1 Corintios 7 - Zoque Copainalá New Testament

Jutz pyʌcpa wa'y ijtyaju co'tʌcta'm

¹ Y wa'yʌs aŋdzoŋu te' njayjayušejmisʌj, nʌmba'ʌj que oye inʌc wa'y jana pyi'quisu yomo te' pʌ'nis.

² Pero como jene ijtu ispʌquitzʌjcuy, ya'itʌ tumduma'ŋbʌ'nis ñe' yomo, y ya'itʌ tumdumʌ yomo's ñe' jyayaj.

³ Yajtzʌcja te' yomo's šu'noquiuy te' jaya's, y te'šejtijque' te' yomo's te' jyayajcotoya.

⁴ Te' yomo ja'n 'yaŋgui'mi ñe' cuerpocʌsi sino que te' jyayaj. Te'šejtijque' te' jayaj ja'n 'yaŋgui'mi ñe' cuerpocʌsi sino que te' yomo.

⁵ Uy naje'ŋjatʌjtame ne'co'mo, solo juca mejtzji'ŋ sundambamis naje'ŋjatʌjtamu uša'ŋ tiempocotoya wa'mis oto'ŋʌytyamu'cše'ŋoyj Dios. Pijche'ca tumʌtzʌctaŋgue'ta umij 'yoc'istamu'ŋmʌjcʌ Satanajsis porque ja'nmis musi njʌ'ctzʌ'ytyamu nwin.

⁶ Pero yʌ'še'ʌsmij aŋnʌctza'mʌytyamba ʌs, y ja'n aŋgui'mgupyit, wa'mis ŋgopiŋdamu mis tiyʌ maŋba ndzʌctamu.

⁷ Pero sunjo'pya'ʌs inʌc wa'y mumu pʌn chʌ'yaju jujcha' ʌj. Pero tumduma'ŋbʌ'nis ijtu ñe' chi'ʌtʌjcuy Diojsis chi'upʌ. Wiyuŋšej tuma'ŋbʌ'nis ñʌ'ijtu yʌ'šejpʌ y eyapʌ pʌ'nis te'šejpʌ.

⁸ Nʌjayajpa'ʌs jeque te' socata'm y te' se'aŋda'm, que oye inʌc wa'y chʌ'yaju jujcha' ʌj.

⁹ Pero juca ja'n musi jyʌ'ctzʌ'yaju wyin, yajco'tʌjcajya, más oye wa'y quio'tʌjcaju que ja'n wa'y jya'pʌyaju wyin.

¹⁰ Aŋgui'myajpa'ʌs te' co'tʌcta'm, pero ja'n ʌsne' aŋgui'mgupyit sino que tʌ Ngomi'sñe', que uy chajcu jyayaj te' yomo's.

¹¹ Y juca chacpa, u'ya quio'tʌjcaju, o yajtumʌtzʌjque'tatij jyayaji'ŋ. Y te' jaya's uy yajmacpʌ'i te' ñe' yomo.

¹² Y eyata'mbʌ pʌn nʌjayajpa'ʌs ʌs, pero ja'n tʌ Ngomi's 'yaŋgui'mgupyit: Juca iwʌjutipʌ atzi's ijtu yomo ja'n wyʌ'aŋja'moyepʌ y juca ñe'cʌ sunba ijtu ñe'cʌji'ŋ, uy yajmacpʌ'i.

¹³ Y juca iwʌjutipʌ yomo's ijtu jyayaj ja'n wyʌ'aŋja'moyepʌ y juca sunba ijtu ñe'cʌ te' yomoji'ŋ, uy chajcu ñe'cʌ's.

¹⁴ Porque masa'najpa te' ja'n wyʌ'aŋja'moyepʌ jayaj te' yomopit. Y masa'najpa te' ja'n wyʌ'aŋja'moyepʌ yomo jyayajpit. Juca ja'n inʌc te'šej unecotzaqueta'mde' inʌc mista'm une, pero juca te'šej masanda'mbʌte'.

¹⁵ Y juca maŋba te' ja'n wyʌ'aŋja'moyepʌ, yajmawʌ, tzʌ'pya libre te' atzi o te' cose. Porque wejtamutʌ Diojsis wa'ytyʌ ittamu sʌ'mnaquiu'yojmo.

¹⁶ Mij, yomo, ja'nmis musi juca maŋbamis nyajcotzojcu misne' njayaj. Y mij, jayaj, ja'nmis musi juca maŋbamis nyajcotzojcu misne' nyomo.

¹⁷ Yajwitʌ tumduma'ŋbʌn wye'nbʌ'jayušej tʌ Ngomi's, y wyejušej Diojsis wa'y wyijtu.

¹⁸ Juca wyejyaju iwʌjutiwʌ circuncidatzʌjcupa'a, yajtzʌ'ya te'šej circuncidatzʌjcupʌ. Y juca wyejyaju iwʌjutiwʌ jašircuncidatzʌcʌpʌ, uy šircuncidatzʌjcu.

¹⁹ Wa'ytyʌ circuncidatzʌjcu o wa'ytyʌ jana circuncidatzʌjcu, yajtiyʌ ja'ndʌ nʌwʌ'ajtame, pero nʌwʌ'ajpatʌ wa'ytyʌ ŋgojamjayu te' Diojsis 'yaŋgui'mguytya'm.

²⁰ Yajtzʌ'yʌ tumduma'ŋbʌn ijtu'cšej wyeju'c Diojsis.

²¹ Juca coyowatacapʌ ŋguioyosamij ijtu'c nwyejyajumij, uy pʌcjay maya'cuy, pero juca muspamis ŋgʌpa'tu libre'ajcuy, oye wa'mis nʌwʌ'aju.

²² Porque iwʌ coyosa ijtu'c cuando tʌ Ngomi's wyeju, te'wʌ's quiʌpa'tpa libre'ajcuy tʌ Ngomipit. Te'šejtijque' iwʌ libre'ajcu'yojmo ijtu'c cuando tʌ Ngomi's wyeju, te'wʌ Cristo's te' quioyosa.

²³ Mijta'm, coyowapitmij njyuyʌtʌjtamu, ja'nmij te' pʌ'nista'mñe'.

²⁴ Atzita'm, ittamu'cšejmij tumduma'ŋbʌn nwyeyatʌjtamu'cmij, te'šej tzʌ'ytyamʌ Diosji'ŋ.

²⁵ Pero jachi'ʌ'ʌj aŋgui'mguy tʌ Ngomi's te' papiñomocʌsita'm, pero ndzi'tamba'ʌsmij ʌsne' aŋnʌctza'mʌ'oquiuy porque tʌ Ngomi's to'ya'ŋʌyu'ʌj wa'misʌj nite'tzʌytyamu.

²⁶ Nguipspa'ʌs jeque, que jene oye wa'y chʌ'yu te' pʌn ijtu'cšej maŋba'ŋmʌjcʌtʌ ŋguenu toya.

²⁷ Juca ijtu mis nyomo, uy tzʌcme'tze wa'mij ñchʌ'yu libre. Juca ja'ndiyʌ mis nyomo, uy me'tze nyomo.

²⁸ Pero juca ŋguio'tʌjcajpamij ja'nmij ŋguiowapa'te, y juca te' papiñomo co'tʌjcajpa, ja'n quiowapa'te. Pero te'ta'mbʌ's maŋba quieñaju toya najsacopajcʌsi, y ʌs sunjo'pya'ʌs inʌc umij yʌ'šej ñdyuctamu.

²⁹ Pero yʌ'še'ʌsmij ndzamjaytyamba atzita'm que cono'ajwa'nde' tiempo, y te' miñajpapʌ jamacotoyata'm, te' ijtyajupʌ's yomo yajtzʌ'yʌ como que ja'ndiyʌta'm inʌc yomo.

³⁰ Y ya'ijtya te' jʌyajpapʌ jujcha'nde' ja'n jyʌyapyʌ, y te' tzi'ŋbʌ'papʌ jujcha'nde' ja'n chi'ŋbʌ'ipʌ, y te' ju'yoyajpapʌ jujcha'nde' ja'ndiyʌta'mbʌ's tyiyʌ'iwʌ.

³¹ Y ya'ijtya te' yajyojšajpapʌ's najsacopajcʌsita'mbʌ tiyʌ jujcha'nde' ja'n yajyosepʌ's, porque tiyʌta'm tʌ ŋguenba najsacopajcʌsi, maŋba yaju.

³² Sunjo'pya'ʌs jeque umis mbʌcjaytyame maya'cuy. Te' soca's quioquenba cuenta tʌ Ngomi's yoscuquiotoya wa'y yajtzocopyajcu ñe'cʌ.

³³ Pero te' co'tʌjquis quioquenba cuenta najsacopajcʌsita'mbʌ tiyʌ, wa'y yajtzocopyajcu ñe' yomo.

³⁴ Te' co'tʌc-yomo ja'n tyu'mbajcay itcuy te' papiñomoji'ŋ. Te' papiñomo's quioquenba cuenta tʌte' Ngomi's yoscuquiotoya wa'y myasa'naju te' cuerpo y te' 'yespiritu. Pero te' co'tʌc-yomo's quioquenba cuenta najsacopajcʌsita'mbʌ tiyʌ, wa'y yajtzocopyajcu jyayaj.

³⁵ Pero ndzamba'ʌs yʌ'šej wa'mis nʌwʌ'ajtamu y ja'nʌsmijte' wa'y nyajwinductamu. Te'še'ʌs ndzamba wa'mij nwyiyuŋdu'ŋajtamu y sa'sa'c ittamu, y wa'mis ndzijpana-cʌna'tzʌytyamu tʌ Ngomi.

³⁶ Pero juca iwʌjutiwʌ's quiomʌ'pya que más oye wa'y quio'tʌjcaju te' ñe' pyapiñomo porque tzambutwa'a, y juca ijtu pyena wa'y chʌjcu tiyʌ'iwʌ, yajtzʌcʌ. Juca pyʌcpa wa'y quio'tʌjcaju, yajco'tʌjca, ja'n quiowapa'te.

³⁷ Pero iwʌ's quiotwa'a choco'yojmo wa'y jana yajco'tʌjcaju, y te' papiñomo ja'n quipsi co'tʌjcajcuy, y quipswa'a wa'y quioquenu wa'y jana šaju, oye chʌcpa.

³⁸ Y iwʌ's yajco'tʌjcajpa oye chʌcpa. Y iwʌ's ja'n chi'oquia'e wa'y quio'tʌjcaju, más oye chʌcpa.

³⁹ Pyʌcpa wa'y chʌ'yu te' co'tʌc-yomo jyayaji'ŋ mientras jaquia'ʌtij. Pero juca ca'pa te' jyayaj, libre'ajwa'a wa'y quio'tʌjcajque'tu juca quejpa eyapʌ wʌ'aŋja'mopyapʌ tʌ Ngomicʌsi.

⁴⁰ Pero ʌs aŋnʌctza'mʌpya'ʌs te' se'aŋ-yomo que más dichoso te'šej se'aŋ wa'y ijtu. Y ŋguipspa'ʌs que nʌ'ʌs ndzamu šunbašej Diojsis 'Yespiritu's.