyu.

³ Y juca iwʌjutiwʌ's šunba Dios, te'wʌ ispʌcpa Diojsis.

⁴ Ndzamba'ʌs jeque juca muspatʌ ŋgʌ'su te' yajca'yajpapʌ copʌn comichʌqui's ñʌquiʌsi. Muspatʌs que te' comichʌqui yajtiyʌte' najsacopajcʌsi, y que solo tumʌtij ijtu Dios.

⁵ Porque ñempe itʌ ñʌjayajpapʌ diosta'm juca tzajpojmo o juca najsacopajcʌsi, y wiyuŋšej sone ijtyaju diosta'm y sone comita'm.

⁶ Pero tʌcotoyata'm tumʌtij ijtu te' Dios, y ja'ndiyʌ eyapʌ. Yʌ'wʌ te' Tataj, te' chʌjcupʌ's mumutiyʌ, y tʌta'm ittamutʌ ñe'cʌcotoya. Y tumʌtij ijtu tʌ Ngomi Jesucristo, y ñe'cʌpit ijtu mumutiyʌ, y tʌta'm ittamutʌ ñe'cʌpit.

⁷ Pero ja'ndiyʌ yʌ'šejpʌ mujsoquiuy mumu pʌ'nojmo. Porque hasta como yʌtij ijtu quipsoyajpapʌ comichʌquicʌsi quiʌ'šejpa'c te' yajca'yajupʌ tiyʌ comichʌqui's ñʌquiʌsi. Y ñi'aŋba'tyajpa te' quipsoquiu'yis porque mochita'mbʌte' choco'yojmo.

⁸ Cu'tcu'yis ja'ndʌ nitza'mʌy Dioscʌsi. Ngu'tʌtʌ y jana ŋgu'tʌtʌ, ja'ndʌ ya'oya'e ni ja'ndʌ nyajtocoye.

⁹ Pero coquendamʌ cuenta yʌ' mista'm libre'ajcuy umis nyajnepcʌschʌmdamu te' mochita'mbʌ's wyʌ'aŋjamʌtʌjcuy mista'm libre'ajcupyit.

¹⁰ Muspamis yʌ'šejta'mbʌ tiyʌ, y juca maŋbamij mbyocsu mesa'ojmo ijtyajumʌy comichʌqui, y ŋguienbamij iwʌjutiwʌ's, nʌmaj jyopi'tupʌ's choco'yo'c quipsoquiuy, ¿ja'nsʌ'ŋ quiengʌspʌqui wa'y maŋu quiʌ'su yajca'yajupʌ tiyʌ comichʌqui's ñʌquiʌsi?

¹¹ Y misyʌ' mujsoquiupyit maŋba tyocoyu te' jopi'tupʌ atzi, te' Cristo's quioca'upʌ.

¹² Yʌ'šejta'mbʌ tiyʌpit, jeque, ŋguiowapa'ttambamij contra miste' atzi. Y nyajopi'ttambamis te' mochipʌ atzi choco'yojmo. Te'šejmis ndzʌctamba'c ŋguiowapa'ttambamij contra Cristo.

¹³ Te'wʌcotoya juca te' cu'tcupyit nyajnepcʌschʌmba te' atzi, ja'na'mʌs ŋgʌ'sque'temaj sis, u'yʌs nyajnepcʌschʌmu'ŋmʌjcʌ ʌs atzi.